Amira Mahmoud’s Reviews > نهب الفقراء: الشركات عابرة القومية واستنزاف موارد البلاد النامية > Status Update

الماركسيين ومن سبقهم من الاشتراكيين، كان عندهم ادعاء دائم بإن الاستثمار في الدول النامية، بيزيدها فقرا واستعبادا.
بس لو سو، فليه الدول النامية هتموت وتجيب استثمارات اجنبية، وكمان بتعملهم تسهيلات، واعفاءات ضريبية؟ وليه تلتومية صفحة عشان موضوع صغير زي دا، مريب أوي عنوان الكتاب دا

Ahmad wrote: "الماركسيين ومن سبقهم من الاشتراكيين، كان عندهم ادعاء دائم بإن الاستثمار في الدول النامية، بيزيدها فقرا واستعبادا.
بس لو سو، فليه الدول النامية هتموت وتجيب استثمارات اجنبية، وكمان بتعملهم تسهيلات، ..."

لا هو الموضوع مش صغير زي ما أنت متخيل، ده تقريبًا الكتاب الثامن أو التاسع اللي بقرؤه في الموضوع ده وفي كل كتاب في جديد
أما ليه الدول النامية "هتموت وتجيب استثمارات أجبية" فده له أسباب كتير جدًا لكن ممكن نقول إن أهم سببين هما الترهيب والترغيب
الترغيب بيتم بمحاولات إقناع الدول النامية اللي اقتصادها متدهور أصلاً في أشد الحاجة لأي وسيلة نجاة؛ إن وسيلة النجاة دي هي الاستثمار الأجنبي على أساس إنه هيوفر فرص عمال كتير وهيقضي على البطالة من ناحية ومن ناحية تانية فهو هيدخل تكنولوجيا وصناعة جديدة للبلد ممكن هي تتعلم منها وتطورها لكن اللي بيحصل إن الاستثمارات بتجيب لها "جزء" من الصناعة يعني مرحلة واحدة أو جزء واحد من المنتج وبتوزع باقي أجزاء المنتج على دول نامية تانية كتيرة
بالتالي الدول النامية اللي كان عندها اعتقاد إنها لما تستقبل الصناعة هتقدر بعد فترة تطورها وتصنعها بنفسها بتلاقي نفسها اودام جزء واحد بس معرفتها بكيفية إنتاجه لا هتضر ولا هتنفع.
الترهيب بقى بيتم من خلال البنك الدولى وصندوق النقد الدولى ومنظمة التجارة العالمية من خلال حاجتين؛ أولهم الضغط على البلدان دي بتسهيل الإجراءات والأوضاع الاقتصادية اودام الاستثمارات الأجنبية في مقابل الحصول على القروض وللأسف بيتفرض شروط تعسفية تانية كتير من تقليل الإنفاق الحكومي والخصخصة وخفض الدعم (وده اللي بتواجه مصر حاليًا بالمناسبة فأغلب سياسات شيل الدعم دي سببها القروض وشروط القروض اللي بيفرضها صندوق النقد الدولي) وثاني حاجة هي إتفاقيات تحرير التجارة اللي هدفها فتح سوق الدول النامية (غصب عنها أو برضاها) اودام التجارة الخارجية والاستثمارات الأجنية وأكبر مثال هو إتفاقية الجات اللي كانت بتنص مش بس على تحرير السلع لا وكمان تحرير الخدمات
فجأة حتى دخل السياحة في الدول النامية بيكون في جيب الشركات عابرة القوميات

ده طبعًا مش تلخيص ل 300 صفحة، بس هو موضوع مهم ولازم تقرأ فيه
ممكن تقرأ كتاب غيره إن كنت مرتاب في الاسم :D

بتحضري دكتوراة في الفقرا يا أميرة 😅

هو موضوع نقل الخبرات يعتبر مش واجب على الشركة الأجنبية إلا لو نص العقد على تسليم المصانع بعد استغلال الأجنبي لها لعدد من السنين، زي ما حصل في أرامكو السعودية كمثال.
إنما غير كدا فهو عامل زي صبي الصنايعي اللي بيلقّط الصنعة من معلمه عشان يشتغل لوحده، بس معلمه جايبه عشان يساعده، مش جايبه يديله كورس ببلاش هو.

