Tag: Hum kiya samajhtay hain apne aaj ko, aaiye kal sochtay hain.

Translated from the bilingual version, link at the end.

Bismillah ir Rahman ir Rahim

Aaj raat hum pehli dafa 22nd century main saans lani gey. Mauqay ki munasibat se sab jama honge, lekin koi machine istemal karne ki qataan ijazat nahi hogi. Sab hi baray hum bachoon ke samne pichli saadi ki yaadain taza karain ge. Nani ka mujhe pata hai, 2020s ke kisi virus ke baray main guftugu karain gi. Itna suna hai uss waba ke baray main, lekin ghar ki bari hain. Aaj likh loon ga jo bhi batain gi. Mukamal tasweer. Haan dadi ki kahani dekhni hai. Wu tw aam dinoon main bhi aisi dastaan pesh karti hain ke kahani khatam hotay hotay meri duniya badal ke reh jaati hai.

Bas ab Mera koi kinta bhi mazaq uraye, main puranay zamanay ki tarha kaghaz naam ki aik cheez par qalam se likh loon ga, wo sub kuch jo ye dono kahain ge!

Main abhi baitha hi tha ke maloom hua dono kahaniyan aik hi waqt main hongi! Ab meri kher nahi!!! Elahi, baatain samajhne ke qabil rahain.

Dadi ne apnay maqsoos meethay lehje main kaha, “Khamoshi ko sar pe taaj ki tarha sajaye, baghair zuban hilaye aap ko apna banana janta ho, aur dil ko lagnay waali shairi ki tarha logon main phail jaye.”

Nani ki awaz main takleef thi, jab unhoon ne kaha, “Corona Virus ne aa kar kisi ko kuch dekhnay sunnay ke qabil hi nahi chora tha. Jahan dekho dukh, dard, aur mayoosi raaj karte thay.”

Hawa main mithaas mil gayi jab suna, “Dil main ghar bhi karle lekin hamesha ke liye nahi. Aa bhi jaye, lekin chala bhi jaye, dobara uss hi zindagi main jisay…”

Karahat bhari awaz aayi, “takleef jaan na le tw khauf maflooj karde. Maut kab ayegi? Aik sawal nahi azab hai, jo maut se ziyada khaufnaak hota hai.”

“… iss ne aa ke imtehaan ka taj pehnaya tha.”, Dadi ne sukoon se kaha, “Agar aap bardasht na kar paien aur marr jayin tw uss becharay ka kiya qusoor?”

Awaz se phir takleef barsi, “Bekaar, bemaiyni, bemaqsad, aur bila wajah ka mazaq tha wu jo qudrat ne puri duniya ke saath kiya tha. Shukr karo tum uss waqt nahi thay…”

Rahat tapkati thi awaz, jab dadi ne kaha, “Tum log hotay tw dekhtay ke kaisay uss ne aa ke puri duniya ke dhakay chupay aiboon ko benaqab karke sub kuch saaf zahir kardiya tha.”

“Uss daur ki mushkilain paharoon ki tarha theen.” haath ke isaharay aur bhanwoon ke uthnay se mushkil ki ghehrai ka andaza hota tha, jab nani ne kaha “Kuch pata nahi tha ab khabroon main kaun si nayi musibat tootnay wali hai. Loug tw bas mehdood ho ke reh gaye thay har jagah.”

Dadi ne hathoon ko aisay hilaya jaisay kuch pesh kar rahi hoon, aur muskuraytay huay kehne lageen, “…log jaisay phansay huay thay iss khayal main ke unhoon ne iss duniya ko banaya hai apne liye. Uss ne thapar maar ke jagaya unhain…”

Nani apni baat ko aagay barhatay huay kehne lagin, “Zindagi aur maut ke beech main jhooltay huay. Jaan lenay ko aik cheenk bhi kaafi thi. Haath milanay jaisi mamooli aadat bhi…”

Dadi ki taraf dobara tawajoh gayi tw keh rahi theen, “Qudrat humain har roz dikhati hai ke hum uss ke aagay kuch nahi, lekin hum nahi dekhtay. Tum ne kabhi pani ko ubaltay dekha hai bachoon? Kaisay pareshaan ho ke tumhari aankhon aur kanoon ko batata hai ke main takleef main hoon? Kaisay wu bezaban cheekhta hai ke mujhay iss kaifiyat se nikalo? Uss ko pata kuch nahi hota, bas pareshaan hona hota hai. Yehi aazmaish hoti hai aur yehi haal ho gaya tha puri duniya ka.”

Nani ne kaha, “Aam aadmi se le kar kisi bhi sadr e mumlikaat tak, kisi ko kuch nahi pata tha ke karna kiya hai. Kaisay iss waba se jaan churani hai. Karobaaar puri duniya main tabah ho ke reh gaya tha. Sub khatam ho gaya tha, sub barbaad ho gaya tha. Aisay halaat ho gaye thay ke tum sooch bhi nahi saktay. Bas dua karo ke tum sab ko kabhi COVID19 jaisi khoofnaak bala se na guzarna paray.”

Awaz se dadi ki abhi tak sukoon mekhta tha, aur alfaz ye thay, “Baray baroon ki bari bari anaa ne un ko shuru main andha kardiya tha. Aql ki baat kachway phailatay thay aur khauf jungle main aag ki tarha phailta tha. Waba se bari waba, waba ka khauf thi. Kisi ko nahi pata tha wu kis baat se khaufzada hain. Bimari ke naam se? Bimar honay se? Bimari ke la ilaj honay se? Ya maut se? Maut aani ho tw choonti ke katne se bhi aajye. Bimar karne ko pani ya purani roti bhi kaafi. Kis kis cheez se dariye ga aap?… Jab Corona ka raaj tha — “

ME: KIYAAAAA… AIK MINUTE… Dadi, aap itni daer se corona virus ki baat kar rhin hain??? jo 2020s ke shuru main — -

Dadi: Beta, kiya baat hai? Kyun pareshan ho rahay ho?

Me: Aap cheezon ko aisay kis tarha dekh sakti hain? Log uss zamanay ko kis tarha yaad karte hain, aur aap — -

Dadi: Beta aik baat hamesha yaad rakhna, mushkilain pareshaan nahi… bedar karne ke liye aati hain. Agar koi musibat rooh ko jaga de, tw shayad woh naimat ho. Meray bachay, kabhi kisi cheez ko apni raaton ki neendain na uranay dena, lekin khabardar, saari zindagi sotay bhi na rah jana!

Wasi A. Rizvi

6 June 2020

Bilingual Version: https://medium.com/@Wasi.Rizvi/aaj-ka-taaj-the-corona-bilingual-a5c907aa5bc8