1 rating (5.00 avg)
1 review

DrMohan Talakalukoppa

Add friend

DrMohan’s Bookshelves

to-read‎ (0)

currently-reading‎ (1)

read‎ (0)

Stats | More…

DrMohan is Currently Reading

DrMohan Talakalukoppa is currently reading

ಚೆನ್ನಭೈರಾದೇವಿ : ಕರಿಮೆಣಸಿನ ರಾಣಿಯ ಅಕಳಂಕ ಚರಿತೆ | Chennabhyradevi

by ಗಜಾನನ ಶರ್ಮ | Gajanana Sharma

bookshelves: currently-reading

Reading for the 2nd time

read in May 2021

Rate this book

Clear rating

1 of 5 stars 2 of 5 stars 3 of 5 stars 4 of 5 stars 5 of 5 stars

DrMohan Talakalukoppa said: " ಧೀಮಂತ ರಾಣಿಯ ಚೇತೋಹಾರಿ ಕಥನ
-ಡಾ. ಮೋಹನ್ ತಲಕಾಲುಕೊಪ್ಪ
ಇದು ಕಾಳುಮೆಣಸಿನ ರಾಣಿಯಂದೇ ಪ್ರಖ್ಯಾತಿ ಗಳಿಸಿದ್ದ ಚೆನ್ನಭೈರಾದೇವಿಯ ಕಥನ. ಹದಿನಾರನೇ ಶತಮಾನದಲ್ಲಿ ಕರಾವಳಿಯ ಕುಂದಾಪುರದ ತ್ರಾಸಿಯಿಂದ ಕಾರವಾರ ಸಮೀಪದ ಚಿತ್ತಾಕುಲದವರೆಗೆ, ಶರಾವತಿ ನದಿ ಕಣಿವೆ ಭಾಗಗಳ ಜೊತೆಗೆ ಸಾಗರ ತಾಲೂಕಿನ ಆವಿನಹಳ್ಳಿಯವರೆಗೂ ವಿಸ ಧೀಮಂತ ರಾಣಿಯ ಚೇತೋಹಾರಿ ಕಥನ
-ಡಾ. ಮೋಹನ್ ತಲಕಾಲುಕೊಪ್ಪ
