Ahmed Saad

“امنعوا الصوت المريب ده يغني تاني للوطن

اللي بينافق الحكومة من خلال زيف القضية

اللي بينافق الحكومة باتفاقه المفتعل

زي ما بنزع ملامحه...انزعه

أنا مش طايق اسمعه.. صوته لعين”
― عبد الرحمن الأبنودي, الاستعمار العربي

“إكتم أنينك وغطي الأمه بتيابها
أمه بتقتل صديقها وتحمي كدابها
حنت لجزم الغريب تاني علي ترابها
الأمه لـما يكون مالهاش كبير ياناس
تنتظروا مين عالذنوب تاني يحاسبها
آدي الألم في الفؤاد سهران بيعصر عصر
أنا مجرم القرن ده ولا شهيد العصر”
― عبد الرحمن الأبنودي, الاستعمار العربي

“إذا مش نازلين للناس ف بلاش 
والزم بيتك..
بيتك.. بيتك
وابلع صوتك
وافتكر اليوم ده
لإنه تاريخ موتى..
وموتك.
إذا مش نازلين للناس
فَ بلاش
مادام الدايرة ماكاملاش
والحاجة ماتاماش
وأصحاب الحاجة ماعارفاش
إيه المعني
وأى بطولة
ف إن حياتنا
واحلا سنينَّا
يروحوا بلاش؟
حاجة ماراكباش!!
***
الله يخرب بيت الفكر
وبيت اليوم
اللى ورانا الفكر
لإن الفكر كتاب
و(عويضة)
حياته هباب وتراب.
عايش زمنه الكداب
زى العادة ـ مرتاب!!
كنكة على دِمْس
ونفَس
مقطوع فى الغاب
ماشبعناش عنه بُعد
وهوه
ماشبعش غياب!!
***
(عويضة)
هنا.. ك فى الأرض
فى المدن الأُوَض
اللى نايمة على بعض!!
***
وأقولك
إيه اللى قطع الدايرة يا أمير
وخلى مابين النبى والخلْق
الغربة.. وتقطيع المشاوير؟
إن انا وانت
بنلعب طول العمر دورين:
طليعة وجماهير.
و(عويضة)
بينفخ موت الدِّمس
والعالم..
نِمْس.
العالم..
سرقة وقلْع ولبس
و(عويضة) بقلبه الجبس
اللى معلِّمُه..
إمتى مايحسش
وامتى يحسّ..
بيعدِّى فى الأيام
جمل المراحيل.
زى ما عدَّاها
من أول ما اتخرط الكون
من أول ما طلع للدنيا
ووجد قبلُه..
فرعون!!
***
نفس الأيام
نفس النسخة
مطبوعة
على كل الأعوام.
ماسمعشى بين
ماسمعناش.
ماقابلناش.
ما اتكلمناش.
***
ولإن حمول الأيام
مش مرفوعة
إذا يد (عويضة)
ماترفعهاش.
والقولة الحقَّة
مش حقّة
إذا صدر (عويضة)..
ماطلَّعهاش
والخطوة..
حتفضل مشلولة
إذا قُدّامنا (عويضة) ماخطَّاش.
ولإن دى حاجة
(عويضة)
لسّه مايدركهاش
ولايدركناش
ولا يعرفناش
ولإننا..
لما دبحنا بعض
ـ مناقشة ـ
على القهوة
ـ لاجل البشرية ـ
(عويضة) ماسمعناش
تبقى الدايرة
مادايراش!!
واما ييجى المخبر
يسحبنا ع الزنازين
لازم نبقى عارفين
إن السَّحبة ببلاش
وان الحدوتة
مالافَّاش
ف الدايرة ماتامَّاش
والدنيا.. ماحِلْواش
وان (عويضة)
لما قِبل الظلم ماماتْش
إحنا مُتنا..
وهوه.. عاش!!
***
الحاجز..
أكبر من كل الأحلام
واسْمَك..
من جهلى وجهلك..
واسمى..
واسمك!!
***
مش حتعلمنى أكتر ما اتعلمت
روح
علِّم أبو الواد والبت
اللى حيرميهم
فى فرن الثورة
يطيبوا بُكرة
واللى لحد الوقت
مايعرفشى إزاى يكتب
وازاى يقرا.
وازاى يعشق..
وازاى يكره.
ولا عنده فكرة
عنك.. أو عن بكرة
ولا ليك ذكري
لانا.. ولا إنت..
نجحنا ف تغيير الفكرة!!
***
الفاس يردم بذرة
المنجل يحصد سبلة
الشغل يجيب أجرة
وانت بعى….ـد
بحكاية
مامفهوماش!!
بينَّنا وبينُه شعْرة
وأرقّ من الشعرة
ده اللى مفروض
ناسج علم الثورة
وصانع بكرة
واحنا شهدا..
مع إننا.. ماحاولناش.
حاجة..
ماراكْباش!!
#الابنودى #الدايرة_المقطوعة ”
― Abdel Rahman Dl Abnoudy