Status Updates From فنون عصر النهضة : 1- الريني...

الكتاب تقيل أوي

حاجة فخمة قوي انك تخشي كنيسة تلاقي اتنين أسود عالمنبر كده
انا عايز أسد في الصالة عندي بره.

كاتدرائية الدومو بسيينا و رؤية يجي 12 صورة لمنحوتات و فن معماري ورا بعض كان شعور غامر بالذات ان منحوته دوناتلو ليوحنا المعمدان كانت أخيرة، منحوته لشخص واحد في قمة البساطة و قمة التعقيد في نفس الوقت، علي عكس المنحوتات اللي بتزين المنبر و اللي بتبقي زحمه جدًا بالشخوص.
و دوناتلو فظيع حقيقي انا حسيت اني بروح عالم تاني و انا ببص علي منحوتته.
كاتدرائية واحدة بنيت و زخرفت و أضيف إليها في خلال 300 سنة كاملين.

الجزء القادم كاتدرائية سيينا و هيبقي مسيطر عليها جوفاني و نيقولو بيزانو، بس هيكون فيها كمان اول سلاحف النينجا النحات الشهير دوناتيلو، و منحوته ليوحنا المعمدان AKA النبي يحيي

ما التف الباباوات ولا الأباطرة ولا الملوك عندما حان أجلهم بالبيارق و الأعلام التي كانت تخفق عالية فوق رؤوسهم لكنهم بدوا عرايا فقراء..... فأين ثرواتهم و جواهرهم و تيجانهم و صولجاناتهم و طيالسهم و أكاليلهم؟
-بيت للشاعر بترارك عن الموت الأسود في القرن ال ١٤

أهدي بوكاتشيو لعشيقته فيامتا ملحمة شعريه بطول ملحمة الإنيادة لفيرجيل!
يا تري اتجوزوا ولا اتخزوق؟!

جوفاني بيزانو الاب و نيقولو بيزانو الابن نحاتان جعلا الحجر ينطق و يتحرك.
بس مشاهدهم المنحوته مشغوله جدا، حتي مع الشرح مش هتبقي عارف تبص فين ولا فين.

دماغي وجعتني مش من كثر القراءة لا من كثر التفكير، ملعبتش فيديو جيمز بقالي كثير هخش آخدلي جولة كده في لعبة من اللي سايبهم.
بس الجزئية دي كانت عن برج بيزا المائل و محتاج ابحث عن صور حديثة للبرج لأنه كل ما في ذاكرتي عنه، بيصوره برج في مكان خالي، بس مش ده اللي شفته في الكتاب حيث بجانبة كاتدرائية و هو يعتبر ضمن مدينة كاملة مليئة بالمباني الأثرية.
بس من الواضح من الصورة ان ممكن يكون فيه مسافة بينه و بين الكنيسة.

يا أخي النساء مضطهدين حتي في الفن، لوحة إيداع جثمان المسيح لجوتو، كل رجل في اللوحة وجهه مختلف، كل ملاك طائر مفجوع حزناً في اللوحة وجهه مختلف، الستات كلهم بما فيه السيدة مريم، نفس الوجه، مع إختلاف غطاء الرأس او تسريحة الشعر، كلهم نفس الوجه نفس الأنف نفس الفم نفس العيون، كأنه كان بيحب واحدة و بيقولها بشوفك في كل الوشوش!
😂😂😂

مع إني بدي كل لوحة حقها من التأمل و التدقيق و التمحيص، الا ان دكتور ثروت عكاشة بيفاجئني دايمًا بعيوب و تفاصيل لم أرها في فترة تأملي لكل لوحة.
عجبني جدًا المقارنة بين لوحة يوم الدين لجوتو و مخطوطة معراج نامة الفارسية، في جزئية تعذيب الخطاة، و مش شايف انه توارد أفكار خالص أو حتي نقل، لأن اللوحيت مختلفين عن بعض اختلافات جذرية، و لوحة جوتو أفضل بكثير جدًا من لوحة معراج نامة فلا مقارنة يعني.

