مشاهد Quotes

“قواعد الوحدة الستة

1
الوحدة حُضن المُشتاقين للُقا
الوحدة وطَن كُل متغرب
الوحدة دفا وقت البُكا
الناس بتبعد - والوحدة بتقرب .
2
فَرق ما بين
إضطرارك للوحدة . .
وحاجتك ليها
الأولانية هتعذبك
والتانية صدقني . .
هتستمتع بيها .
3
الوحدة دايرة . . وإنت مَركزها
فطبيعي مهما تلف . .
هتفضل جواها
الدُنيا قاسية وإنت هدفها
ولجل ما تخف . .
فالوحدة دواها .
4
لما الناس تَبيعك . .
إشتري الوحدة
لما الناس تسيبك . .
إتحامي فيها
الوحدة بنت جَدعة
يوم ما تحتاجها . .
أكيد هتلاقيها .
5
مين قال إن الوحدة
يعني مفيش حد « معاك »
هتحس الوحدة لما . .
يبقي مفيش حد « جواك »
6
ساعات الوحدة بتكون أحسن
من ناس مكسبهم خُسارة
وناس خُسارتهم مَكسب
الوحدة هتفضل حقيقة حتي
لو كُل الناس طلعت مقلب .”
― محمد الحويف, مشاهد

“بسم اللي عَاشُوا يحسَبوها
بسم اللي خَافوا م الحَياة
بسم اللي إختاروا يتوهوا
علشان خافوا من النجاة !
بسم اللي كان قَرارهم
إنهم مش هيقرروا
بسم اللي كان إختيارهم
إنهم هيضيعوا
كُل فُرصة لحاجة حلوة
لجل إنهم خَايفين
بسم اللي كان نِفسهم
بس ماقالوش عايزين
هتعيشوا الحياة كام مرة
لجل ما تفضلوا ساكتين
كل اللي عاشوا خايفين . .
ما عاشوش
كل اللي كانوا مُترددين . .
ما كانوش
كل اللي عاشوا بيحلموا
حتي لو ماحققوش
يكفيهم شَرف الحِلم
يكفيهم إنهم ماكانوش
ضيوف شَرف فـ الفيلم !”
― محمد الحويف, مشاهد

“فتح الولد عينه . .
لقي وطن مايعرفهوش
لقي سجان حابسه في أرضه . .
وأرضه مابتنصفهوش
فتح الولد عينه . .
ما شافش مـ الخرطوش .”
― محمد الحويف, مشاهد

“فتح الولد عينه
لقي وطن مايعرفهوش
لقي سجان حابسه في أرضه
وأرضه مابتنصفهوش
فتح الولد عينه
ما شافش مـ الخرطوش”
― محمد الحويف, مشاهد

“عارفة ؟
حياتي من غيرك منفي . .
زي بيت مفيهوش سُكان
زي وطن مفيهوش أمان
زي حد من برا شجاع
بس من جواه جبان”
― محمد الحويف, مشاهد

“زي كُل حاجة بتسيبها
بمُجرد ما منها تمِل
زي أي وَجع جَامد
ومع الوقت بيقِل
زي كُل حاجة أخرها
دايماً أوحش من الأوِل
زي اللحظة الحلوة اللي
عُمرها ما بتطوِل
زي كُل شئ وضده
زي كُل سؤال « مالك ؟ »
فتسكت لإنك ماتعرفش رده
زي نظرة عين حبيبتك
لما تحكي كلام كتير
زي فرحتها أما تغيظك
لما يبان إنك بتغير
زي كُل دول حياتك
عبارة عن حَبة مَشاهد
يجي مَشهد ثُم عكسه
ثُم مَشهد ثُم نفسه
والمشاهد رغم إختلافها
دايماً بتتكرر
وإن جيت مرة تفكر
إنك تخطيت الظروف
وعكست المراكب السايرة
لو بصيت من فوق هتشوف
نفسك بتلف في نفس الدايرة !”
― محمد الحويف, مشاهد

“عارفة . .
حياتي من غيرك مَنفي
زي بيت مفيهوش سُكان
زي وطن مفيهوش أمان
زي شخص من برا شجاع . .
بس من جواه جبان .”
― محمد الحويف, مشاهد

“قواعد العلاقات السبعة

1
ضيق دايرة صُحابك
وسع دايرة معارفك
مش كل من صاحبك صاحبك
ولا كُل من عرفك عارفك
2
بين البعد والقُرب خيط
خلي دايما في فاصل
خلي دايماً خط واصل
قرب حبة وإبعد حبة
مش كُل البُعد كُره
ولا كل القُرب محبة
3
فرق ما بين
صاحبك اللي باعك . . والصحوبية
هو فاني . . وهي باقية
حبيبتك اللي سابتك . . والحُب
هو باقي . . وهي فانية
كُل صاحب بيسيب - كان لازم يجي - لجل حكمة - يمكن ماتعرفهاش
كُل حبيب بيغيب - كان رسالة - لجل أما تيجي الفرصة - ماتضيعهاش
4
البعيد عن العين
موجود في قلبك
والبعيد عن القلب
بعيد عن عينك
حتي لو موجود جمبك
5
كُل شخص بتعرفه
حتي لو علاقتكوا
نظرة . . وسُكات
بيسيب علامة جواك
وشخصيتك بتبقي عبارة
عن مجموع هذه العلامات
6
فرق ما بين
صاحبك اللي بجد
واللي من برا صاحبك
بس مش كدا من جوا
الاتنين بتعرف معاهم تحكي
بس صاحبك اللي بجد هو
اللي بتعرف فـ حُضنه تبكي
7
مفيش حاجة بتقويك
قد خُسارة اللي بتحبهم
مفيش حاجة بتنسيك
أي كلمة طلعت منهم
رحم الله الغايبين عننا
ومتع الحاضرين باللي جمبهم”
― محمد الحويف, مشاهد

“أنا نظرة مَكسُوفة ففضلت
جُوا العِين وماطلعتش
أنا كِلمة مَكتُومة وماتت
جُوا الكاتب ما اتكتبتش
أنا ذِكري محفورة وعَاشِت
لكُل إيد فـ يُوم سابت
وكُل فِكرة فـ يُوم كانت
جُوانا بس خَلاص مابقيتش
أنا صُورة مرسُومَة لواحِد
مَات وحياته ما اتعاشتش
أنا يُوم ومقرر مايجيش
أنا أكتر واحد ما أعرفنيش
أنا أصعب سؤال في الكون
"مع إن إجابته "مفيش
أنا أحلام نفسها تكُون
بس مش مَكتُوب تَعِيش .”
― محمد الحويف, مشاهد