Status Updates From الأعمال الكاملة - الدواوين ...

يا باب أيا مقفول.. امتي الدخول
صبرت ياما و اللي يصبر ينول
دقيت سنين..و الرد يرجع لي: مين؟
لو كنت عارف مين أنا... كنت اقول
عجبي!!!

يا بخت من يقدر يقول
واللى فى ضميره يطلعه
يا بخت من يقدر يفضفض بالكلغم
وكل واحد يسمعه
يقف فى وسط الناس ويصرخ اه ياناس
ولا ملام
يجى الطبيب يحكى له على اللى بيوجعه
يكشف مكان الجرح ويحط الدوا
ولو انكوى
يقدر ينوح
وانا اللى نليان بالجروح
ما اقدرش اقول
ما اقدرش ابوح
والسهم يسكن صدرى ما اقدرش انزعه

على اسم مصر التاريخ يقدر يقول ماشاء
انا مصر عندى احب واجمل الاشياء
بحبها وهى مالكه الارض شرق وغرب
وبحبهل وهى مرميه جريحه حرب
باحبها بعنف وبرقه وعلى استحياء
واكرهها والعن ابوها بعشق زى الداء
واسيبها واطفش فى درب وتبقى هى فى درب
وتلتفت تلاقينى جنبها فى الكرب

باكلم الناس كلهم من هنا
وباقول لهم وللحياة :مرحب
ودى كلمة يا ما اصعبها يا ماصعب
لو تنطلق من هنا
م الصدر من ع الشمال
من قلب شال احمال ماهيش هينه
ياقوة الله
احمال جبال فى جبال ياولداه

كيف شفت قلبى والنبى يا طبيب
همد ومات ولا سامع له دبيب
قاللى لقيته مختنق بالدموع
ومالوش دوا غير لمسه من ايد حبيب

ليه ياحبيبتى ما بينا دايما سفر
ده البعد ذنب كبير لا يغتفر
ليه ياحبيبتى ما بينا دايما بحور
اعدى بحر الاقى غيره اتحفر
وعجبى

ياباب يا مقفول امتى الدخول
صبرت ياما واللى يصبر ينول
دقيت سنين والرد يرجع لى مين؟
لو كنت عارف مين انا كنت اقول

عجبى