مختارات من شعر سيد حجاب Quotes

“طعم الحنين ..مُر
ولساني
فيه حنين”
― سيد حجاب, مختارات من شعر سيد حجاب

“الشمس فاكهة الشتا
الحب .. فاكهة الربيع
مين يشتري حكمة حياتي الميتة
ويردني رضيع ؟”
― سيد حجاب, مختارات من شعر سيد حجاب

“وصية سيد حجاب
ولما أموت
لو مت ع السرير ابقوا احرقوا الجسد
ونطوروا رمادى ع البيوت
وشوية لبيوت البلد
وشوية ترموهم على تانيس
وشوية حطوهم فى إيد ولد
ولد أكون بُسُته .. ولا أعرفوش
ولو أموت ..
قتيل – وانا من فتحة الهويس بافوت -
ابقوا اعملوا من الدما حنة
وحنوا بيها كفوف عريس
وهلال على مدنة
ونقرشوا بدمى
- على حيطان بيت نوبى تحت النيل –
اسمى”
― سيد حجاب, مختارات من شعر سيد حجاب

“من انكسار الروح في دوح الوطن
يجي احتضار الشوق في سجن البدن
من اختمار الحلم يجي النهار
يعود غريب الدار لـ أهل وسكن

ليه يا زمان ما سبتناش أبرياء
وواخدنا ليه في طريق ما منوش رجوع
أقسى همومنا يفجر السخرية
وأصفى ضحكة تتوه في بحر الدموع”
― سيد حجاب, مختارات من شعر سيد حجاب

“يا سندباد .. يا سندباد
خدني لبلاد غير دي البلاد
لزمان خلاف ده
ولعباد غير دي البلاد”
― سيد حجاب, مختارات من شعر سيد حجاب

“يا أصحابي عجّزنا كده ..
قبل المعاد !
يا أصحابي ما تبكوش علي كتوفي
بقول
أنا عمري ماكنتش جمل صلب
اسمعوا
أنا مكنتش يوم شيال الحمول
اتعتعوا
ووسعوا لي ف صدركم
حتة عليها انحني
وأقول كلام بيهزني
بيغلي جوايا ونفسي أطلعه
يا أصحابي .. لا .. متوسعوش
ليا أنا
داحنا يادوبك كل واحد مننا
بيقول كلامه
وهو برضو يسمعه
يا أصحابي آه .. حتي الجمل
بما حمل
ميّل .. ونخّ”
― سيد حجاب, مختارات من شعر سيد حجاب

“يا طبق بنّور
في السما بيدور
فوت مره وزور
قلبي المكسور”
― سيد حجاب, مختارات من شعر سيد حجاب

“..بين رهبة م التوهة وتوبة برغبة
..سددنا دينا وغيرنا أغني وأغبي
..وقلوب مصاحبة الحق صاحية ومشاغبة
..وقلوب تدوب ف قلوب ولا هي دارية”
― سيد حجاب, مختارات من شعر سيد حجاب

“ماتت غناوي فرحة البنّية
لا المسلمين صلوا علي قبرها
ولا النصاري صلصلوا بالجرس
ولا حوطت جسمها المنهوك
بنادق الحرس
يا ويل بلد بيضيّع المقتولين
يا ويلكم .. وبصوا
دمي فوق كفكم
ح يزفكم بالدم .. متجرسين !”
― سيد حجاب, مختارات من شعر سيد حجاب

“قلبي سرح
ويا الشبك لما انطرح
والنجم وسط الريح
يشاور ع الطريق
زي الصديق
ياريت يا نجم السكة
تصبح بجناحين
وتطير .. تطير .. معرفش فين
لكن تطير
وتاخدني وياك في بحور
غير دي البحور”
― سيد حجاب, مختارات من شعر سيد حجاب

“يا قمر لا تاخدني علي جناحك
ولا توريني حلمات النور
بس تعالي
فوت من شابكي وتعالي
شوف الحالة
وابدر في عز الضلمة النور
النور .. النور”
― سيد حجاب, مختارات من شعر سيد حجاب

“بابص لحيطان اليوت
باحس اننا ممثلين
في لعبة الموت البطيء .. المضحكة”
― سيد حجاب, مختارات من شعر سيد حجاب

