sara Elbehiry

“سيب
دايما على قد ما تتساب.. سيب
و على قد ما واحشك أحباب.. غيب
كل الداين.. كان متداين
والدين بيلف بدون ترتيب
أنا عمرى ما كنت بجرح قصد.. لحد ما قلبى اتجرح قصد
أنا جانى وقاضى ومجنى عليه
وطلعت براءة فـ حكم النقض
أنا دومينو ف صف ومش قصدى
كان نفسى أسند قمت موقع
أنا شايل قلبى ف محفظتى
وأول ما تجيلى فلوس.. بدفع
أنا عادى ودورى مالوش سوكسيه
بس دى أرزاق.. والدنيا نصيب
عمر ما فيه عادى بيسأل ليه
من الأصل اتساب... وليه هيسيب!”
― مصطفى إبراهيم, المانيفستو

“مفيش احساس لحسن الحظ و لسوئه مبيعديش .. مفيش ولا طعم حاجة من اللى بتدوقه مسيره يعيش .. بحلوه و بمره كله بيتسخط لمفيش
يا سبحان اللى بيعودنا ع الحاجة فننساها .. و بيخفف كاسات الناس بميه بدال ما يملاها .. عشان طعم اللى فيها يروح .. عشان طعم اللى فيها يجف
يقولوا مجازا المجروح اذا خد ع الوجع .. بيخف .... تلف عليه سواقى الكون تدوب اللى فات ف الجاى
فسبحانه لما قال منها جعلنا ( كل شئ حى )”
― مصطفى إبراهيم, المانيفستو

“إزاي هزهد في حاجا ماعييش؟
-ياحمار دي فضيله الاستغناء
وانا كنت استغنيت بمزاجي؟
أنا اسمي يئست ومستغنتش
إيه الزهد في إني أما أجي
أشتري ما بجيبش عشان ما لقتش؟
فيه فرق ما بين صبر العاجز
علشان مبقاش حاجه ف إيده
وبين واحد أصلا مش عايز
غير زي ما بس يعوز سيده
صدقني أنا زاهد بالصدفه .. أو من غير قصد
أنا طاير آه .. لكن علشان مش لاقي الأرض”
― مصطفى إبراهيم, المانيفستو

“السلام عليكم ياللى سيبتونا و نزلتم تحت
السلام عليمن ياللى سيبتونا و طلعتم فوق
ما بيبكيناش ف غيابكم الا الشوق
و ما تفهموش من ضحكتى انى ارتحت
لو حد فينا ارتاح
يبقى اللى بيغمض ساعة الفراق
اما انا ساعة الفراق ... فتحت”
― مصطفى إبراهيم, المانيفستو