منة عبد الفتاح ’s Reviews > ماذا علمتني الحياة؟ > Status Update

اعتياد المصريين للاختلاط الفج حاجه حزينه و بيءسه جدا ، ابتداء بالشغل وانتهاء بالأفراح والمناسبات الاجتماعيه ، كنت شوفت بوست لحد شارح مسأله فقهيه قضي فيها الفقيه بحكم يشذ عن أهل الحجاز فقط لاعتياد أهل مصر -خاصه نساؤها- علي الخروج و إن هذا لا يعتبر في عرف مصر مما يشذ أو يلفت النظر ، علي عكس أهل الحجاز مثلا ، و ده مقبول زمان لما كان في احتياج للزراعه، لأن الست في الصحراء كانت هتساعد زوجها من داخل خيمتها عادي ، انما الطبيعه الزراعيه لمصر تحتم خروج المرأه مع زوجها للحقل وخلافه ، لكن المشكله استساغه ده و تعميمه و اعتقاد الجهل في غيرنا كمان لما ميعملوش ده!
و الحقيقه أن الأمر مش مفيد ولا مسلي لحد غير الرجاله لأن هما اللي مستفيدين من تواجد ستات قدامهم طول الوقت ، إنما الست في الحقيقه مش مستفيده غير تقييد حركه وتقييد لبس و تقييد ضحك ، ولو علمت الستات المصريه ما في جلسات الستات الخليجيه من الجمال لقاتلهن عليهن بالسيوف بس العند كيف عند بعضهن للاسف .

باخد وقت كبير موت عشان اعرف اندمج في كلامه تاني بعد ملحوظاته اللي زي القرف عن الستات دي -_-

المشكله يا منه فعلا اننا مهمها تطور العالم من حولينا مازال في مصر فقط الحديث عن المرأه وعلاقتها بالشارع او كبتها وعزلها هو الشغل الشاغل لعقول الرجال المصريين خاصة ولا أراه شغل شاغل لأي ثقافة من ثقافات اي دوله عربيه أخري
يبدو فعلا لان اصلنا فلاحين 😅

فاهمه استياءك تماما يامنار كان بيحبطني جدا المنظور ده برضو !
بشوف اننا اصلا بطبعنا شعب متكلم و اجتماعي عشان كده بلاحظ معظم الترندات مبدأها من مصر اصلا ومش بتبقي قضايا تخص المنطقه كلها ولا حاجه بس احنا اكثر كلاما بشكل عام وعددنا اكبر احصاءيا وبالتالي اكثر ظهورا في قضية المرأه او غيرها .
كونت برضو وجه نظر سوداويه شوية بتتضمن ان الحمدلله ان لسه عندنا طاقه نفكر او يبقي في حوار في اي حاجه لان البديل بجد هو العدمية 😂 لان زي ما انتي شايفه مفيش منحي واحد من مناحي الحياة يشجع علي الاستمرار في الحياة اصلا فما بالك النقاش ومحاوله الاصلاح فالحمدلله ان لسه في حاجه فيها الروح 😂 بشوف دلوقتي بعض الشباب الصغير ال nonchalant فعلا شايف كل القضايا ملهاش لزمه و احمد زي الحج احمد خالص ، فحاسه ان يبقي في رأي و رأي آخر خير من ان الناس كلها تشيل ايديها من كل القضايا ، و بحس بالفعل وجود النقاش علي الساحه بيوعي اللي مش واعي ، افتكر قضيه زي التحرش دي من مده مش بعيده كان اتهام الست بالتقصير فيها هو اول حاجه بتيجي في ذهن المتكلم، بزياده الوعي بقي في موضوعيه اكتر في تناول الموضوع وتغليط للغلطان قبل اللوم علي المعتدي عليه و اعتقد برضو ان نقاشات المرأه وخلافه موجودة في المجتمعات الغربيه وغيرها بس احنا مش متعرضين لكل دواءرهم فمنقدرش نعرف مدي اهتمامهم من عدمه ، لكن الملموس ان استخدامهم للخداع بالقوه الناعمه زي السينيما و الصحافه بيوهمنا انهم خلصوا مرحله البديهات من زمان وبيتكلمو في حاجات تقدمية أكتر بس الواقع بيثبت عدم صحة ده كل فتره في رأيي ، و ده لا ينكر اننا كمصر بالذات عندنا مشكلة في ندية الرجل بالمرأه و دي انا بغلط فيها الطرفين بصراحة مش الرجالة بس😅
بعتذرلك عن طول الكومنت بس قولتي نقطه مهمه وبفكر فيها !
شكرا لاثراءك للنقاش وقوليلي رايك برضو في اللي قلته ♥️

