Mai

“تاريخ جديد
اصحى يا نايم

وحد الدايم

وقول نويت

بكره ان حييت

الشهر صايم

والفجر قايم

اصحى يا نايم

وحد الرزاق

رمضان كريم



مسحراتي

منقراتي

وأنا قلبي راضي

أنا قلبي رايق

أنا قلبي طايق

سبع طرايق

علي الوريد

الأوله دي

عيون ولادي

صبح ميلادي

بتاريخ جديد

والتانيه ساير

تحت المناير

رمضان يناير

طالع سعيد

والتالته عيني

علي البريد

بينك وبيني

سكه حديد

والرابعه داخ اللي

قلبه داخل لي

يبقي داخلي

بالأكيد

والخامسة أمسى

فارش في شمسى

أنا اللى همسى

صبح نشيد

والساتته يومي

جميل فى قومى

أنا اللى صومي

وصلاتى عيد

والسابعه بشرى

من قبل بكره

علي كل أكره

يبقى لي إيد

عصر العجايب

جايب ماجايب

جايب ما جاب لى



المشي طاب لي والدق على طبلي

ناس كانوا قبلي قالوا في الامثال

الرجل تدب مطرح ماتحب

وانا صنعتي مسحراتي في البلد جوال

حبيت ودبيت كما العاشق ليالي طوال

وكل شبر وحته من بلدي حته من كبدي حته من موال



يا ليلى يا عين أنا حالف ما اغمض عين

دا أنا إن شقيت قلت آه ريحت قلت آهين

صبح الشقارين

لعيون تزامل قمر كامل يؤانسها

وعيون كما العيله دايره بفوانيسها

وعيون تقول أنا حاهدي الفجر موالى

ولا حد يسهر ليالي وفي الأوان يسهى



اصحى يانايم وحد الدايم

السعي للصوم خير من النوم

دي ليالي سمحه نجومها سبحه

اصحى يانايم يانايم اصحى

وحد الرزاق”
― فؤاد حداد, المسحراتي

“و أنا فى الحقيقة ماليش فى الوصف كتير..أنا باحب و باكره”
― فؤاد حداد, على الطريق الرمضاني: المسحراتي، الشرط نور، طيوف الجنة والكوثر

“الكتمه ولت
والنور حَضَنِّى
كان حق واجب
من غير تجنّى
كل الكواكب
تشهد لفنّى
يا اهل السنيّه
والأستفندى
الفن صادق
والأصل أصدق
والإنسانيه
والحب مبدأ”
― فؤاد حداد, المسحراتي

“رمضان يا شهر الصيام شهر الكرم دايماً
من قبل ما أطالعك كان طالعك أيمن
أنا الذي هام في حب الذي هيمن
سجدت لله ولفيت البلد ودعيت
لا أوحش الله منك المسلمين أبداً”
― فؤاد حداد, المسحراتي