ملحوظة 8 : لوحة موت القديس فرنسيس بتجمع بين ما هو اسطوري و روحي و عاطفي
فتلاقي احد اتباعه قادر يشوف روح القديس و هي صاعدة إلي السماء في صورة نجم.
و نلاقي مشاعر أتباعه و حزنهم الشديد عليه و علي موته و هم متحلقين حوله من يحتضن يده و من يقبله.
و الجانب الروحي الإيماني لشخصية زاهدة مثل القديس فرنسيس، اللي نقل الدعوة من ترهيب و بعد و انفصال عن العامة ، لترغيب و حب و سلام و انتشار للدعاة بين عامة الشعب.

تابع ملحوظة 7 : لكن دلوقتي انا هتجه لربي الذي في السماوات فرجائي و أملي عنده، في اللحظة دي بيبكي القاضي و بينزل من علي المنصة يغطي القديس بعباءته و بيدعوا اتباعه يعملوا زيه، اللوحة كمان ممكن تفسر علي صراع بين ما هو روحي و ما بين ما هو مادي دنيوي، لأن هنلاقي وراء فرنسيس كنيسة، بينما وراء أبوه مدينة، و كمان إبتهال القديس فرنسيس للسماء بيقابله يد الإله ممتده له، مع انها صغيرة و مخدتش بالي منها من أول 5 مرات شفت اللوحة.

ملحوظة 7 : في اللوحة دي بيحكيلنا ثروت عكاشة يمكن أحلي قصة دينية أقراها من فترة طويلة، القديس فرنسيس بأسيزي في شبابه بيعدي علي كنيسة خربه فبيدخل يصلي فيها و بيسمع صوت من السماء بيدعوه لتصليح الكنيسة، فبيروح لمخازن أبوه و بيبيع حاجات بدون معرفته عشان يصلحها، أبوه لما بيعرف بيغضب جدًا و بياخده للقاضي، و بيطلب منه يتخلص من كل شئ ملكه، فبيتجرد القديس من كل ملابسه لأبوه و بيقوله انا كنت زمان بدعوك أبي الذي في الأرض..يتبع

ملحوظة 6 : دكتور ثروت عكاشة بيعمل حاجة هنا لمتعة القارئ، و هي انه بينقلنا حكاية كل لوحة و قصتها بتفصيل كافي انك مش بتحس ان ناقصك حاجة.
لوحات القديس فرنسيس بأسيزي أول لوحات في الكتاب تحتاج يتقال قصتها فعلًا لأنهم مرسومين بشكل مباشر من سيرته، و اللي أغلب القراء عرب أو اجانب مسلمين او مسيحين او ملحدين مش هيبقوا مطلعين عليها.
انا شخصيًا شايف ان فيه الكثير من القديسين و هستغرب لو أصدقاءنا المسيحين مطلعين علي كل سيرهم.

ملحوظة 5 : جوتو كمان عمل حاجة معملهاش حد قبله انه بدء يرسم لوحات المسيح و الناس اللي حواليه بملابس شرقية علي عكس أغلب فنانين الغرب اللي قبله، لان المسيح من الشرق فالمفروض تنقل الصورة المتخيلة له و لزمنه و لمعمارهم، مش تخليه أوروبي !

ملحوظة 4 : في الصفحة دي بيتم وصف و نقد 3 لوحات لجوتو و هما عاجبيني جدًا، فكرة تمثيل اشياء رمزية أو صفات زي الظلم و البخل و الإيمان علي هيئة أشخاص حاجة مثيرة جدًا للإهتمام و أحب أشوفها من أكثر من فنان، و كمان انه رسم الثلاث لوحات بدرجات من اللون الرمادي فقط مخلي لهم قيمة جمالية غريبة بالنسبة ليا مش قادر اوصفها، كانهم صور منحوته في الصخر !

أنا هكرس اليوم للكتاب ده، عشان مكنش فيه وقت أقراه امبارح مع اني مقرأتش كثير اصلًا
أتمني أخلص علي الأقل جزئية الفنان جوتو.

ملحوظة 3 : أول لوحتين ملونين في الكتاب للعذراء جالسة علي عرشها تحمل المسيح
لفنان تشيمابويه من القرن ال 13 و الفنان جوتو من القرن ال 14 و مع ان واضح جدًا ان جوتو أفضل بعشر أضعاف في لوحته، و اللوحتين لهم جمالهم الحقيقة، الا انهم أسوء لوحتين أشوفهم للمسيح و العذراء، الرسامين في القرنين اللي بعد كده هيرسموهم أجمل بكثير، بس هي في الآخر قفزات فنية من عصر لعصر لو فوتنا واحدة مش هنوصل للي بعدها

تابع 2 لملحوظة 2 : صور بازيليكيا القديس فرنسيس من الداخل بالألوان بتديلها روح تانية تمامًا و مستوي أعلي من الإبهار و التقدير لفن كان قبل فن عصر النهضة بقرن، و لكن أنا متفهم جدًا ان الكتاب بالفعل كان سعره 200 جنيه في 2011 يعني في وقتنا هذا لو اتعمل تاني هيبقي ب 1000 جنيه أقل واجب، فكان صعب ضم صور كل شئ ملونة للكتاب بسبب التكاليف.

