وجوه على الشط Quotes

“بص قصادك ..
مش عسكر دى ..؟ مش أولاد ناس ..؟
مش دول ليهم أبات وأمّات ..؟
مش ليهم ايام عمر وكان المفروض تتعاش..؟
مش تعبت فيهم أهاليهم
والا جاية لاجل تموت ..
وتموت ليه ..؟
ماتعيش شبابها ليه..؟
وماتروحش السيما وما تحبشّ ليه؟
حكم الانسان ع الانسان
آه م الكاكى يا ولدى
الكاكى قانون.”
― عبد الرحمن الأبنودي, وجوه على الشط

“يا ... ه ع الدنيا لما يفلت منها
حدّ من الحلوين
إتعودنا من الدنيا تسيب فيها الوحشين
والجيّد يرحل ما بين رمشة عين
لكنّ ابو سلمى استنى الحرب اللى ودعها
فى اربعتاشر واتنين واربعين
وتمانية واربعين .. وفى ستة وخمسين
وفى سبعة وستين”
― عبد الرحمن الأبنودي, وجوه على الشط

“ليه هى الحرب دى مش حرب الكل
مش حيموت فيها ولاد الكل ؟
يبقى ليه القابض والدافع ؟ .. هه ؟
وكمان ليه ناس تتفرج
وليه ناس تانية بتدافع .. ؟ هه ..؟
بقى ده اسمه كلام

ساعات صدقنى باحس
إن تلات تربع أكل الشعب المصرى
حرام !!”
― عبد الرحمن الأبنودي, وجوه على الشط

“سيبك من الديك دلوقت يا جمالات
خلينا في حكاية الكلب الٌلسود
ماله
من بين بهايمنا وطيرنا
هو اللي انصاب
انصاب نوبتين
المرة الأولانية خد شظو ف رجليه
والمرة التانية صاروخ
كأنه ركبله أجنحة زي الطير
اتبعزق زي التبن ما يخده الريح
من ع المدرة
هوه كان كلب ولا كلبه يا جمالات
كلبه أصيلة واصله ما يخفش ع السامعين
إن كلاب الدنيا
دي زي البني آدمين
فيها الزين والشين
فيها المجرم والمسكين
اللي أصيل واللي عويل
واللي خاين واللي أمين
إنما دي كانت كلبة مش كلب
كلبة إنما واللهي يا خالي
تقول لها قلب
نتاية يا خالي بس أصيلة صح
ونبيهة صح”
― عبد الرحمن الأبنودي, وجوه على الشط