RBCs Book Club discussion

كلما أنهيت كتاب أقف حائرة بعض الوقت قبل أن أختار عدد النجوم التي يستحقها هذا الكتاب.. على أي أساس تعتمدون في تقييم كتبكم؟

بظن لازم ارجع عيد تقييم كتبي من أول وجديد.. في كتير كتب كنت حاططتلها5 نجمات بفوت بلاقي رفقاتي حاطينلها نجمتين مثلاً..
هلأ يمكن هالشي عادي لأنو كل واحد ئلو وجهة نظرو بالكتاب بس انا لاحظت اني بكتبي حاطة 5 نجمات لكتب عادية بينما نجمتين أو تلاتة لكتب استنتجت فيما بعد انها كانت أهم وأحدثت تغيير أكبر بحياتي..


يمكن حدا يقول ليش شو بتفرق؟
مبلى بتفرق كتيييير.. لأنو أصدقاءك قبل ما يقرؤو كتاب بيفوتو بيشوفو رأي بقية الأصدقاء فيه فمشان ما نغشهن لازم نكون منعرف على أي أساس لازم نحط تقييم للكتب



أنتظر آراءكم
:)

أكيد لازم نكون موضوعيين بالتقيم...
بس ما اقتنعت بشغلة نجمة للفائدة و نجمة للمتعة و نجمةلـ...
لأنو كل الكتب فيها فائدة, حتى لو كانت قليلة, بس بالنهاية لا بد تمر معك معلومة مو قارءها من قبل, لك حتى الروايات بتمر معك بعض المعلومات الاجتماعية الجديدة أو بعض العبر أو الحكم أو الجمل الرائعة.... بعرف انو فائدة بتفرق عن فائدة.... بس بالنهاية كلو فائدة!!!
أما بالنسبة للمتعة أنا ممكن اقرأ كتاب استمتع فيه بدرجة كبيرة, و ممكن غيري يقرأه و ما يستمتع فيه و يمل منو بسرعة و ما يكملو.. فهي الشغلة بالذات موضوع مو ثابت و ما في قاعدة يستند عليها الواحد!!!
أنا برأي التقيم بيكون اديش انت ارتحت مع هالكتاب و هل انت كنت ما تصدق ترجع البيت مشان تكملو...
ما بعرف هاد رأي... شو رأيكم؟؟

أنا رأيي متل رأي أحمد
لأنو بالنهاية قد ما كان الكتاب مفيد ، إذا أنت ما حبيته ما رح تقرأه ، وإذا قرأته ما رح تكمله أو ترجعله .

فهالتقييم هو مو تقييم موضوعي ، بس بتقييم واقعي .
أما إذا الواحد بدو يعرف الرأي الموضوعي بالكتاب ، فلازم ترجعي على آراء النقاد والخبراء .

هلق بالنسبة إلي بفكر أول شي بالفكرة اللي طارحها الكاتب وبعدها طريقة العرض اللي اختارها الكاتب وأسلوبو.. بفكر بقلب الموضوع شو النقاط اللي شدتني وشو النقاط اللي نفرتني.. الخاتمة إلها أهمية كمان برأيي من حيث إنها تلخيص في حال كان الكتاب علمي ونهاية إلها خواصها في حال كتاب أدبي..
بدي فكر أنا هالكاتب لأي درجة كان قادر يحدث فيني التغيير.. ولاي درجة عم يشجعني أقرأ كتب تانية إلو وإلى ما هنالك

مثال بسيط.. حيدر حيدر بلشت أقرالو من أكتر من 5 سنين.. لما بلشت معو ببداياتو مليت منو.. بس شوي شوي صرت آخد ع أسلويو وأتطور مع تطورو لحد ما هلق ناطر أقرأ "وليمة لأعشاب البحر" وبظن بعرف النتيجة اللي أنا ناطرها ^_^

أنا تقريبا من عدة سنوات شاركت في بحث مضمونه عن التقييم وكيفية التقييم والنقدالأدبي
المهم.. خلاصة ما أذكر,,
تقييمك .. هل هو تقييم شخصي ؟؟
أم تقييم نقدي ؟؟
التقييم الشخصي يتفق مع ميول الشخص، ومتعته مع الكتاب، وانجذابه لأسلوب الكاتب، ولهفته لصفحات الكتاب وأسطره وحروفه.. وهنا يظهر التفاوت بين الأشخاص في تقييم الكتب، فهذا يرى الكتاب مشوقا لانه وافق ميوله، وذاك يراه متوسطا وهكذا .
أما التقييم النقدي فيتناول التقييم من وجهة نظر أكاديمية علمية،هل حبكة الكاتب ناجحة، هل المعلومات عن الموضوع المطروح كافية،هل أجاد الكاتب في كتابته ودمجه للمعلومات والوقائع .. وغالبا ما يكون التقييم النقدي مبنيا على أسس علمية ونظرية ..
نحن في تقييمنا للكتب غالبا ما نستخدم الأسلوب الأول من التقييم ألا وهو التقييم الشخصي.. وهو الأكثر منطقية بالنسبة لنا كقراء غير متخصصين..ّ
وأعتقد أنه حبذا .. لو دمجنا بين النوعين ، بحيث نطور من قدرتنا على النقد الأدبي إضافة إلى ميولنا الشخصية ..
ودمتم :)

أعتقد أن إذا حاولنا حصر التقييم فسنجد للتقيم والنقد نوعين :

الاول : النقد الموضوعي , وهذا النقد علم بحد ذاته ومهنى عند البعض, له شروط وقواعد وصفات يجب التزامها اثناء النقد ,
و من أهم شروط هذا النوع الحيادية.

