Status Updates From سيرة الورد

أنا يا صاحبي ف الصورة
هنا ذكرى .. وفكرة
ولفظة ف عبارة
قصيدة بتحتمي بالناس ..
وبالأسفلت والحارة ..
قصيدة بتشبه الفقرا ..
على سطوح البيوت باتو .. وفي البدرون
لاتعرف تلج ف فيينا ..
ولا رقصت ف يوم تانجو
ولا قالت بدل معلش يوم "باردون"
أنا يا صاحبي ف الصورة ..
مسلِّم ضحكتي لحزني
لـ بنت بتحتمي ف حضني من الأيام
أكلمها عن الأحلام ..
وعن برد الشتا وليله
وعن أمي اللي ضمتنا في هذا الفصل

أنا بيني وبين الورد
كام حدوتة ..كام قصة
فما تلومنيش ..
إذا شلتك ف الحنين غصَّة
ناقص لي ف الغياب حصة
ف ماتسيبنيش أعيش آمن
مانيش ضامن ألاقي حد يجرحني
يعلمني احترام الحزن .. تقديره
مافيش غيره .. صديق وافي
يصون السر .. يجعلني ف عيون الناس بسيط أوسم
..
أنا أبصم وبالعشرة .. على العشرة
اللي بيني وبينه من مده ..
كما العشرة ما بين النهر .. بين طيره
مافيش غيره صديقي الضل