ಇದು ಕಾಳುಮೆಣಸಿನ ರಾಣಿಯಂದೇ ಪ್ರಖ್ಯಾತಿ ಗಳಿಸಿದ್ದ ಚೆನ್ನಭೈರಾದೇವಿಯ ಕಥನ. ಹದಿನಾರನೇ ಶತಮಾನದಲ್ಲಿ ಕರಾವಳಿಯ ಕುಂದಾಪುರದ ತ್ರಾಸಿಯಿಂದ ಕಾರವಾರ ಸಮೀಪದ ಚಿತ್ತಾಕುಲದವರೆಗೆ, ಶರಾವತಿ ನದಿ ಕಣಿವೆ ಭಾಗಗಳ ಜೊತೆಗೆ ಸಾಗರ ತಾಲೂಕಿನ ಆವಿನಹಳ್ಳಿಯವರೆಗೂ ವಿಸ್ತರಿಸಿದ್ದ ಅನನ್ಯ ಸಾಮ್ರಾಜ್ಯದ ಅದ್ಭುತ ಕಥೆ.
ಮುನ್ನುಗ್ಗಿ ಬಂದ ಪೋರ್ಚುಗೀಸರನ್ನು ಶೌರ್ಯದಿಂದ ಹಿಮ್ಮೆಟ್ಟಿಸಿ ಗೋವೆಗೆ ಸೀಮಿತವಾಗುವಂತೆ ಮಾಡಿದ, ಬಿಳಗಿ, ಬಿಜಾಪುರ, ಕಾರ್ಕಳ, ಬಸ್ರೂರು, ಕಲ್ಲಿಕೋಟೆ ಮುಂತಾದ ಪ್ರದೇಶದ ಅರಸರೊಂದಿಗೆ ಸೌಹಾರ್ದಯುತ ಸಂಬಂಧ ಇರಿಸಿಕೊಂಡು ನಗಿರೆಯ ಶ್ರೀಮಂತ ರಾಜ್ಯ ಕಟ್ಟಿದ ರಾಣಿಯ ಚರಿತೆ, ಇನ್ನಿತರ ಸಾಂಬಾರ ಪದಾರ್ಥಗಳೊಟ್ಟಿಗೆ ವಿಶೇಷವಾಗಿ ಕಾಳುಮೆಣಸಿನ ಕೃಷಿ ಹಾಗೂ ನಿರ್ಯಾತಕ್ಕೆ ಅಭೂತಪೂರ್ವ ಉತ್ತೇಜನ ನೀಡಿದ ವ್ಯವಹಾರ ಕುಶಲಿಯ ಕಥೆ. ಚಾಣಾಕ್ಷ ಆಡಳಿತದ ಮೂಲಕ ಬರೋಬ್ಬರಿ 54 ವರ್ಷ ಯಶಸ್ವಿಯಾಗಿ ರಾಜ್ಯಭಾರ ಮಾಡಿದ, ರಾಣಿಯಂತೆ ಮೆರೆಯದೆ ಸರ್ವ ಜನಾನುರಾಗಿಯಾಗಿ ಸರಳತೆ ಮೆರೆದ ಹೆಣ್ಣೊಬ್ಬಳ ಸಾಹಸಗಾಥೆ. ಎಲ್ಲಕ್ಕೂ ಮಿಗಿಲಾಗಿ ನಾನು ಬೆಳೆದ ಪರಿಸರದ (ಸಾಗರ ತಾಲೂಕಿನ ಹಿರೇಮನೆ ಗ್ರಾಮ; ಶರಾವತಿ ನದಿಗೆ ಕಟ್ಟಿದ ಲಿಂಗನಮಕ್ಕಿ ಡ್ಯಾಮ್ ಸಮೀಪ) ವೈಭವೋಪೇತವಾಗಿ ಮೆರೆದ ಸಂಸ್ಥಾನದ ಐತಿಹ್ಯ ಎಂಬ ಹಿನ್ನೆಲೆಯಲ್ಲಿ ವಿಶೇಷ ಆಸಕ್ತಿ ಹುಟ್ಟಿಸಿದ ಕಥನ.
