اللى بيمثل الشارع هو الشعب سيبوكوا من أى عيل بشخة قاعدلى على تويتر عمال يظرط و يقولك يسقط السيسي الخائن و يسقط البرادعى العميل و يسقط عدلي منصور الطرطور.

محدش يهتم برأى النشطاء السياسيين خصوصا نشطاء 25 يناير إللى مقهورين إن تمرد أكلت الجو منهم و كلامى واضح على مين و هما عارفين نفسهم.

مفيش حاجة إسمها ضد العسكر و الإخوان و الميدان التالت و التيار التالت كل دى محاولات إخوانية و خلايا نايمة فى الإخوان أو بمعنى أصح دول عاملين زى طالب الثانوية العامة اللى جاب 50% ومش عارف يكمل علمى ولا يحول أدبى.

مفيش حاجة إسمها مبادرات لا عايزين أبو الفتوح ولا سليم العوا ولا عائلة مكى و لا غيرهم الشعب نزل ثار ع النظام يبقى مفيش مبادرات و مفيش رجوع للوراء.

مفيش حاجة إسمها مصالحة و مفيش حاجة إسمها عدم إقصاء لإننا أقصينا الحزب الوطنى لإنه أفسد الحياه السياسية و لازم نقصى الإخوان لأنهم أفسدوا الحياه السياسية.

مفيش حاجة إسمها تعاطف و أكون حيادى و حقوقى و كلام التخاريف دة إنت بتحارب إرهابى ماسك سلاح يعنى لو مقتلتوش هو حيقتلك، حتستنى لما يموتك علشان تقول الدم كله حرام !! على كدة بقى لو بلطجى جه يقتحم عليا شقتى أسيبة و أقول دمه حرام و معا لحقن الدماء!!

مفيش حاجة إسمها خروج أمن لكوادر الإخوان كلهم حيتحاكموا بتهم القتل و التحريض على القتل و التخابر و الخيانة العظمى وكلها أحكام بالإعدام و لو دة متمش الشعب حيعملهم محاكمات ثورية لإنهم لو متعدموش يبقى كأننا معملناش ثورة و الثورة حتفشل وحيرجعوا تانى يشتغوا فى التنظيم الدولى و كمان كام سنه يكونوا عملوا جيش.

مفيش حاجة إسمها عودة نظام مبارك و الدولة البوليسية و عودة أمن الدولة الكلام دة أبعد حاجة ممكن تحصل و كلام غير عقلانى مفيش حاجة من كدة حتحصل لا مبارك حيرجع و لا أمن الدولة حيقمع ولا الجيش حيحكم.