.بين النية والتنفيذ
اتعقد الخيط
واتشابه البكر
والدنيا اتملت كراكيب
النور خفت
ثم استحال
وجرى في النهر ماجرى
قدمت خطوة العارف
وخطوة الخايف
وخطوة اللي ماعندوش حاجة يخسرها
ووقت الجد اكتشف معنى الخسران المبين
شجرة جدرها في الحلم
وفرعها في الواقع
وسنة أربع فصولها خريف
سيبت الحياة ماشيه
وفضلت واقف أبص
سيبت الجميلة بتبسم
ومشيت
أتأمل
رغوة هشة
بس مانعه الشوف
زبد مقيم
وكأنه من دمع عيني
ياللي ركبتوا السفينة
البحر أحواله أيه
ياللي ركبتوا السفينة نظرة لورا
ياللي ركبتوا السفينة
الرحلة ولا الوصول
سلام مع الطير
قلبي
معاكوا في المعركة
ولو إنه لا بيقدم ولا يأخر
وان كان بينفع حد
كان نفع صاحبه
لكن أهي نوايا
بينها وبين التنفيذ أهوال
وسؤال
من عمر متعلق
شباك متوارب
لا الشمس دخلت
ولا نشت الضلمة الدبان