ಮೊದಲ ಬಾರಿಗೆ ಚೆನ್ನಭೈರಾದೇವಿಯ ಕಾನೂರು ಕೋಟೆಯ ಬಗ್ಗೆ ಪ್ರಜಾವಾಣಿಯ ಸಾಪ್ತಾಹಿಕ ಪುರವಣಿಯಲ್ಲೋ ಅಥವಾ ಸುಧಾದಲ್ಲೋ ಬಹಳ ಹಿಂದೆ ಓದಿದ ಅಸ್ಪಷ್ಟ ನೆನಪು. ನನ್ನ ಗುರುಗಳಾದ ಡಾ. ಕೆ. ಎನ್. ಗಣೇಶಯ್ಯನವರು ಸಮಕಾಲೀನ ವ್ಯಕ್ತಿಗಳ ಮೂಲಕ ರೂಪಿಸಿರುವ ಚಾರಿತ್ರಿಕ ಥ್ರಿಲ್ಲರ್ ‘ಬಳ್ಳಿಕಾಳ ಬೆಳ್ಳಿ’ ಎಂಬ ಕಾದಂಬರಿಯಲ್ಲಿ ರಾಣಿಯ ವಿವರಗಳಿವೆ ಎಂದು ಕೇಳಿದ್ದೆ (ಅದನ್ನು ನಾನು ಓದಿಲ್ಲ). ಇತ್ತೀಚೆಗೆ ಕನ್ನಡದಲ್ಲಿ ಬಂದ ಐತಿಹಾಸಿಕ ಕಾದಂಬರಿಗಳು – ವಸುಧೇಂದ್ರರ ತೇಜೋ ತುಂಗಭದ್ರಾ, ಅರುಣ್ ಪ್ರಸಾದರ ಬೆಸ್ತರರಾಣಿ ಚಂಪಕಾ- ರೀತಿಯ ಇತಿಹಾಸವನ್ನು ಪುನರ್ರಚಿಸುವ ನಿಟ್ಟಿನಲ್ಲಿ ಮೂಡಿದ ಮಹತ್ವದ ಕಾದಂಬರಿ ಇದು. ಪಾಶ್ಚಾತ್ಯ ಇತಿಹಾಸಕಾರರ ಅಪಕಲ್ಪನೆಯಿಂದ ಹುಟ್ಟಿದ ‘ಅನೈತಿಕ ಸಂಬಂಧದ ಸುಳಿಯಲ್ಲಿ ಸಿಲುಕಿ ಅವನತಿ ಹೊಂದಿದ ರಾಣಿ” ಎಂಬ ಕಳಂಕವನ್ನು ಸೋದಾಹರಣವಾಗಿ ಅಲ್ಲಗಳೆಯುವ ವಿವರಗಳನ್ನು ಇಲ್ಲಿನ ‘ಲೇಖಕರ ಮಾತು’ ತೆರೆದಿಟ್ಟಿದೆ.
ಕಾದಂಬರಿಯಲ್ಲಿ ರಾಣಿಯ ಧೈರ್ಯ, ಸ್ಥೈರ್ಯ, ರಾಜಕೀಯ ಪ್ರಜ್ಞೆ, ನೀತಿ-ನಿರ್ಧಾರಗಳ ಜೊತೆಗೆ ಶಬಲೆಯ ಬೇಹುಗಾರಿಕೆ, ಜಿನದತ್ತನ ದುರಂತಮಯ ಬದುಕು, ಸತ್ರಾಜಿತನ ಬುದ್ಧಿವಂತಿಕೆ, ಸಭಾಹಿತರ ನಿರ್ಣಯ ಶಕ್ತಿ - ಹೀಗೆ ಎಲ್ಲ ಪಾತ್ರ ಚಿತ್ರಣ ಮನೋಹರವಾಗಿ ಮೂಡಿಬಂದಿವೆ. ರಾಣಿಯ ಮೇಲಿನ ದ್ವೇಷದಿಂದ ಅವಳ ಮಾವ ಕೃಷ್ಣದೇವರಸ ಹಬ್ಬಿಸುವ ರಾಣಿ ಮತ್ತು ಅವಳ ಅಂಗರಕ್ಷಕ ಚೆನ್ನಗೊಂಡನ ಅನೈತಿಕ ಸಂಬಂಧದ ಕಟ್ಟುಕತೆಯನ್ನು ಪ್ರಧಾನಿ ಸಭಾಹಿತರು ಮತ್ತು ರಾಣಿ ನಿರ್ವಹಿಸಿದ ಬಗೆ ಚೆನ್ನಾಗಿ ರೂಪಿತ. ಪೋರ್ಚುಗೀಸರನ್ನು