Hamada > Hamada's Quotes

“يأسك وصبرك بين ايديك وانت حر
تيأس ما تيأس الحياة راح تمر
أنا دقت من دة ومن دة وعجبي لقيت
الصبر مر وبرضه اليأس مر

عجبي”
― صلاح جاهين

“لا تجبر الإنسان ولا تخيّره
يكفيه ما فيه من عقل بيحيّره
اللي النهارده بيطلبه ويشتهيه
هو اللي بكره ح يشتهي يغيّره

عجبي!”
― صلاح جاهين, رباعيات صلاح جاهين

“أنا اللي بالأمر المحال اغتوى
شفت القمر نطيت لفوق في الهوا
طلته مطلتوش - إيه أنا يهمني ؟
وليه ما دام بالنشوى قلبي ارتوى

عجبي !!”
― صلاح جاهين

“يوم قلت آه...سمعونى قالوا فسد
ده كان جدع قلبه حديد و اتحسد
رديت على الملايين انا و قلت
لو تعرفوا معنى زئير الاسد

عجبي”
― صلاح جاهين

“ساعات أقوم الصبح قلبى حزين
أطل بره الباب ياخدنى الحنين
اللى لقيته ضاع
واللى اشتريته انباع
واللى قابلته راح وفات الأنين

وارجع واقول
لسه الطيور بتفنّ
والنحلايات بتطنّ
والطفل ضحكه يرنّ
مع ان مش كل البشر فرحانين

حبيبى سكر مر طعم الهوى
فرق ما بيننا البين ماعدناش سوا
حرام عليك يا عذاب
نبقى كده اغراب
ده البعد والله جرح من غير دوا

آدى اللى كان وآدى القدر وآدى المصير
نودع الماضى و حلمه الكبير
نودع الأفراح نودع الأشباح
راح اللى راح ماعدش فاضل كتير

ايه العمل فى الوقت ده يا صديق
غير اننا عندافتراق الطريق
نبص قدامناعلى شمس أحلامنا
نلقاها بتشق السحاب الغميق

وارجع واقول
لسه الطيور بتفنّ
والنحلايات بتطنّ
والطفل ضحكه يرنّ
مع ان مش كل البشر فرحانين”
― صلاح جاهين

“أنا شاب لكن عمري ألف عام
وحيد لكن بين ضلوعي زحام
خايف و لكن خوفي مني أنا
أخرس و لكن قلبي مليان كلام

عجبي !!”
― صلاح جاهين

“ايديا فى جيوبى و قلبى طرب
سارح فى غربة بس مش مغترب
وحدى لكن ونسان و ماشى كده
وبابتعد....ماعرفش....او باقترب
عجبى”
― صلاح جاهين

“عملوا الجنيه
والنص جنيه
دنانير بتخلني ملخوم
وهموت وانا واعرف ليه
اشمعنى الربع جنيه مخروم
دا سؤال مش تافه على فكرة
انا عايز اوصل منه لفكرة
ان محدش فاهم حاجة
ولا كلامى مش مفهوم”
― أحمد عاطف مجاهد, يوميات شاب موكوس

“انا من جيل لسانه تقيل
نص كلامه محدش فاهمة
جيل التحسين والتعديل
والاتنين صعبيين يتفهموا
انا من جيل الشمعدان
جيل فوازير نيلى وشيرهان
انا واحد من ضمن كتير
احلامهم يا دوب يترسمو”
― أحمد عاطف مجاهد, يوميات شاب موكوس