هو أنا نفسي أشتغل ويبقى ليا كاريير وسترونج إندبندينت وومان والكلام الجميل ده ^_^
بس الحقيقة أنا بكسل أقدم ع شغل أصلاً 😁
أنا لو لاقيتهم طالبين حاجة أكتر من السي في الجاهزة عندي ولسة هكتبها وأظبطها زي كفر ليتر ووضح خمس أسباب مخلينك عايز تشتغل معانا وليه نختارك من بين المتقدمين؟ والكلام ده بفكس للموضوع أصلاً وأرجع أنتخ في مكاني 🙄
مع إني لو مسكت شغل يعني بعمله كويس وبيطلع زي الفل وبيعجب صحاب الشغل جداً، بس أنا غالباً مشكلتي في الطلعة الأولانية دي، أنا ألاقي نفسي مسحولة في الشغل نفسه هضطر أقوم بيه ع أكمل وجه، لكن سحلة ما قبل الشغل دي بتحبطني 🥱
وغالباً برضه دي مشكلتي في كل حاجة في حياتي
يعني مثلاً كل ما أفكر في موضوع السحلة اللي قبل الجواز وإني عشان اتجوز المفروض ألف ع محلات أختار عفش وجهاز وأفرش البيت والجو ده بلاقي نفسي قفلت من الموضوع أصلاً علينا من ده بإيه ما أحنا قاعدين مرتاحين أهو 😁
كل البنات نفسهم يبقوا أمهات أنا لما أفتكر إن الموضوع في حمل وولادة ومستشفيات وعمليات ورضاعة وسهر وعيل مبينامش وبتاع بفقد الشغف تجاه الموضوع أصلاً 🤣
فتقريباً أنا حلي الوحيد إني أصحى من النوم ألاقي نفسي بشتغل ومتجوزة والعيل في حضني (وياريت يكون متربي بالمرة) واضطر أشيل المسئولية الباقية بقى وأكمل الطريق😁😁
#صفحات_من_حياتي #سارة_الليثي