ಯುದ್ಧದಲ್ಲಿ ಗೆದ್ದು ಮರಳಿ ಬರುವ ಹೊತ್ತಿಗೆ ಕಪಟದಿಂದ ದಾಳಿ ಮಾಡಿದ ಕೆಳದಿಯ ಸೈನ್ಯವನ್ನು ಕತ್ಲೆಕಾನಿನ ದಟ್ಟ ಅಡವಿಯಲ್ಲಿ ನಾನಾ ಉಪಾಯಗಳಿಂದ ಸೋಲಿಸಿದ ವಿವರಗಳು ಕುತೂಹಲಕಾರಿ. ಆ ಕಾಲದಲ್ಲಿ ರಾಜದ್ರೋಹ/ಅಪರಾಧ ಎಸಗಿದವರನ್ನು ಬಾಯಿಬಿಡಿಸಲು ಬಳಸುತ್ತಿದ್ದ ವಿವಿಧ ಕ್ರಮಗಳು ಆಶ್ಚರ್ಯ ತರಿಸುತ್ತವೆ. ರಾಣಿಯ ಗುರುಗಳಾದ ವರ್ಧಮಾನ ಸಿದ್ಧಾಂತಿಗಳ ಪತ್ನಿ ನಾಗಬ್ಬೆ ಜೀವತ್ಯಾಗ ಮಾಡುವುದಕ್ಕಾಗಿ ಅನುಸರಿಸುವ, ಜೈನಧರ್ಮಕ್ಕೇ ವಿಶಿಷ್ಟವಾದ ‘ಸಲ್ಲೇಖನ ವ್ರತ’ದ ವಿವರಗಳು ಗಮನ ಸೆಳೆಯುತ್ತವೆ.
ಪೋರ್ಚುಗೀಸರ ಕ್ರೌರ್ಯ, ದೌರ್ಜನ್ಯ, ಮತಾಂತರಗಳ ಬಗ್ಗೆ ಕನ್ನಡದ ಓದುಗರಿಗೆ ಸ್ವಪ್ನಸಾರಸ್ವತ, ತೇಜೋತುಂಗಭದ್ರಾ ಮುಂತಾದ ಕಾದಂಬರಿಗಳ ಮೂಲಕ ಈಗಾಗಲೇ ಅಲ್ಪಸ್ವಲ್ಪ ಗೊತ್ತಾಗಿದೆ. ಈ ಕಾದಂಬರಿಯಲ್ಲೂ ಅದರ ಮಾಹಿತಿ ಹಾಗೂ ಮತಾಂತರದ ಪ್ರಕ್ರಿಯೆಯನ್ನು ರಾಣಿ ತನ್ನ ರಾಜ್ಯದಲ್ಲಿ ತಡೆಯಲು ಮಾಡಿದ ಪ್ರಯತ್ನಗಳು, ಜೊತೆಗೆ ಪೋರ್ಚುಗೀಸರ ಕಾಟವನ್ನು ತಾಳಲಾರದೆ ಗೋವೆ ಬಿಟ್ಟು ಬಂದ ಸಾರಸ್ವತ ಸಮುದಾಯಕ್ಕೆ ಆಶ್ರಯ ಕೊಟ್ಟ ವಿವರ ಲಭ್ಯ. ಜೈನಧರ್ಮಕ್ಕೆ ಸೇರಿದ ರಾಣಿಯ ಪಟ್ಟಾಭಿಷೇಕವಾಗುವಾಗ ವೈದಿಕ–ಜೈನಧರ್ಮದ ಎರಡೂ ಸಂಪ್ರದಾಯಗಳನ್ನು ಅನುಸರಿಸುವುದು ಆಶ್ಚರ್ಯವೇ. ಪಟ್ಟಾಭಿಷೇಕದ ತಯಾರಿ ಹಾಗೂ ಅದರ ವಿವರಗಳು ಅನ್ಯಾದೃಶ. ರಾಜರಿಲ್ಲದ ಈ ಕಾಲದಲ್ಲಿ ನಮ್ಮ ಪೀಳಿಗೆಗೆ ಆ ಕಲ್ಪನೆಯೇ ಇರುವುದಿಲ್ಲ!
