Muhammad Bakabozza

“يوم قلت آه...سمعونى قالوا فسد
ده كان جدع قلبه حديد و اتحسد
رديت على الملايين انا و قلت
لو تعرفوا معنى زئير الاسد

عجبي”
― صلاح جاهين

“الدنيا اساساً م الاول ..
شيء يشبه سلك السماعة ..
يتلعبك منك ف ثواني ..
و عشان يرجع مفرود تاني ..
لازم تتعذب و تعاني ..
و تفكه ف أكتر من ساعة ..”
― مصطفى إبراهيم, ويسترن يونيون فرع الهرم

“أنا قلبي مزيكا بمفاتيح .. من لمسة يغني لك تفاريح
مع إني مفطرتش وجعان .. ومعذب ومتيم وجريح”
― صلاح جاهين

“الشوارع حواديت
حواداية الحب فيها..و حواداية عفاريت
اسمعى يا حلوة لما أضحك
الشارع ده كنا ساكنين فيه زمان
كل يوم يضيق زيادة عن ما كان
أصبح الآن بعد ما كبرنا عليه
زى بطن الأم مالناش فيه مكان

الشارع ده رحنا فيه المدرسة
اللى باقى منه باقى
و اللى مش باقى اتنسى
كنسوه الكناسين بالمكنسة
ييجى دور لحظة أسى
أنا برضه كمان نسيت

الشارع ده أوّله بساتين
و آخره حيطة سد
ليا فيه قصة غرام
ما حكتش عنها لأى حد
من طرف واحد..و كنت سعيد أوى
بس حراس الشوارع حطوا للحدوتة حد

الشارع ده شفتك انتى ماشية فيه
لابسة جيب.. و بلوزة وردى
و عاملة ديل حصان وجيه
اتجاهك فى اتجاهى..مشينا ليه
و الشارع دا زحام و تيه
بس لازم نستميت

و الشوارع حواديت
حواداية الحب فيها
و حواداية عفاريت
و اضحكى يا حلوة لما اسمّعك”
― صلاح جاهين