تابع ملحوظة 2 : و لكن المبهر حقيقي، و ده مميز فعلًا انه يفضل مبهر حتي عصرنا هذا، شكل الكنيسة الداخلي بسقفها و أعمدتها و شبابيكها، و اللي برضه الكتاب حرمنا من اننا نشوف التصاوير اللي بداخلها للأسف، بس أعتقد دي غلطة هتتصلح في الفصل القادم الخاص بالفنان جوتو، زخارف و شكل معماري حقيقي مبهر، و أتمني ان من وسط رسومات جوتو يكون فيه رسومات من داخل كنيسة القديس فرنسيس.
هكمل بحث بقي لصور للكنيسة من الداخل بالألوان.

ملحوظة 2 : بازيلكيا القديس فرنسيس الأسيزي، شئ مؤسف ان الصور أبيض و أسود و بالذات الصور داخل الكنيسة، أنا عجبني الجوانب الطويلة للمبني شكلها مميز جدًا، و أنا بحثت دلوقتي عن صور ليها ملونة و الصور في الكتاب لو توفي الكنيسة حقها فهي مبني عملاق فعلًا، و لكن يالا السخرية القديس الزاهد المتقشف تبني كنيسة عملاقة بهذا الشكل له بعد موته من قبل تلاميذه، بجانب الجوانب أنا مش منبهر بمعمار الكنيسة نفسه الخارجي...يتبع

تابع 2 ملحوظة 1 : و الناس ترفع شيوخ متشددين عنصرين بيدوفيليين مبررين للتحرش، لمنزلة الصحابة، من أمثال عبدالله رشدي و غيره، في غياب و تطنيش أمني تام من السلطات، و محاولات ضعيفة واهية لبعض شيوخ الأزهر لردعه و نقد كلامه، بعد ما شافوا الهجوم الشرس لتابعيه الدمووين الجهلة، وضع غريب، مش عارف هيوصل بالديانة دي لفين، و كأن كل العوامل اتحدت معًا لتحقيق نبوءة رسول الديانة ان الدين سيصير غريبًا في آخر الزمان.

تابع ملحوظة 1 : قصاد الديانة الإسلامية اللي بشكل غريب تحس مهما حاول أي شيوخ يوصلوا للناس يسر الدين و تفهمه و قبوله للآخر و محاولة نزع الكراهية و التعصب من قلوب الناس و المحاولات دي أغلب الوقت بتكون من مفكرين، تلاقي ان دول بيتهاجموا و بيتكفروا، لدرجة اننا بقينا عايشين في عصر ما يقوله شيخ الأزهر من لطف و رسالة سلام طول الوقت يكفر، و دار الإفتاء تكفر، و الشيخ اللي حلل الموسيقي لأنها تستخدم لعلاج المرضي يكفر.

ملحوظة 1 : حاجة بلاحظها تاريخيًا و بسبب الأوضاع الحالية برضه، ان يحسب لصالح الديانة المسيحية ضد نظيرتها الديانة الإسلامية ، انها ديانة كانت دائمًا و ابدًا متغيرة للأحسن، من وقت كان فيه الرهبان منعزلين عن البشر لاختلاطهم بهم، من وقت رهبانهم كانت خطبهم كلها ترويع و تهديد بأهوال النار، لوقت خطبهم بقت كلها ترغيب و طمئنه للجموع و نشر حب و سلام، مع بعض الإستثناءات القليلة اللي بنسمع عنها و نسبتهم ضعيفة جدًا.

أنا ضهري وجعني من قراءة صفحتين الكتب اللي حجمها مبالغ فيه دي معموله لعمالقة هيجوا في آخر الزمان ولا ايه يا جماعة
انا هيطلعلي عضلات و برستيجي هيضيع