[image error]  

الشعب المصرى لما نزل يوم 25 يناير 2011 كان بيهتف (عيش - حرية - عدالة أجتماعية - كرامة إنسانية) وكان ليه مطالب بسيطة جدا زى إقالة الحكومة برئاسة أحمد نظيف و إقالة وزير الداخلية حبيب العادلى لأستخدام داخليتة إسلوب القمع والاعتقال والتصفية ودة شوفناه فى أكثر من حاله على سبيل المثال خالد سعيد و الشاب السلفى سيد بلال، واللى نزل الشعب من بيته أسباب كتيرة زى قانون الطوارىء و قسوة معامله الشرطة للشعب وسوء الأوضاع الاقتصادية والاجتماعية والسياسية و زياده معدلات الفقر و تزوير انتخابات مجلس الشعب، يعنى الشعب لما نزل مكانش مطلبة إسقاط مبارك على قد ما كانت الحجات البسيطة اللى طلبها دى مطالبة، ولكن بعد سقوط أول شهيد اتوحد الهتاف لـ الشعب يريد إسقاط النظام، وبعد كدة بدأت مساومات مبارك بتعيين عمر سليمان نائب و تعيين أحمد شفيق رئيس وزراء الا إن مطلب الشعب كان إسقاط مبارك ونظامة لأن الشعب اعتبره فاقد للشرعية بعد سقوط أول شهيد فى السويس

2013 بيتكرر الموقف مره تانية وكأنه بيتعاد بنفس الصورة الشعب المصرى نزل الشارع بيهتف (عيش - حرية - عدالة أجتماعية - كرامه إنسانية) وليه مطالب بسيطة جدا وهى إقالة الحكومة برئاسة هشام قنديل و وقف العمل بالدستور وتكوين تأسيسية عليها توافق وطنى علشان يخرج دستور بيمثل كل الشعب المصرى مش فئة معينة منه و حق الشهداء اللى ماتوا فى ثورة 25 يناير مرورا بجمعة الغضب ثم ال 18 يوم لتنحى مبارك ومن بعدهم شهداء ماسبيروا ومجلس الوزراء ومحمد محمود والعباسية و ستاد بورسعيد و الاتحادية، ولكن كالعادة النظام اتعامل مع المتظاهرين بنفس إسلوب نظام مبارك الداخلية بدأت تتعامل بأسلوب القمع والاعتقال وتصفية النشطاء الاخوان بدأوا يبرروا و يشوهوا المعارضة وشباب الميدان ويعملوا قوائم اغتيالات ثم يغتالوا أدمنز الصفحات المعارضة زى (جيكا - كريستى - الجندى - عمر أحمد) والحسينى أبو ضيف المعروف بمعارضتة للإخوان فبالتالى الشعب وحد الهتاف الى الشعب يريد إسقاط النظام لأنه حلل دم المصريين واستخف بعقولهم فسقطت شرعيتة بسقوط أول شهيد برضو كما سقطت شرعية نظام مبارك

الاخوان بيقولوا دة نظام شرعى منتخب انا معاك انه نظام شرعى منتخب بس اللى أداله الشرعية شعب مصر وشعب مصر دلوقتى بيهتف يسقوطة يعنى الشعب اللى منح الرئيس الشرعية هو هو اللى بيهتف ضد الرئيس لسحب الشرعية فبالتالى النظام دة فاقد للشرعية حتقولى النظام دة منتخب حقولك أوعى تنسى إن مبارك كان منتخب فى 2005 أة كان إنتخاب مزور وسورى لكن كان منتخب برضو وإسقطناه لأن مفيش شرعية لأى رئيس بعد الدم

يا نسقط النظام كما إسقطنا نظام مبارك لانه قتل شعبة يا نخرج نظام مبارك من السجن لأن العدل بيقول ما ينطبق على الكل ينطبق بالضرورة على الجزء.