صعب دولة نامية تصنع حاجات كتير لوحدها بسبب تعقد معظم الصناعات الحديثة.
كمثال في الموبايل "الذكي" في بداياته كان بيحتوي على أكتر من 150 ألف براءة اختراع. عدد رهيب جدا، ومازال مفيش دولة على وجه الأرض بتصنع موبايل من الألف للياء على أرضها وبإيدين ولادها رغم إنها تقدر، ودا بسبب اللي كان ديفيد ريكاردو بيسميه "الميزة النسبية"، بمعنى إن فيه دول بتصنع بعض القطع بجودة أعلى وسعر أقل، زي الحساسات بتاعة الكاميرات اللي نص الكوكب بيستوردها من اليابان من سوني.
ودا اللي بيسموه "التخصص" اللي أشار لأهمية أدم سميث في كتابه الكلاسيكي "ثروة الأمم"، وهي نفس الفكرة اللي سفه منها المقبور كارل ماركس في كتابه "بؤس/فقر الفلسفة 1847" أي قبل المانيفستو بسنة واحدة.

الشركات الأجنبية بتأكلك وبتشغل عيالك، فمن البجاحة اننا نعاتبهم عشان متعلمناش الصنعة منهم. الشركات المالتي-ناشونال بتعرف تدير رؤوس الأموال كويس أوي، وبتدي رواتب حلوة تخلي أهل البلد يتمنوا يتوظفوا فيها.
المنافسة بين الشركات المالتي ناشونال الكبير ضخمة ولا ترحم، فصعب إن دولة صغيرة تدخل بتقلها تنافس الكبار بين ويوم ليلة. هل يستوي الذي يعملون والذين لا يعملون؟

الحواجز الجمركية بتفيد الدول المصدرة، بس ف نفس الوقت بتفيد المستهلك المحلي جدا، كمثال، انك تشتري أي أيتم من أمازون كفرد يعتبر مخاطرة كبيرة؛ بسبب الجمارك التعسفية.

بالنسبة للقروض، فرقم واحد، محدش بيضرب الدول النامية على ايدها عشان تاخد قروض، ممكن يطرحوا سندات ويبيعوها للشعب زي شهادات قناة السويس مثلا اللي اتعملت، وفيه ألف طريق قبل القرض.

القيود اللي بتفرضها البنوك الدولية، هي لضمان بقاء رأس المال، بمعنى إن الدول النامية متروحش تشرب بالفلوس سجاير، وتقعد تلطم تاني، أو تروح توزع الفلوس على الشعب في المرتبات الحكومية، وفي دعم بنزين وغاز، فهتطير الفلوس، ومش هتعرف تسدها
لوفيج فون ميز كان بيتكلم عن إن الرأسمالية عمادها الإدخار، بمعنى إن رأس مالك اللي حوشته هو اللي هتصنع بيه، فلازم تحافظ على مدخرات وتصينها؛ لأن دي هي اللي هتنتج بيها تاني.
بس لو وزعت الفلوس بتاعة على الفقرا، هتنتج فلوس غيرها منين؟ وهترد القرض منين؟ الفقرا مش هيقفلوا بقهم، ولا بنود الدعم هتخلص. الاشتراكيين لو عليهم عايزين يعينوا أمين شرطة على مؤخرة كل مواطن عشان يخلي باله منه.
كمخلص فشروط البنوك الدولية، هي أولا وأخيرا لضمان استرداد فلوسهم. وقبولهم بإعطاء قرض معناه وثوق البنك في إن الدولة بتعرف تاخد الفلوس وتستثمرها، بدل ما بتشرب بيها سجاير زي دول تانية، فبيبقى شهادة إيجابية في الدولة المقترضة، وحافز لضمان الاستثمار فيها


"فجأة حتى دخل السياحة في الدول النامية بيكون في جيب الشركات عابرة القوميات" أعظم حاجة في عصور العولمة، أنا مستني بفا رغ الصبر إني أزور الأهرامات وهي تحت إدارة الشركة الأجنبية، بدل شوية الرعاع والبلطجية اللي مستنينا عند الأهرامات. سيبي كل واحد يشوف شغله اللي بيعرف يعمله