ಮುಖಪುಟ ಅತ್ಯಾಕರ್ಷಕ. ನಿರೂಪಣೆ ಲಾಲಿತ್ಯಮಯ. ಲೇಖಕರ ಭಾಷಾ ಫ್ರೌಢಿಮೆ ಹಾಗೂ ಕುಸುರಿ ಕೆಲಸ ಮನಸೆಳೆಯುತ್ತದೆ. ಅವರ ವ್ಯಕ್ತಿತ್ವದ ಲವಲವಿಕೆ ಕಾದಂಬರಿಯಲ್ಲಿ ಪ್ರತಿಫಲನ. ತರ್ಕಬದ್ಧ. ಎಲ್ಲೂ ಮಿತಿಮೀರದ ಸಂಯಮ. ಸಾಕಷ್ಟು ಅಧ್ಯಯನ ಮಾಡಿ ಸಮಚಿತ್ತದಲ್ಲಿ ರಚಿಸಿದ ಕಾದಂಬರಿ. ಇದೊಂದು ಮಾದರಿ ಕೆಲಸ. ಇಂಥಾ ಸಶಕ್ತ ಬರಹಗಾರರನ್ನು ನಾನು ಈವರೆಗೆ ಓದದೇ ಯಾಕೆ ತಪ್ಪಿಸಿಕೊಂಡೆ ಎಂಬುದು ಗೊತ್ತಾಗುತ್ತಿಲ್ಲ. ಡಾ. ಶರ್ಮರ ಅಭಿಜಾತ ಪ್ರತಿಭೆ ವಿವರವನ್ನು ಕಟ್ಟಿಕೊಡುವುದರಲ್ಲಿ ಹಾಗೂ ಪಾತ್ರಗಳ ಸಂವಾದದಲ್ಲಿ ಅನಾವರಣ. ವಿವಿಧ ವ್ಯಕ್ತಿಗಳ ಅಂತರಂಗದ ತುಮುಲ, ಭಾವನೆಗಳ ತಾಕಲಾಟ ಹಾಗೂ ಇನ್ನಿತರ ವಿವರಗಳ ಸೊಗಸಾದ ನಿರ್ವಹಣೆ ಇಲ್ಲಿದೆ.
ರಾಣಿಯ ಸಾಮ್ರಾಜ್ಯವಿದ್ದ ಶರಾವತಿ ಕಣಿವೆ ಭಾಗದವರಾದ ಡಾ. ಶರ್ಮರ ಆಳವಾದ ಪ್ರಾದೇಶಿಕ ಅಧ್ಯಯನ ಈ ಕಾದಂಬರಿಗೆ ಅಧಿಕೃತತೆ ಒದಗಿಸಿದೆ. ಈ ರೀತಿಯ ಕಾದಂಬರಿಗಳ ಮೂಲಕ ವಾಸ್ತವತೆಗೆ ಹತ್ತಿರವಾದ ಇತಿಹಾಸವನ್ನು ತಿಳಿಯುವುದು ಮನೋರಂಜನೆಯ ಜೊತೆಗೆ ಮಾಹಿತಿಯನ್ನು ಅರಗಿಸಿಕೊಳ್ಳುವ ಪ್ರಕ್ರಿಯೆ. ಇಲ್ಲಿ ಚಿತ್ರಿತವಾದ ಐತಿಹಾಸಿಕ ವ್ಯಕ್ತಿ/ಅಂಶಗಳು ಭಾರತದ ಪ್ರತಿಯೊಂದು ಪ್ರಾಂತ್ಯದಲ್ಲಿಯೂ ಇರಬಹುದು. ಅವುಗಳನ್ನು ಈ ರೀತಿ ನಮ್ಮ ಅಧ್ಯಯನಕಾರರೇ ಕೂಲಂಕಷವಾಗಿ ಅಭ್ಯಸಿಸಿ ಇತಿಹಾಸವನ್ನು ಪ್ರಾಮಾಣಿಕವಾಗಿ ಪುನರ್ರಚನೆ ಮಾಡುವುದು