تمرين للقلب على الغيبة Quotes

“قلت لَمَّا تفوتني هانسى
مش هاقضِّي العُمر كله بين قوسين..
جوّاهم "انتَ".”
― رانيا منصور, تمرين للقلب على الغيبة

“مش حِمل تعريج في المدى
جوّايا معووج غصب عني ومنكِسر”
― رانيا منصور, تمرين للقلب على الغيبة

“الدنيا غولة وبتلاحقنا
مسيّبة تعابين ف راسها بتحاوطنا”
― رانيا منصور, تمرين للقلب على الغيبة

“أنا مش باحبَّك
كل الحكايه انِّي اتشبكت
ف شَعره بينّا معلّقه
و مصدّقه..
إن اللي بينَّا خطوتين
راح يخلصوا أيًّا ما كان
فَهَامِدّ لاجلن يخلصوا”
― رانيا منصور, تمرين للقلب على الغيبة

“لو كان مكتوب ع الواحد عِيشه
هاعيش
وان كانت ضعفانه وباكيه و...
مرسومه على كْرِيشَه
فهاحاسب جدًّا
لا هاسيب انا صوت العوّ العالي يخرْبشها
ولا هارجع عمَّا نويت
هاتلكِّك
وهاسَفْلِتْ في الحلم السِكه
وأظبّط عمري على المكتوب
هاقبل بالنَّصّ صحيح
لكني هاصيغه براحتي
واغيّر خَطُّه”
― رانيا منصور, تمرين للقلب على الغيبة

“وامّا تطلب منّي اقولها
مش باقول غير برضه "حَبَّه"
ما انت غالي عندي حَبَّه
أصل "حَبَّه" كلمة العيل زمان
لَمّا كان مايلاقي بين كفِّينُه كلمه
بيها يعرف يحكي صحّ..
لاجل يوصف قد إيه بيحب "حد”
― رانيا منصور, تمرين للقلب على الغيبة

“حابّه عمرك لَمّا بيسلِّم عليَّا بالكفوف
حابّه لَمَّا تقول لي: "إيه؟"
وابقى فاهمه يعني إيه
وامّا تيجي ف مرّه سيرتك.. باندهش
هو ممكن حد غيري يجيب في سيرتك؟!”
― رانيا منصور, تمرين للقلب على الغيبة

“يا حيّ..
جاوب ع النِدا
ميّت بيرفع صوته لجلن يستجير
فاني ومالهوش غير يعاود رفع إيده
يقيس دراعه
طال لفين”
― رانيا منصور, تمرين للقلب على الغيبة

“روحي اتمَلت تعاوير ف بُعدك
وانت قادر تبقى جنبي!”
― رانيا منصور, تمرين للقلب على الغيبة

“أغنِّي
لاجل تنساني عيون الفُرس والفرسان
عشان ملّيت من الدوشه”
― رانيا منصور, تمرين للقلب على الغيبة

“اكتشفت..
إن قلبي فرع ملعون بالخَضار
خِصب أكتر م اللزوم
مهما يجرى فيه بيطرح
وامّا تقطع منه يتبجح وينجح!
وامّا تجرح وشّه
يدعي بكل قوه
انك تحب
أصله ملعون بالخضار
خصب أكتر م اللزوم!”
― رانيا منصور, تمرين للقلب على الغيبة

“بيقولوا الغوص..
تمرين للقلب على الغيبة
ما حاولت اتنفس من كام بَحر
وماعرفتش
مش عارفه اتعوَّد ع الْمَيَّه
الْمَيّه بتوجع..
حاسَّاها..
لَمَّا اتلقَّاها ومانتاش جنبي تعلّمها تحنّ عليَّا”
― رانيا منصور, تمرين للقلب على الغيبة