هقرأ ايه ولا ايه بس يا أميرة :'D
التو ريد بقى ممتد لحد القبر، فأمسك فضولي شوية أحسنلي، بدل تسويحة القراية ف تلاتين كتاب في نفس الوقت :)

طيب أنا صعب أعلق على كل النقاط دي، حتى لو كنت مختلفة معاك وفضولي حابب يعلق عليها كلها

لكن هعلق على حاجتين بس يعني؛ أولاً لو عندك خلفية في موضوع القروض هتعرف إنه آه الدول النامية بتضرب على إيديها عشان تاخد القروض، وده مش مع ظهور صندوق النقد الدولى ده يمكن من قبل الحرب العالمية من وقت ما بدأت بريطانيا تحقق فائض رأسمالي وفكرت في القروض كوسيلة تستفيد بيها بدل ما رأس المال يفضل مركون ويترب :)
من ناحية هتستفيد بالفوائد، ومن ناحية تانية سيطرة ونفوذ على موارد الدول دي وأحيانًا على الدول نفسها وأعتقد أنت فاكر زمان كان بيدرسوا لنا الإنجليز احتلونا إزاي؟ بدأت بلجنة هدفها مراقبة تسديد الديون وانتهت باحتلال عسكري، وكل اللي حصل دلوقتي إنهم ظبطوا شكل الموضوع بس ولبسوه بدلة وسموه صندوق النقد الدولي ووصل لمرحلة من السيطرة إنه حتى مش محتاج يتدخل عسكريًا عشان يفرض سيطرته
أنا مش مؤمنة بنظرية المؤامرة ومعنديش هوس اضطهاد لكن مؤمنة جدًا إن القوي بياكل الضعيف وإن الضعيف بردو لو جت له الفرصة مش هيفرق عن القوي كتير.

الميزة النسبية أو التنافسية اللي أنت بتتكلم عنها هي بردو في المقام الأول والأخير بتصب في مصلحة الشركات، هي كان همها في المقام الأول تخفيض التكلفة وده كان غير متاح لأن العمال في الدول الرأسممالية هيرفضوا أي تخفيض في أجورهم أو مستوى معيشتهم وعليه فهي هتدور على عمالة رخيصة في المقام الأول بغض النظر عن مهارتها لأنها هتكون بتقوم بعملية صغيرة غير معقدة أصلاً
وع حسب دراستي للإقتصاد يعني فالميزة النسبية دي هي إنتاج وحدة المنتج في أقل وقت وأقل تكلفة، بردو ده في مصلحة مين العامل اللي عاوز يسابق الزمن وبيتحط تحت ضغط ولا الشركات؟

بعدين مع احترامي ليك يا أحمد "الشركة الأجنبية بتأكلك وبتأكل عيالك"؟ دي جملة انبطاحية للغاية وشعور إن الشركات بتتفضل على الدول النامية ده هو اللي بيتم ترويجه عشان الدول النامية يفضل عندها شعور بالدونية، الشركات الأجنبية بتستفيد منك أضعاف ما بتستفيد منها؛ هي مش بتأكلك وبتأكل عيالك محبة وطيبة قلب
ثانيًا هي "بتاكل" موارد ومستقبل عيالك؛ الشركات دي بتيجي هنا ترمي ملوثات ونفايات مش هتقدر ترميها في بلدها بسبب قوانين المحافظة على البيئة، الموارد أهمها النفط والأسماك وغيرها وغيرها اللي فضلت سنين تاخدها إما بامتيازات وإما بالتحايل والنصب
الشركات تأثيرها سيء مش على الدول النامية بس على الدول الغنية كمان وعلى حكومات الاتنين وعلى الفقرا في الاتنين

أما الاشتراكية والاشتراكيين وآراهم فهي مش مجال مناقشتنا؛ ومعتقدش إن الشخص اللي بيرفض ممارسات الشركات الرأسمالية وأفكارها يكون بالضرورة اشتراكي
عن نفسي أنا عاوزاها أناركية اقتصادية ونخلص بقى :D

نعلق تالني وتالت وماله، هي الدنيا ليها طعم دون الجدالات الكتيرة :D

النقطة الأولى أعتقد تقصدي بيها أطروحة "جلال أمين" في كتاب "قصة الاقتصاد المصري".
وهنا فالإجبار بيكون للحاكم نفسه أكتر ما هو للشعب، وإن كان كلامه بيمشي على مقدرات الشعب وأقدارهم. والكلام كان عن عصر الامبراطوريات التي لا يغيب عنها الشمس، دلوقتي الدول عندها استقلالية أكبر في صنع قراها عن الأول. مفيش دلوقتي دولة يتم احتلالها عسكريا عشان عليها فلوس.

