“اولا، مفيش حاجة اسمها حب، اسمها حاجة، المثل الأهبل اللي أنت كنت بتحكي عليه بتاع الاتنين اللي اتقابلو وارتاحو لبعض وحبوا بعض دا أكبر مثال، ببساطة كدا الحاجة اللي بتحرك الإنسان، يعني الاتنين دول اتقابلوا وكل واحد بحالة نفسية معينة وعقلية معينة، قابلو بعض، ممكن يكونوا بيدوروا على الحب أو بيدوروا على إن حد يفهمهم أو حد يسمعهم من غير مقاطعة، فيتقابلوا يتكلموا، أغلب الأمر كل واحد بيحاول يحصل على إعجاب الآخر فيحاول يكون في أفضل صوره، اللي هي مش حقيقته، بيمثل يعني، أو لو حتى مش كدا و هم على طبيعتهم، كل واحد بيدور على حاجة معينة عند التاني، الحاجة النفسية اللي بتقود، الإعجاب دا معناه إن كل واحد وجد اللي عايزه في التاني، اللي أنت بتسميه الحب دا اللي هو محاولة الاحتفاظ بالميزة اللي بيستمتع بيها عند الآخر، اللي هي لو اختفت بيروح معاها الإعجاب وبتنتهي الحاجة، ويا بتنتهي العلاقة أو زي ما بيحصل في أغلب الحالات في مصر مثلاً، بيسموها العشرة، اللي هي إنك تعيش مع واحد ماتت أي حاجة ما بينك وما بينه سوى إن في علاقة ما بينكم اللي هي الجواز والظروف الاجتماعية بتمنعكم انكم تنفصلوا لحد ما حد بيموت، أو يكون في أولاد ومسئولية برضوا حجة لذيذة، الناس بتروح لدكتور نفساني عشان يعيدوا قوة العلاقة لطبيعتها، اللي هي الناس اللي عايزة تحافظ على جوزها، الدكتور طبعاً مينفعش يكون فاشل، فعشان يحسن العلاقة يعمل ايه ؟؟؟؟ يحاول يخلق حاجة جديدة بينهم وهم بيحاولوا اشباعها يبتدوا يتعاملوا مع بعض تاني، بكدا هما زي الهبل اعتقدوا إن الحب رجع والدكتور نجح وقبض والكل سعيد، لكن الأساس مفيش حاجة اسمها حب، في حاجة نفسية جسدية، عشان المجتمع الأهبل يديها صورة حلوة سماها الحب، ويبيع على حسها حكايات وروايات وقصص والهبل يشتروا والبقالين اللي زي سيادتك يحكوا”