ಯುವಪೀಳಿಗೆಗೆ ಆಸಕ್ತಿದಾಯಕ ಮಾಹಿತಿಯ ಆಕರ. ಇಲ್ಲದಿದ್ದರೆ ಈ ರಾಣಿಯ ವಿಚಾರದಲ್ಲಿ ಈವರೆಗೆ ಆದಂತೆ ಪಾಶ್ಚಾತ್ಯರ ತಿರುಚಿದ ಬರವಣಿಗೆ ಹಾಗೂ ವ್ಯಕ್ತಿತ್ವ ಹನನದ ಇತಿಹಾಸವನ್ನೇ ಓದಬೇಕಾದೀತು.
ರಾಣಿ ಕಟ್ಟಿಸಿದ ಚತುರ್ಮುಖ ಬಸದಿ, ಕೋಟೆ-ಕೊತ್ತಲಗಳು ಹಾಗೂ ಆ ಪ್ರದೇಶದಲ್ಲಿ ಇವತ್ತಿಗೂ ಇರುವ ಚೆನ್ನಾಭೈರಾದೇವಿ ಹಾಗೂ ಕಾತ್ಯಾಯಿನಿ ಮೊದಲಾದ ದೇಗುಲಗಳ ಫೋಟೋ ಇದ್ದಿದ್ದರೆ ಓದುಗರಿಗೆ ಆ ಕಾಲದ ಕಥೆಯನ್ನು ಕಲ್ಪಿಸಿಕೊಳ್ಳಲು ಇನ್ನಷ್ಟು ಸುಲಭವಾಗುತ್ತಿತ್ತು. ಕಾದಂಬರಿಗೊಂದು ವಿಶಿಷ್ಟ ಮೋಹಕತೆ ಪ್ರಾಪ್ತವಾಗುತ್ತಿತ್ತು. ನನ್ನ ದೃಷ್ಟಿಯಲ್ಲಿ ಕಥನದ ಮೂಲಕ ನೈಜ ಇತಿಹಾಸವನ್ನು ಅರಿಯುವುದರ ಜೊತೆಗೆ ಇಂತಹ ಕಾದಂಬರಿಗಳಲ್ಲಿ ಪ್ರಸ್ತುತ ದಿನಮಾನಕ್ಕೆ ಬೇಕಾದ ಉಪಯುಕ್ತ ಅಂಶಗಳಿದ್ದರೆ ಅನುಕೂಲ. ಹಾಗಂತ ಇದು ಕಡ್ಡಾಯವಲ್ಲ. ಈ ನಿಟ್ಟಿನಲ್ಲೂ ಈ ಪುಸ್ತಕ ಕುತೂಹಲಕಾರಿ. ರಾಜಪೀಠಕ್ಕೆ ಯಾವತ್ತೂ ಇರಬೇಕಾದ ಪ್ರಜಾಹಿತದ ದೃಷ್ಟಿಯ ಜೊತೆಗೆ ಕಾದಂಬರಿಯಲ್ಲಿ ನಗಿರೆ ಸಾಮ್ರಾಜ್ಯದ ಕಾಡುಗಳಲ್ಲಿ ಲಭ್ಯವಿದ್ದ ಹದಿನಾರು ಕಾಳು ಮೆಣಸಿನ ತಳಿಗಳ ಬಗ್ಗೆ ಪ್ರಸ್ತಾಪ ಬರುತ್ತದೆ. ಚೌಕಟ್ಟಿನಿಂದ ಸ್ವಲ್ಪ ಹೊರಹೋದರೂ ಆ ತಳಿಗಳ ಬಗ್ಗೆ ಒಂದಷ್ಟು ಮಾಹಿತಿ ಇದ್ದಿದ್ದರೆ ನನ್ನಂತಹ ಸಸ್ಯ/ಕೃಷಿ ವಿಜ್ಞಾನಿಗೆ ಅನುಕೂಲವಾಗುತ್ತಿತ್ತು ಎನ್ನುವುದು ನನ್ನ ಸ್ವಾರ್ಥ!
