كلام موزون Quotes

“زمان كانت دمعتي عزيزة
ومُستحيل تنزل ..
قدّام أي حد ،
ودلوقتي بقت قريبة
ومن السهل تنزل ..
وتسيل كمان ع الخد ،
يا ترى إيه السبب!
ليه كل ما أكبر ..
دموعي تقرب وتكتر!
يا ترى ده خوف من الأيام
واللي جاي!
ولا حُزن عشان فهمت الدُنيا
ماشية إزاي!!”
― نورا خشبة, كلام موزون

“فيه حاجات في القلب
ماتتقلش ولا تتكتب ..
فيه حاجات
تتحس وبس .”
― نورا خشبة, كلام موزون

“بحب أوي كلمة «إحساس»
معناها بجد كبير ..
ووراها حاجات كتير ،
بس يا خسارة ..
إنعدمت في كتير من الناس .”
― نورا خشبة, كلام موزون

“هتصالح مع نفسي
أيوة هصالحها ..
لازم أصالحها
وأكلّمها ..
وأهتم بيها وأفهمها
علشان ..
ماندمش في النهاية
وأبقى أنا
اللي ظلمتها معايا .”
― نورا خشبة, كلام موزون

“عندي أمل في بُكرة
ورسماله في قلبي فكرة
وإمبارح بحلوه ومُره ..
إتحفر جوايا ذكرى ،
واللي جاي هيبقى أحسن
طول ما أنا راضية بقدري
وحامدة لربي وشاكرة .”
― نورا خشبة, كلام موزون

“مُشكلتي مش ببطّل تفكير
حتى النوم من عيني بيطير ،
وأعوِّد مُخي يهدى ويرتاح ..
ألاقيني دخلت في بير تفكير .”
― نورا خشبة, كلام موزون

“عايشة في دنيا غريبة
مُفتقدة فيها الطيبة ..
الكل في وشّي يبتسملي
وبكل الحُب يبانلي ،
وهُمّا من ورا ضهري ..
هاريينّي نميمة وغيبة .”
― نورا خشبة, كلام موزون

“كل ما بعرف ناس أكتر
وبيقابلني كتير من الظروف ..
بيزيد إقتناعي بالمثل اللي بيقول
«اللي يعيش ياما يشوف» .”
― نورا خشبة, كلام موزون

“يا رب إبعد عنّي
الغرور والكسل
والإحباط والفشل
واليأس والملل ..

يا رب عوِّدني
في كل شيء أعمله
تكون نيّتي ..
إنه في سبيلك يتعمل .”
― نورا خشبة, كلام موزون

“أنا ماشية بإحساسي
عُمره ما يوم خاننّي
وقُربي من ربنا
هو اللي مطمني .”
― نورا خشبة, كلام موزون

“على إيه نافش ريشك
ونافخلي طرابيشك!
في الدنيا الكل سواء ..
ومسيرها تقصقص ريشك .”
― نورا خشبة, كلام موزون

“اللهم أصلِح حالي
وحققلي اللي في بالي
ويسّره بالنسبالي
وإكرمني وسهلهالي
يا رب نوِّلهالي
وأجِب سؤالي
وعلى خير تمِّمهالي
آآاامــيـن .”
― نورا خشبة, كلام موزون

“الدنيا كلها مصالح
والكل فيها طايح ..
واللي فيها يلعب ع الناس
وينافقهم ..
يقولوا عليه ناصح
والطيب اللي في حاله
اللي يستحق يكون ناجح
يضحكوا عليه ويقولوله ..
يا فالح .”
― نورا خشبة, كلام موزون

“عمري ما ندمت
على حاجة عملتها
أو حاجة حصلتلي
وزعلت بعدها ..
علشان كل حاجة
ربنا قدّرها تكون بوقتها
وكان لازم تحصل
علشان أقدر أوصل
للخير منّها ..
يعني مراحل في حياتي
وكان لازم أعدّي عليها
علشان أتعلّم منها
وماغلطش بعدها .”
― نورا خشبة, كلام موزون

“من كرم ربنا ورحمته بينا ..
بيخلي الأحزان تيجي مرة واحدة
وورا بعضها ..

عشان الحزن مايطولش في أيامنا وفينا ..
ونلاقيه عشش في قلوبنا
ومابيخرجش منّها ..

بس أكيد برضه محدش بينسى أحزانه ..
لكن مع الوقت بننشغل في حاجات غيرها
بتبعدنا عنّها .”
― نورا خشبة, كلام موزون

“شايلة في قلبي
من ناس كتير
وقلبي بيقوللي..
بلاش تشيلي منهم
ده الحِمل عليّا بقى كبير
وتعبت..
من كُتر ما شيلت منهم
ومهما تشيلي فيّا
هتشوفي برضه منهم!
سكت..وقعدت أفكّر
رد قلبي وقاللي..
سامحي وإنسي
هتبقي الأحسن
وربنا وحده هيحاسبهم .”
― نورا خشبة, كلام موزون

“تعامل الناس بطيبة
..وحُسن نيّة
يقولوا عليك عبيط
تاخد بالك..
وتعاملهم بحذر وجديّة
يقولوا ده بقى خبيث وحويط
لا كده عاجب ولا كده يعجب!
إن شاالله مشيتلهم ع الحيط
سيبك منهم هتجننهم
ويتنططوا منك تنطيط .”
― نورا خشبة, كلام موزون

