Heba Farouk-هبة فاروق

“كل البيوت صبحت إزاز
حتى الحيطان المايلة
زادت ع الطريق
واتبدلت كل الوشوش
بقناع برىء
مفضلش غيرها
شريطة سودة مكلفته
صورة ضماير ميتة
فى برواز”
― ميسرة صلاح الدين, أنا قلبي مش فارس

“صباحك يا بلدي

صباحك شريف

يا وردة وحيدة

فى فصل الخريف

يا ست المداين

يا ورد الجناين

يا فجرى اللي باين

وظهر الضعيف

صباحك يا بلدي

صباحك شريف

هرست المدمس

فى حضن الرغيف

ومادد إيديا

بقســم فطارى

ما بيني وبينك

واكحل في عينك

ولما تمسى بسيبك وأمسى

وأسبلك سريري

وأبات ع الرصيف . .”
― ميسرة صلاح الدين, أنا قلبي مش فارس

“يا رب بحنى جبهتي
وبحس أنى عليت كتير
و فضعفى بلقى قوتي
والدمع توب ملهوش كبير
وأنت الكبير
ع اللي كبر
واللي فجر
واللي في ليل الخوف غدر
حتى القمر
بيصلى بنجوم السما
وأنت اللي بيك قلبي سما
عن كل أطماع البشر”
― ميسرة صلاح الدين, أنا قلبي مش فارس

“لما شفتك جوه منى
قلبي حس الارتباك
أصله كان خواف بطبعه
وأنت طبعا مش ملاك
هو دا جرح الحكاية
وارتعاشاتي فى غنايا
وأنتي من بين الصبايا
عامله جوا يا اشتباك”
― ميسرة صلاح الدين, أنا قلبي مش فارس