ಸಾಮ್ರಾಜ್ಯ ಮೆರೆದ ಪ್ರದೇಶದಲ್ಲಿದ್ದ (ಇವತ್ತಿಗೂ ಇರಬಹುದಾದ) ದಟ್ಟ ಕಾಡಿನ/ಮರಗಳ ವೈವಿಧ್ಯ ಕುತೂಹಲಕಾರಿ. ಗೇರುಸೊಪ್ಪೆಗೆ ಅಲ್ಲಿ ಹೇರಳವಾಗಿ ಬೆಳೆಯುವ ಗುಡ್ಡೆಗೇರು ಮರಗಳಿಂದಾಗಿ ‘ಭಲ್ಲಾತಕೀಪುರ’ ಎಂಬ ಹೆಸರು ಬಂದಿದ್ದು. ಚಂದಕ್ಕನ ಮರದ ಅಂಟು ಹಾಗೂ ಬೈನೆಮರದ ನಾರಿನ ಪದರವನ್ನು ಕಾಡುಕೋಣ ತಿವಿತದ ಗಾಯಕ್ಕೆ ಕಟ್ಟುವುದು, ಮರವೆ ಬಳ್ಳಿ, ತುರುಚೆ ಬಳ್ಳಿ, ಒಳಗೆರೆ ಮರ, ಗುಳಮಾವು, ಸುರಹೊನ್ನೆ ಮುಂತಾದ ಸಸ್ಯಗಳ ಮಾಹಿತಿ, ರಾಜವೈದ್ಯರು ಕೆಲವು ಗಿಡಮೂಲಿಕೆಗಳ ಔಷಧಿಯನ್ನು ಕೊಟ್ಟು ರಾಣಿಯ ಖಿನ್ನತೆಯನ್ನು ನಿವಾರಿಸುವುದು ಇತ್ಯಾದಿ ವಿವರಗಳು ಆಸಕ್ತಿಕರ. ಈ ಬಗ್ಗೆ ಅಧ್ಯಯನ ಮಾಡುವುದಕ್ಕೆ ಕಾದಂಬರಿ ಹೊಳಹು ನೀಡಿದೆ.
ಕಾದಂಬರಿಯ ಕೊನೆಯ ಭಾಗದಲ್ಲಿ, ನಗಿರೆಯ ಸೈನ್ಯವನ್ನು ಸೋಲಿಸಿದ ಕೆಳದಿಯ ವೆಂಕಟಪ್ಪ ನಾಯಕನ ಸೈನ್ಯ ರಾಣಿಯ ಸಾಮ್ರಾಜ್ಯದ ಎಲ್ಲ ಕುರುಹುಗಳನ್ನೂ ಧ್ವಂಸಗೈಯುತ್ತದೆ. ಎಲ್ಲ ಆಕ್ರಮಣಕಾರರೂ ಒಂದು ಸಂಸ್ಥಾನವನ್ನು ಗೆದ್ದು ಸಂಪತ್ತನ್ನು ಲೂಟಿ ಮಾಡಿದ ಮೇಲೆ ಅಲ್ಲಿನ ಕೋಟೆ, ಅರಮನೆ, ದೇಗುಲ ಇತ್ಯಾದಿ ರಚನೆಗಳನ್ನು ಯಾಕಾದರೂ ಧ್ವಂಸ ಮಾಡುತ್ತಾರೋ? ಅವನ್ನು ಹಾಗೇ ಬಿಟ್ಟಿದ್ದರೆ ನಾವು ಈಗ ನೋಡಬಹುದಿತ್ತು ಎಂಬ ಆಸೆ ಮನದಲ್ಲಿ ಮೂಡುತ್ತದೆ. ಆದರೆ ಮನುಷ್ಯನ ಕ್ರೌರ್ಯಕ್ಕೆ ಕೊನೆ ಎಲ್ಲಿದೆ? ಇಂತಿದ್ದರೂ ರಾಣಿಯ ಸಾಮ್ರಾಜ್ಯ ವ್ಯಾಪಿಸಿದ್ದ ಹಾಡುವಳ್ಳಿ, ನಗಿರೆ, ಗೇರುಸೊಪ್ಪೆ, ಕಾನೂರು, ಹೆನ್ನಿ, ಮೇದಿನಿ, ಕತ್ಲೆಕಾನು ಇತ್ಯಾದಿ ಪ್ರದೇಶಗಳನ್ನು ಮತ್ತು ಅಲ್ಲಿನ ಅವಶೇಷಗಳನ್ನು ಪ್ರತ್ಯಕ್ಷ ನೋಡುವ ಕುತೂಹಲ ಹುಟ್ಟಿಸಿದ ಕಾದಂಬರಿ.