“مش هتنازل عن أحلامي
ولو العالم كله عاداني
مايهمنيش..
يقولوا عبيطة..
ومش عارفة مصلحة نفسها
يقولوا مش فاهمة الدنيا..
وهتجني على نفسها
برضو مايهمنيش..
غير إن أحلامي
تتولد وتعيش .”
― نورا خشبة, كلام موزون

“هتفضل لحد إمتى
أفكارك..
مركونة ومِتحَوّشة
ودورك يا دوب
مُتفرِّج..
على ناس تانية
مكوّشة..
قوم فز إسعى لهدفك
وإياك تنام م العِشا .”
― نورا خشبة, كلام موزون

“يا عيني ع اللي قاعد
وحاطط إيده على خدّه ..
لا عنده مبدأ ولا له هدف
يحركه أو يشدّه ..
وزي ما التيار بيوديه
بيروح معاه ويهاوده ..
حتى لو حاجة غلط ومتناسبوش
الإختيار والهدف ده معندوش ..
لأنه من الأول مفيش مبدأ
فـ ما بيصدّق .. يتعلّق بشيء
ومايقدرش يصدّه .”
― نورا خشبة, كلام موزون

“إنسان حقيقي بجد غريب
يوم أخرس ويوم رغّاي
يوم يطمنك إنه قريب
ويوم مشغول ويوم نسّاي
ودايماً غامض ومُريب
طب وده معاملته تبقى إزاي ..!؟”
― نورا خشبة, كلام موزون

“مسكت ورقة وقلم
وقولت لنفسي ..
هشوف إيه أول حاجة
هتيجي في بالي وأكتبها ..
لقيتني كتبت حروف إسمك
وأنا اللي فكّرت نسيتك ،
وكنت حرّمت أكتبها!”
― نورا خشبة, كلام موزون

“أنا ماشية ضد التيار
وأنا عنيدة وده قرار
من حقي أجرّب وأختار
يا ناس إفهموني ده مش هزار
ولا حتى سذاجة أو إستهتار .”
― نورا خشبة, كلام موزون

“شكراً لكل حد ظلمني ..
شكراً لكل حد زعّلني ..
شكراً لكل حد جرحني ..
شكراً لكل حد إتكلم عنّي ..
لإنك بظلمك وغدرك وجرحك
علمتني كتير ..
وخرّجت من جوايا كلام
جُزء من إحساسي ومنّي .”
― نورا خشبة, كلام موزون

“بستغرب ع اللي
يبان عليه الحُب
وكاتم ومخبّي إحساسه
ومشاعره جوّه قلبه
وخايف يقول ويصارح
ويدافع عن حبه!

وبيبعد ويهرب من حبيبه
وضميره راضي وسايبه
وبيشتكي من الفُراق
ومستسلم للظروف والبُعد
ويقول مش ذنبه!

وبجد ده يبقى إنسان
أناني وظالم وجبان
وخسارة فيه اللي يحبه

لو يعرف إنه لو إتجرّأ
وعمل اللي يقدر عليه
إن ساعتها حبيبه
مش هيسيبه
وهيقف جنبه ..

أكيد هيندم ع الوقت
اللي ضاع في حيرة وعِناد
وحبيبه مكنش معاه وبقربه .”
― نورا خشبة, كلام موزون

“وشوش وشوش
ماشيين بنقابل وشوش
فيه بنعرفه وفيه مابنفهموش
فيه بنرتاحله وفيه مابنطيقوش
وفيه تلاقيه بوشّين..
كل مرة يقابلك بواحد م الإتنين
ومن النوعية دي هتلاقوا كتير
ف ماتستغربوش”
― نورا خشبة, كلام موزون

“نفسي يصحى الضمير والإنسانية
جوّه قلوب كل البشرية ،
وبدعي ربنا يجعلني
ولو سبب صغير ..
وإني أكون دايماً إيجابية .”
― نورا خشبة, كلام موزون

“تسمع منه كلام يشيّب
فـ ده يشتم وفـ ده يعيّب
وكإنه كامِل مُتكامِل ..
مافيهوش ولا حاجة تتعيّب
ويقوِّلك كلام مقولتوش
ويفشُر عليك من غير رتوش
وتواجهه بحقيقته ..
يعمل فيها بريء وطيب .”
― نورا خشبة, كلام موزون

“بحب كتير أنام ..
علشان أهرب من دُنيا الواقع
لدُنيا الأحلام ..
أحلامي اللي بتمناها
ونفسي أعيش فيها وجواها ..
يعني النوم بالنسبالي
مش غَفوَة والسلام ..
ده دُنيتي أنا ,
مش أي كلام .”
― نورا خشبة, كلام موزون

“جوهرة غالية ومكنونة
محتاجة لجواهرجي أصيل
يخطفها ..
ويظهر بريقها ..
ويرجّع ليها من تاني لمعانها
ويقدّر قيمتها ..
ويعرف إنه غالي أوي تمنها
ويحافظ عليها ..
ومن الكون يحميها
ويحُطّها في عيونه
من خوفه ليجرحها .”
― نورا خشبة, كلام موزون