مصر كدولة بقالها قد ايه مثلا بتفاوض عشان تاخد قرض دولي؟ سنين ورا سنين، وحاكم ورا حاكم، واحنا بنحفى على قرض؛ فصعب أصدق فكرة إن حاجة زي صندوق النقد هي ضرر عظيم للدرجة

العمال في الدول الأفقر هم اللي بيتكالبوا على الوظائف المالتي ناشيونال لأن فلوسها أحلى. بمعنى إنها مصلحة متبادلة. دول الخليج مليانة بهنود وبنجالاديشيين ووبنغاليين سايبين أوطانهم عشان يشتغلوا في الغربة بربع مرتب المواطن الخليجي ومبسوطين. وفي مصر معظم الشباب هيموت على أي شغلانة زي كدا في أوروبا أو في شركة أجنبية عاملة في موطنه.
كملخص، الشباب هم اللي بيجروا ورا الشركات، مش الشركات هي اللي بتجري وراهم

الزبالة اللي بتترمي، بتترمي بايد مواطنين الدول الفقيرة وفساد حكوماتهم . مواطن مش لاقي ياكل هتبقى نظافة البيئة من آخر همومه ومشاغله.

التعبير المهين دا كان أول حاجة جت في بالي عن الموضوع، بسبب اللي بشوفه كل يومين من حكاوي الشباب اللي اتوظفوا في شركات أجنبية أو حتى راحوا يومين شرم الشيخ كفواعلية!. كلامهم بيبقى كله عنتزة ومازوخية مقرفة.
وهم الصراحة عندهم حق، مبالغهم مغرية بالنسبة لباقي الشركات المحلية. على الأقل بتديهم الرفاهية إنهم ميشتغلوش شفتين في اليوم زي معظم اخواتهم من المصريين

الأناركية الاقتصادية فكرة نظرية مثيرة ومخيفة بما اننا معاصرناش تطبيق عملي لها بنجاح. وكمان أنا كمصر لو قسمت قوة الجيش على عشرة ولا عشرين شركة أمن، فيبقى سهل جدا إن أي عدو خارجي يحتلني زي تركيا ولا اسرئيل.
متعمقتش بالقدر الكافي في أفكارهم، بس في الخطة يعني إني أبقى أعدي ولو سريعا على "المانيفستو التحرري" بتاع مرواي روثبارد كأحد أهم رواد المدرسة دي.

في النهاية ربنا يرزقنا الواسطة الصالحة اللي تحط رجلنا على أول طريق الشغل

زوايا رؤيتنا للأمور مختلفة، ده واضح جدًا
فهنفضل نشرح لبعض من غير ما نوصل لشيء

:)

بصراحة الاقتصاد الكلى و كل ما يخص الاقتصاد الكلى ...لا يهمنى ..يعنى لما تلاقى خبير اقتصاد يقولك لازم نسحب استثمارات خارجية اكتر لرفع معدل المش عارف ايه و خفض المش عارف ايه ..عشان على المدى البعيد يحصل مش عارف ايه ......كل دا بلح ..بحس انى زى حزلئوم لما اتلخبط و قاله :"اه يعنى اعمل ايه يعنى ؟ قولى على حاجة اعملها , تلاقيك انت اصلا شكلك مش عارف" ...انا ك مواطن هنتعش امتى ؟ قعدت ادور على اجابة السؤال دا كتير ...لحد ما عرفت الاقتصاد الجزئى macro economics "اقتصاد الفرد" ...self financing....personal wealth building
...اول و احسن حاجةا لواحد يعملها للفقراء انه ميبقاش منهم ...لا دولة و لاا حكومة و لاا جيش و لاا مستثمرين اجانب يهمه الفرد ازاى يبقى غنى .. الحكومة بتشوفه ك مصدر للضرائب و الرسوم...الجيش بيشوفه مجرد نمرة مجند ...المستثمر بيشوفه مجرد مستهلك مشترى.... محدش هيبص له ك مشروع "غنى" الا نفسه ...

