Mohamed

“في صبيه حلوة
اسمها مصر

منتظرة الفرج
لما يحين

وكتروا المتقدمين
خطابها بالملايين
لاجل عيونها

ليالى وأيام
في الميادين”
― ريـــم نـــصر

“ويا مصْر وان خيّروني ما اسكن إلاكي
و لاجْل تتبِّسمي.. يا ما بابات باكي
تسقيني كاس المرار.. و برضُه باهواكي
بلدي ومالي إلا انتي ولو ظلمتيني..
مقبولة منِّك جراح قلبي وْدموع عيني
الجرح يشْفى إذا بإيدك لمستيني..
كلّك حلاوَة.. وكلمة «مصر».. أحلاكي!!”
― عبد الرحمن الأبنودي

“أنا باشكر اللى خلق لى الصوت وأوصانى
أقول كلام حُرّ.. مايقبلْش لون تانى
مااسكتش ع الضِّيم واهشّ الغيم بقولة آه
وإن سرقوا صوتي.. بينسوا ياخدوا قولة آه
في الفرْح في الجرح إيه حيلتى إلاّ قولِة آه”
― عبد الرحمن الأبنودي

“بنلف في دواير والدنيا تلف بينا
ودايماً ننتهي لمطرح ما إبتدينا
طيور الفجر تايهة في عتمة المدينة .. بتدور

مابنكتبش الرسايل مابننتظرش رد
...لا حد في يوم سمعنا ولا بنسمع حد
طيور العمر تايهة في عتمة المدينة .. بتدور

ساكنين في عالم يعشق الخطر
فيه الطيور تهرب من الشجر
وتهرب النجوم من القمر
وتهرب الوجوه من الصور

بنلف في دواير ندور ع الأمان
ونلاقينا رجعنا تاني لنفس المكان
ندور .. ندور .. ندور

نحلم ونحلم بالحياة المُفرحة
وأتاري أحلامنا بلا أجنحة
ندور ندور ندور بجناح حزين مكسور
ساعات نشوف في العتمة
وساعات نتوه في النور
ساعات عيوننا بالأسى تفرح
وساعات في ساعة الفرح ننوح

ولا حاضر ولا ماضي
تروس بتلف ع الفاضي
ولا فينا شباب زعلان
ولا فينا شباب راضي

مفيش غير إننا بندووور ..
ندووووور .. ندووووور”
― عبد الرحمن الأبنودي