“يا اصحابي .. ولا تستغربوا
دانا كلي شوق
شوقي سؤال
سؤالي إيد
بتدق باب
وكام أيادي تدق باب .. بلا جواب !”
― سيد حجاب, مختارات من شعر سيد حجاب

“خليك هنا وحاسب
جبال المغماطيس
خليك شديد
مهما يكون الليل غطيس”
― سيد حجاب, مختارات من شعر سيد حجاب

“دقيت علي باب الحبيب
واهو بعد ما الباب يتفتح
رجليا عارفة سكتي
وف قلبي عصفوري لحبيبي غنوته
الباب فضل مقفول .. وعصفوري اندبح”
― سيد حجاب, مختارات من شعر سيد حجاب

“النجم داب
داب في شجن ملموم سحاب
قلبي رجف
لحن الأمل هدّا ووقف
شديت حبالك يا شبك
ماطلعش غير حبة سمك
حبة سمك .. والليل خراب”
― سيد حجاب, مختارات من شعر سيد حجاب

“لكن دانا في كل شهر
في عروقي ميه كل بحر
وف قلبي بتموت
ميت فلوكة بميت أمل”
― سيد حجاب, مختارات من شعر سيد حجاب

“يا مودّع .. الطريق غميق
وقلوعي زي قلبي طيبة وجريئة
أنا بارتعش من فُرقة الصديق
وياما اطول الطريق
من غير صديق يحمل همومي معايا وقت ضيق
وأقاسمه فرحتي البريئة”
― سيد حجاب, مختارات من شعر سيد حجاب

“بدل ما نصحي .. نتقتل في الفجر ؟!”
― سيد حجاب, مختارات من شعر سيد حجاب

“الليل علي مداين حزينة اتفرش
الليل .. بضافر قسوته
في قلبي هبش
نفسي اتكرش
وكل شيء في الدنيا كش ّ”
― سيد حجاب, مختارات من شعر سيد حجاب

“هنا صحاب بالإسم .. معرفتهمش
مديت ايدين شماريخ ولا طلتهمش
هنا الوشوش الصمغ بتلفني
والصمغ موجه حويط
قراره غويط”
― سيد حجاب, مختارات من شعر سيد حجاب

“صابر آه ، وآه م الصبر
الشهر شد تلات سنين كالدهر
والناس في توب القهر ما بتبرا
والناس في توب القهر ما بيقولوا”
― سيد حجاب, مختارات من شعر سيد حجاب

“الليل خراب
عفاريت رياح سود تسكنه
تنعق ولا مليون غراب”
― سيد حجاب, مختارات من شعر سيد حجاب

“وجروحه في ضهره
بتشر عمر لحد ما طول العذاب .. قهره
وفي نني عينه كلمة .. ما بتنقال
عشانكم أنتم يا حبايبي .. أمو...
وبقيت حروف الكلمة يتقطموا”
― سيد حجاب, مختارات من شعر سيد حجاب

“والريح صرخة
لكن منيش سامع
غير صرخة الفجر الوليد النور”
― سيد حجاب, مختارات من شعر سيد حجاب

“في بحيرتنا المليانة بحيرتنا
بتنوح الريح .. يادي الصرخة
كنا كتمناها في صدورنا
لما انقطمت تحت حمول الهم ضهورنا”
― سيد حجاب, مختارات من شعر سيد حجاب

“الغلّ فحل جاموس جوايا
فرعون في حشايا
لاطفح في وش الندل ولا اخلي
وارشق في قلبه السلّ من غلّي
واهدّه بقوايا”
― سيد حجاب, مختارات من شعر سيد حجاب

“الأيام
*****

أيام.. ورا أيام.. ورا أيام
لا الجرح يهدا.. ولا الرجا بينام
ماشى ف طريج الشوج.. لكن جلبى
مطرح ما يمشى يبدر الأحلام
*********
العتمة سور .. والنور بيتوارى
وايش للفَجَارى فى زمان النوح؟
ميتى تخطّى السور يا نوارة...
ويهل عطرك ع الخلا.. ويفوح؟!
ويشدنا لقدام..
أيام.. ورا أيام.. ورا أيام
****
من عتمة الليل.. والنهار راجع
ومهما طال الليل بييجى نهار
مهما تكون فيه عتمة ومواجع
العتمة سور.. ييجى النهار تنهار
وضهرنا ينْجام
أيام.. ورا أيام.. ورا أيام”
― سيد حجاب, مختارات من شعر سيد حجاب