واحد زهق من الكلام و الهرى فى السياسة بقى , و علشان كده , قررت , إنى أتكلم النهاردة عن الخضار

و خصوصا بعد الزياده الفظيعة ... الفظيعة ... فى محصول الكوسة و الباذنجان فى البلد اليومين دول
هو إحنا خلاص عرفنا قصة الكوسه فمش هنعيدها تانى لأنها عموما واخده الجزء الأكبر من حياتنا (تقريبا بناكلها كل يوم!!) , بس بالنسبة بقى لمحصول البتنجان !!
كلنا عارفين إن البتنجان له نوعين يا أبيض يا أسود و الأبيض غالبا بيحشوه و الإسود غالبا بيحمروه و يعملوا بيه فى الأخر مسقعة , بس إستخدام البتنجان فى الأيام اللى فاتت إختلف كتييييير عن زمان , زى مثلا إنهم حطوه فى السلطة بكل أنواعه !! بس الأغرب و الأغرب بقى إنهم حطوا الكوسة معاه !!
فكان الناتج شنييييع "يعععععع" , المهم إن المزيج "المقرف" ده حاولوا يقنعوا ناس كتير إنهم ياكلوه بس الناس كل أما تبص فى الطبق تقرف و يحسوا إنهم عايزين يرجعوا , و المشكلة الأكبر بقى إن اللى عملوا الوصفة دى مش قادرين يصدقوا إنها وصفة ياكلها "حمار" و مفيش بنى أدم طبيعى ممكن يقدر يبلعها و لا يستطعمها !! و أديهم أهو بدل أما يحاولوا يغيروا وصفتهم و يخلوا الناس تقدر تتقبلها , لسه بيحاولوا يجبروهم على إنهم يتقبلوها زى ما هى و فاكرينها وصفة عالمية و هتدخلهم التاريخ و هى أصلا ملهاش غير مكان واحد بس و هى إنها تتدلق فى "صفيحة الزبالة" !!
و طبعا كل الناس لسه عمالين يحاولوا يقنعوهم بإن وصفتهم دى مش نافعه و محدش هيقدر ياكلها , بس هنقول إيه بقى فى الغباء , يالا ما علينا ...
و دى كانت قصتى النهارده مع الخضار (:
أه الخضار فى حد عنده إعتراض ولا حاجة ؟!!