النوع الثاني : النقد التأثري , ةهو النقد الذي يأخذ بعين الإعتبار مدى تأثر القارئ بالكتاب وهو النقد الذي يخضع بشكل أساسي لتأثير الانطباعات الأولية السريعة,أو الأهواء الشخصية المتحيزة ,أو المزاج الفردي الخاص ,ولم يخرجه نتيجة تأمل ودراسة مدققة تعتمد على معايير وضوابط متفق عليها. .


واعتقد أن التقييم والخمس نجوم في هذا الموقع بشكل عام هو عبارة عن خليط من نوعي النقد السابقين, مع أفضية نسبية للتقييم التأثري والذي تتراجع نسبته بإزدياد ثقافة وإطلاع المقيم والقارئ على شروط النقد الموضوعي
ولهذا نرى أن عدد النجوم قد تتأرجح من شخص لآخر
.

يبدو أني أدور مع احمد رجب في نفس الفلك وحول نفس الفكرة , ولو قرأت رده لما تعذبت في كتابت ردي ^__^


Yazoo wrote:لدي في مجموعتي القرآن الكريم ، ما الذي تعبر عنه الخمس نجوم في تقييم كتاب الله إن كنت أمنح التقييم ذاته لكتاب آخر من تأليف بشر
2-ولو تداركت نفسي منذ البداية لما منحت أي رواية أجنبية "مثل هاري بوتر وغيرها" خمس نجوم، رغم أنها تكون قد استوفت بنظري كل

أعتقد أن الكتاب الذي يأخذ 5 نجوم مثلاً ليس بالضرورة أن يكون أفضل من الكتاب اللذي يأخذ 4 نجمات ,
حتّى أن الكتب التي تأخذ العدد نفسه من النجوم ليس بالضرورة أن تكون في نفس الدرجة.
فالمقارنة لا تكون صحيحة إلا إذا كانت ضمن نفس المجال
فكتب الادب أقارنها وأقيمها بالنسبة لكتب الادب والكتب الطبية بالنسبة لكتب الطب فمثلاً
:
عندما أقرأ مسرحية لتوفيق الحكيم قد أقارنها بالنسبة لمسرحية أخرى لشكسبير وأقيمها على هذا الأساس. ,
وعندما أقرأ مثلاً مرجع غايتون قد اقارنه مثلاُ بمرجع فوكس وأقيمه على هذا الأساس.

لكن هل تصح المقارنة بين غايتون ومسرحية شكسبير مثلاً حتى إن آخذ الكتابين 5 نجمات ..؟؟

ومن هنا نجد أن القرآن كتاب لا يقارن بأي كتاب آخر وحتّى إن تشارك مع كتاب آخر بالخمس نجوم

شكراً دانيةعلى الطرح والشكر للجميع في هذا النقاش الممتع والمفيد ^__^

ليش عم تعقدوا الأمور؟
لو كان كل الناس بدها تقييم بشكل "موضوعي"، شو كنت استفدت من تقييم عدة أصدقاء لكتاب واحد؟ مادام موضوعي وعلمي، ح يكون الكل مقيمه بنفس عدد النجمات
يعجبني انو كل واحد بيقيمه بطريقة شخصية... لأني بعرف كل رفيق بشكل عام شو بيحب، وبالتالي بيعطيني معلومات اكتر عن الكتاب من تقييم موضوعي

بس من المهم جداً انو يرافق التقييم
review
هاد الأمر جداً جداً مهم، برأيي أهم من التقييم نفسه، لأنه ممكن منها اني حط تقييم مبدأي للكتاب قبل قراءته، وقرر اذا بدي اقرأه او لا، تقييم مختلف عن تقييم صديقي كونه توجد اختلافات بيني وبين هذا الصديق

----

طبعاً بالنسبة للشخص الواحد، بدو يكون عنده طريقة تقييم خاصة، بس ما بعرف كيف

تصنيف النجوم برأيي تصنيف بحت, لأنو حسب رأي الموقع نفسه
نجمة يعني didn't like it
نجمتين يعني OK
3 نجمات يعني Liked it
4 نجمات يعني Really liked it
5 نجمات يعني it was amazing

و التقييم الحقيقي متل ما قال أنس, هو ال
review

تمام.. كأنو الكل متفق على فكرة انو التقييم لازم يكون شخصي وليس نقدي

يعني مو لحدد فقط اذا كان هالكتاب ناجح أو لأ مفيد أو لأ وانما لحدد اديش انا ارتحت للكتاب لهيك ممكن لاقي رفقاتي حاطين 5نجمات لكتاب معين بس انا مايعجبني كتير، وال
review
اللي منكتبو على كل كتاب هو صاحب الدور الأهم بتوجيه العالم التانيين لطبيعة الكتاب ومحتواه.. أكتر من التقييم بالنجوم

__________________________

بتوقع هيك حسمنا قصة التقييم:)
و الشكرا الجزيل لكم جميعاً على ما قدمتوه من آراء.