Ramy wrote: "بصراحة الاقتصاد الكلى و كل ما يخص الاقتصاد الكلى ...لا يهمنى ..يعنى لما تلاقى خبير اقتصاد يقولك لازم نسحب استثمارات خارجية اكتر لرفع معدل المش عارف ايه و خفض المش عارف ايه ..عشان على المدى البعيد ي..."

أنا متفقة جدًا جدًا
بس أعتقد بردو إن في محاولات الشخص إنه يكون غني بيتأثر بردو بالاقتصاد الكلي

الموقع مبيرضاش يعمل ريبلاى على كومنت ف كان لازم اكتب لك كومنت جديد... حتى ما تسمينه "تأثير" الاقتصاد الكلى...على اقتصاد الفرد ... هو محاولة من "الحكومة" لاغناء نفسها و افقار الفرد ..زى ما قلت لك برسوم اوض رايب او حتى تعوم العملة ..لتخفى فشلها و تبتلع مقدرات و ثروات و منتجات الافراد او حتى حصيلة كسبهم و انتاجهم ... و اللى الفرد لازم يلاعب الحكومة
ب تهرب ضريب بقا
ب سوق موازى "غير رسمى"
ب اقصتاد كامل موازى غير رسمى
هو ينتفع ...العامل لديه ينتفع ...السائق اللى بينقل له المواد الخام و بينقل لاحقا منتجاته ينتفع ..صاحب ارض المصنع او مؤجر مكان الورشة ينتفع ..كلهم ينتفعوا ساعتها هتلاقى الحكومة بتصوت او بتحاربهم او بتغلق لهم مصنعهم بحجة "افساد الاقتصاد" ...على الرغم من الاقتصاد الغير رسمى نشأ قبل نشاة الحكومات نفسها اصلا....
القصد ..اه الواحد زم يكون فاهم اقتصاد كلى عشان يتحاشاه و يتجنبه و يفوت الفرصة على المستثمر الاجنبى و الحكومة و اى جهة انها تنتفع من وراه ... ب انه يكون منتج مستكفى ب الانتاج المحلى و مدخر و يكون هو فى حد ذاته مستثمر ..ساعتها لا حكومته و لاا حكومات العالم كله ليها حاجاة عنده ....
و اهو على الاقل لو مقدرناش ننفذ حكمة :" لابد ان ننتج غذائنا و دوائنا و كسائنا ب انفسنا"..لو مقدرناش ننفذها على مستوى الشعب و الحكومة .... يبقى ننفذها على مستوى الافراد و لتحترق كل حكومات العالم ....
#فليذهب_الشمول_المالى_الى _الجحيم

انما نغمة اصل الحكومة و الشركة الدولية الفلانية العابرة للقارات بتسرقنا و بتفرقنا ... دى نغمة الضعيف...بريطانيا مكنتش مهتمة ب حركة غاندى و جمعه للهنود حواليه مقلقتش بس الا لما قال انه هيروح يستخرج الملح من البحر هو و الهنود ....ليه ؟ لانها كانت بتستخرج الملح و بتبيعه لهم ...
الثورات و الحروب و حتى الاستعمار محركه الاساسى الاقتصاد ....
محدش بيسرق حاجة من جيب حد ...الا لو حد سمح له او سهل له ..او تواطىء معاه ..او حتى صاحب الجيب دا رفع ايده كدا و سابه يسرقه.... لو كلنا بكره قررنا الا نشرب بيبسى مثلا ... شركة بيبسى مش هتيجى تحتلنا و لاا هتجبر حكومتنا على انها تفتح لنا بوقنا نشربه ... ممكن نمتنع عن شرب البيبيسى و دا كويس بس الاكوس لو شركة محلية لانتاج المشروبات الغازية فتحت...

Amira wrote: "زوايا رؤيتنا للأمور مختلفة، ده واضح جدًا
فهنفضل نشرح لبعض من غير ما نوصل لشيء

:)"

ولا يهمك يا أميرة. الجدالات عمرها ما بتخلص، ولا حد هيحط في جيبنا فلوس على الكلام، فاكس والله