ಕೆಳದಿಯ ದೊರೆಗೆ ಸೆರೆಸಿಕ್ಕ ವೃದ್ಧ ರಾಣಿಯ ಅಂತ್ಯದೊಂದಿಗೆ ಮುಗಿಯುವ ಕಾದಂಬರಿ ಉಳಿಸಿದ್ದು ಗಾಢ ವಿಷಾದ. ಕೆಲವು ಕಡೆ ಪಾತ್ರ/ವಿವರಗಳು ಇಡಿಕಿರಿದು ಓದನ್ನು ಸ್ವಲ್ಪ ನಿಧಾನಗೊಳಿಸುವುದು ಬಿಟ್ಟರೆ ಇದೊಂದು ರಮ್ಯಾದ್ಭುತ ಕಾದಂಬರಿ ಎನ್ನುವುದು ನಿಸ್ಸಂಶಯ.
ತನ್ನ ಸಮಕಾಲೀನಳಾದ ಇಂಗ್ಲೆಂಡಿನ ಎಲಿಜೆಬತ್-I ರಾಣಿಗೆ ಸರಿಮಿಗಿಲೆನಿಸುವ ಸಾಧನೆಗೈದ ನಮ್ಮ ನೆಲದ ಚೆನ್ನಭೈರಾದೇವಿಯ ಈ ಕಥನ ಇಂಗ್ಲೀಷ್, ಹಿಂದಿ ಹಾಗೂ ದೇಶದ ಇನ್ನಿತರ ಭಾಷೆಗಳಿಗೆ ಅನುವಾದವಾಗುವ ಅಗತ್ಯ ತೀರಾ ಇದೆ. ಜೊತೆಗೆ ಇದನ್ನು ಸಿನಿಮಾ ನಿರ್ದೇಶಕರಾದ ನಾಗಾಭರಣ ‘ಕಲ್ಲರಳಿ ಹೂವಾಗಿ’ ಚಿತ್ರದಲ್ಲಿ, ರಾಜಮೌಳಿ ‘ಬಾಹುಬಲಿ’ ಯಲ್ಲಿ, ಸಂಜಯ್ ಲೀಲಾ ಬನ್ಸಾಲಿ ‘ಪದ್ಮಾವತ್’ ಚಿತ್ರದಲ್ಲಿ ಮಾಡಿದ ಹಾಗೆ ಒಂದು ಅಪೂರ್ವ ಸಿನಿಮಾವಾಗಿ ಅರಳಿಸಿ ವಿಶ್ವದೆಲ್ಲೆಡೆ ಪಸರಿಸಬಹುದಾದ ಎಲ್ಲ ರೋಚಕ ಹಾಗೂ ಮನಾಕರ್ಷಕ ಅಂಶಗಳು ಕಾದಂಬರಿಯಲ್ಲಿವೆ.
ವಿಸ್ಮೃತಿಗೆ ಹಾಗೂ ಕಳಂಕಿತ ಚರಿತ್ರೆಗೆ ಸಂದಿದ್ದ ಕನ್ನಡನಾಡಿನ ಹೆಮ್ಮೆಯ ರಾಣಿ ‘ಚೆನ್ನಭೈರಾದೇವಿ’ಯ ಅಕಳಂಕ ಚರಿತೆಯನ್ನು ಮರುರೂಪಿಸಿದ ಡಾ. ಶರ್ಮರಿಗೆ ಅಭಿನಂದನೆ ಹಾಗೂ ಅಭಿವಂದನೆ. ...more "

May 29, 2021 12:18AM · see review