، حلوة مو بإيدك

وأنا جشع مو بإيدي،

ناطر الوحي،
وانتي نسيانة تطّلعي فيني،

مفكرتيني ناطر شهاب بالسما،
أو شي غفوة تحت شمس
عم تغرق بالمدى،

بس أنا،
بس أنا ابسط من هيك،
عايش عهوامش الوقت،
غرقان بالفكرة دايما،
مدمن الامل.

أعراض انسحابه بتشبه
انعدام الزمن ما بين شوفاتنا،
كيف الايام بتتلاشى بالترقب
ناطرك لتطلي عحياتي،
لتتقاطع طرقنا بأحاديث ما بترحم جفون
أو مدينة عم تحاول تنام،

مزينّة بعضة شفة،
كل شي ما انقال،

مزينة بمحاولات اخفاء البهجة
وقت تقولي اسمي
ويوقع من شفافك
باتجاهي
الف
فكرة
عن
بكرا.