يجري العرف في هذا الكون

العشق مع الأيام بيقل

و إن العِشرة قوام بتكون

شمس بتحرق ملهاش ضل

انا عارف طبعي كتير شكّاي

لكن يا حبيبتي قوليلي ازاي

عشقك قلبي..

من غير ما يمل

على قد العقل ما بيفكر

كل الأشكال مخلوقة بحد

و انا عقلي من التكرار قرر

ما يعلق نفسه بأيُها حد

الناس بالنسبالي خيالات

ازاي مولاتي يا اجمل ذات

صدقت انك..

موجودة بجد

كل الناس زي الأشياء

بتبور لما الحوجة بتخلص

و انا بزعل بس على استحياء

لما غلاوة الناس تنقص

ف بقيت بكره كل الخلق

لكن بيكي عرفت الفرق

لما انا بحتاجلك..

مش برخص

مش شرط اكون فرحان جدا

انا ضحكي العالي ملوش معنى

و الفرحة ف وشي معاكي بتدن

و محدش فاهم اشمعنى

ميلي على كفي

الضحكة بتدفي

حبيني ما استكفي..

انا قلبي هيسعنا

القدرة على خلق الفكرة

بتكون عقاب .. مش ميزة

لأن الناس بتكون فاكرة

ان انا حل التعويذة

انا اكتر من اكتر غلبان

و اقل اقل من العادي

انا اضعف من اضعف انسان

انا اجحد من اجحد راضي

ايوة حياتي كلها غلطات

لكن مش انتي المقصودة

و اعرفي اني ف  كل الأوقات

بحمد ربنا..

انك فعلا موجودة