Muhammad Bakabozza

“وطّى على ودنى ف قلب المسيرة وقال:
كده يبقى فاضل كام شهيد ع النصر؟
كده يبقى فاضل أد إيه على مصر؟”
― مصطفى إبراهيم, المانيفستو

“فلان الفلاني اللي كان يومها جنبي
ساعة لما بدأوا في ضرب الرصاص
فلان الفلاني اللي معرفش اسمه
ف دايما بقول يابن عمي وخلاص
فلان اللي سابلي بقية ساندويتشه
ليلة لما شافني بغنّي و جعان
فلان اللي مش فاكرَة غير شكل وشه
فلان اللي عداكي جوه الميدان
فلان اللي فتشني بالإبتسامه
فلان اللي قال هو فعلا هيمشي ؟
فلان اللي قاللي طريق السلامة
ساعة لما قولنا زهقنا وهنمشي
فلان اللي مرضيش ياخد مني أجرة
ساعة لما قلت إني رايح مظاهرة
فلان اللي قاللي هيتنحى بكره
وهنفرح و نرقص و راح تبقى سهره
فلان اللي بالفيسبا طالع و داخل
يجيب اللي يتصاب من الضرب جوه
فلان اللي ف الضرب عند المداخل
يرجّع صحابه.. و يستنى هوّا
فلان اللي كان بيناولني القزايز
ويقفلها بعد أما اعبيها جاز
فلان اللي يشرب ويسألني عايز ؟
فلان اللي كان وشه مليان قزاز
فلان اللي وزع عليك بطانية
ويسأل “فيه جنبك مكان ع الرصيف ؟"
فلان اللي نازل عشان القضية
فلان اللي نازل عشان الرغيف
فلان اللي مطلعش جوه البرامج
وكان بس صوته في قلب الهتاف
فلان اللي روح أكل واستحمى
فلان اللي ضايع في وسط ال الاف
فلان اللي غرقّلي خل الكوفيه
و شالني ساعة لما جت طلقه فيا
فلان اللي مات يومها تلزمله ديه
من ابن الفلاني اللي كل لحمه حاف”
― مصطفى إبراهيم, المانيفستو

“أما الغلابة اللى بنوا الغابة...

كانوا بيصحوا بعد كل مطب

يدعوا ف أدان الفجر و يقولوا :

يا رب يا منّان

احمينا م الخوّان

نجينا م الشرير

و انصرنا ع الدبابة”
― مصطفى إبراهيم, المانيفستو

“بعد اللى كل الناس شافوه
إزاي مازالوا بِيعرفوا.. فرق لقطات الإعادة
من حالات الديچاڤو؟”
― مصطفى إبراهيم, المانيفستو