محمد عبد الصابر's Blog

بتفكريني بحد عورني ف ضلوعي
نفس الملامح والقلق
والعند والخوف والحنين
نفس العينين
والغمازات
نفس التمرد والتردد ف الحاجات
ساعة الغلط
بتكرري نفس التوتر والهجوم
كان كل حد ف عمري كوم
ودي بس كوم
محكوم عليها القصة
من حيث البداية بالفشل
صُحبة أمل أحسن أكيد
من صُحبتين ورد ودموع
مش ناقصة تعاوير ف الضلوع
الخوف حصد كل البنات
وما سابش منهم غير شوية ذكريات
وحاجات تصَعَّب أي رحلة للرجوع
موجوع اوي
ومعادش فاضل م الغرور شيء يخدعك
أنا م الألم
كل امَّا تتكلم دموعي بسْمَعِك
هوه أنا
مكتوب على قلبي الضعيف
كام ألف مرة يودعك
12 فبراير 2015

تحياتي
الى الست اللى شايلاني
وبنتيني
ومولود جاي ف السكة
الى الناس اللي ع الدكة
وف الكواليس
الى السنيد ف دور تاني
الى الفاني ف دور لبَّيس
الى الخلق اللى مش بتبان قصاد كاميرا
ودايما دورها بره الفيلم
الى الناس اللى بتعافر عشان الحلم
الى الناس اللى مش ندمانة ع الماضي
ولا عشمانة ف الآتي
الى الناس اللى بتهاتي
تحياتي .. تحياتي

لما الكلام - الصمت
يبقى خروج عن المألوف
في علاقتنا البرئية
لما الفجاجة والرعونة
يبقوا وشين للحقيقة
لما التوارد في الخواطر
يبقى درب من الجنـون
يبقى انا طول عمري خايب
لما فكرتك حبيبتي
يومها فكرتك هربتي
لما سيبتي
بقية كلامك والدموع
والقلوع
اللى كأن ما صدقت
حدفتني وسط البحر وحدي
لا انا قد موج البحر
ولا قد الرجوع

طب فاكرة حرفين
ميم .. وميم
قلبين وسهم بيترسم
على شجرة الحب القديم
مش مستحيل مفروض علينا
ولا مجد ميت م الألم
عارفة الألم
احساس بوخز هيبتدي
لما ضميرك يتصدم
باللى اتظلم
علشان يجيب حق
اللى من قبله اتظلم
وبرغم من انه اتظلم
ميت وايده متبتة
في ايد العلم

اقولك حاجة
بس بشرط متكشيش
وتاكلي من لجام خوفك
وتبقى الجرأة لقمة عيش

انا نازل اموت فــ هواكي
ويا اصحابك الدراويش
مقاطيع المحبة البكر
وخدام التراب بالفكر
وسنيدة طابور العيش

انا عارفك
يموت الرعب من صوتك
يموتني صدى سكوتك
لكن لما الكلام يبقى على ولادك
أنين الضلمة ما يكفيش
عويل العمر ما يكفيش
سبيني امشي ما تمسكنيش

يزيد الدم .. مهما يزيد
قريب الحلم ولا بعيد
مسير الحق يتلاقى
بلاش الكَلّْ م التفتيش

انا نازل
ما دام الحزن فــ المووايل
ما دام الدم فــ المنديل
ما دام الظلم ويا الضي
فـــ القناديل
طفح كيلي
بخوفك والنبي يا اماه متظلمينيش

ولو بكرة ماهوش احسن من امبارح
ولو حلمي فـ قلب المستحيل طارح
سبيني احلم بان الحلم ..
يستاهل عشانه نعيش
سبيني احلم ولا تبكيش

حارتين كلام
شارع بيقطعهم بقلبه
كل ذنبه
انه بيحب النواصي
لف لفة قلب عاصي
حجته كوبلن ملص
لما سألوه ايه اللى عندك؟
قاللهم كان فيه وخلص

20-01-2012