أنا أتفق معاك جدا وانبسطت بالعكس بالكومنت الجميل دا
انا بس ليا وجهة نظر تانيه قد تكون غريبه شويه، وهي إنشغال الشعب المصري بالذات على اهميته بقضايا زي قضايا المرأه والتحدث فيها بكثره شىء يدعو للخجل ، ليه أنا بقول كدا ، لأن احنا مش بنتكلم عن حقوق حقيقيه ، إحنا بنتكلم في بديهات وحتى البديهيات دي احنا بنختلف فيها، يعني يا ريت بنتكلم مثلا عن ان المرأه ليها عقل كامل ولها الحق الكامل في اتخاذ قرارها ، او الإعتراف وأخيرا ان خلاص المرأه لازم تشارك في السلك السياسي أو الديني او .. أو ..  أو ...
لا للأسف احنا حديثنا عن اهمية خروج المرأه ، وهل المرأه إنسان ولا هيا نصف إنسان، هل نضرب المرأه ولا منضربهاش يا تري ... فا دا حوار عقيم يهدم أكثر من انه هيبني.
ودا بردو من وجهة نظري شاغل فارغ لا يحقق شىء سامي على مر الزمن ونضيف لدا كمان انه بيبعد بشكل غير واعي المواطن المصري عن انشغاله بقضايا اكثر أهمية زي الحريات، وحقوقه وواجباته تجاه وطنه ودينه، ولان كدا كدا المواطن المصري بيمتلك رأي في كل حاجه ودي ميزه كبيره جدا زي ما بتقولي يا منه ، إلا انه حاليا فعلا الجيل الجديد لما يلاقي قضيه زي قضية المرأه دي هيبدأ يتجه ايها عشان هيظن انه هو دا للأسف القضيه المنوط بالإنسان الدفاع عنها وهينشغل بالصراع وهينسي القضايا الأسمى لانه هيظن انه بيمتلك قضيه
وانا أظن ان التوقف عن الحديث عن المرأه بين العامه هيقدم للمرأه أكتر من الصراعات الدائره حاليا على السوشيال ميديا والبرامج التلفزيونيه

متفقه معاكي جدا في فكره التشتيت عن القضايا الاساسيه بقضايا فرعية ودي نقطه محتاجة وعي فردي ، كل ما حد يلاقي نفسه بيضيع وقت اكتر مما يحتمله الامر يصحي لنفسه وينأي بها عن الغث ، الجيل الجديد في اعتقادي هيمر بنفس المراحل اللي باقي الاجيال مرت بيه وهيتعلم من الاخطاء بكثره التعرض للمواقف و خبرات الحياه ، و فعلا انا معاكي ان في طاقه كبيره مهدره في الكلام في بديهات بس مظنش ده حكر علي مصر وان كانت نسبته ممكن تكون اعلي الله اعلم عشان مش مطلعه علي نفس الموضوع عند ثقافات تانيه فمش قادره احكم اوي علي النسبه بصراحه.

برضو لا شك ان تهميش دور الدين المتعمد من سنين أثر في تنشأه البنات والشباب ، ده انتجلنا قله مروءه و قله حياء ، قله رجولة و قله انوثه بشكل مطرد من الناحيتين الا من رحم الله.

فيما يخص استفاده المرأه والرجل علي حد سواء فهو مش حاصل طول ما في علو لصوت التفاهه والتغييب بشكل عام فكلنا حاليا بنخسر 😂 لكن علي مستوي الافراد انا ملاحظه وعي اكبر عند الطرفين وده انعكس عليهن لما بقوا امهات و عليهم لما بقوا اباء والحمدلله علي الاقل دايرتي بقي في اختلاف كبير في النظره لما يختص به الرجل و ما تختص به المرأه خصوصا في جيل ال Millennials (اللي حاليا في وسط الثلاثينات الي اواخر العشرينات من اعمارهم) فمبقتش التربيه حكر علي المرأه مثلا وبقي في اباء و جروبات رجاله بشكل اساسي لتوعيتهم بالدور ده مثلا وخطاب اكثر تفهمت للست و اختلافها النفسي عن الرجل ودي خطوات مكنتش بتتشاف قبل كده علي حد ما اعرف ، فاعتقد ان في حاجات كويسه علي مستوي الافراد بس يمكن مشكلتنا في مصر العدد فتلاقي في مواهب مدفونه وسط غالبيه القرف للأسف .

بتشوفي ان مشاريع كويسه بس شايفاهم اقل والمشكله في ان محتاجين عدد اكبر ؟