وعد اليمام Quotes

“جَرَحني الشوق . . . ماقرّبتِش
قَتَلني الخوف . . . وماهرِبتِش
ومرّيت في صحاري الدُنيا للأنهار
وماشرِبتِش
ولا.. بَلّ الكلام وِدني .
لازال حِلمي القديم عَمَّال يِراوِدني
وكُل ما أْلين . .
ألاقي قَسِوتي زادِت بَقِت ضعفين
وتِخشَنّ الصور.. والناس
وانا والدنيا مشتركين سوا فـ لِعبه
بَعِدِّ لها الجميل فيها . .
وهيَّ تعِدّ لي الأنفـــاس !”
― Khaled Selem, وعد اليمام

“بَشَجّع كُل شيء خسران . .
وبَزهد أي شيء لو فـاز
بسيط . . وبساطتي وصلِت
إني بَحسِب ( ضحكتي ) إنجاز !
وبتعامِل بمَبدأ إن بيتي إزاز
فلا بَرمي حَجَر على حد
. . ولا حَصَوه”
― Khaled Selem, وعد اليمام

“بَحِب الشمس رَغم شتايمي ليها
وكل شيء حَبيتُه مِن قلبي . .
نال مِن لساني - الموس - خُدوش
وبَحِب جداً كُل فُستان جِسمي ماحَضَنهوش
وعندي فضول - فضول قاتِل -
لكل نتيجِة قرار اختارت ماختارهوش
ومُتَقَبِّل تماماً للهزيمه . . وبَبتسِم
رغم اني قادر افوز بـ كِلمه
كِلمه واحده . . تهز أعتى جيوش .”
― Khaled Selem, وعد اليمام

“إخشَنّ صوتي . . زمان . .
و لانْ دِلوقتي . . لما اخشَنِّت الصوره قُصاد عيني
وقدِرت اشوف تفاصيل ماكُنتش شوفتها بوضوح . .
كُنت الأسير في حروب لا مَدّيت رجلي في ساحاتها”
― Khaled Selem, وعد اليمام

“مشيت في طُرُق كتير مارَسَمْهاليش القدر
وقُلت في سِرّي الكَتوم :
معنى الشجاعه .. انّي أدوس الخَطَر
معنى الشجاعه .. الموت على المبدأ
فَـ ازاي حَضَرني الموت وانا بَبْدأ ؟!
وازاي ترَكني لما شافني جبان ؟ . .
( معنى الشجاعه - بعيد - لا يِوصَلُه الإنسان )”
― Khaled Selem, وعد اليمام

“25 عام.. بحاوِل اكون أنا
من غير وِصايَه تشدّ لي الفيشَه
أو بْوصلَه بايخَه . .
ترشِدني في العيشَه
أو صوت جَهوري يقول لي : ( اه ) أو ( لا ) .
25 عام.. صوتي مِن صوتي . .
ومش مؤمن بشيء في الدُنيا غير نفسي
وإيماني بيها
جايِّ من اليقين بالله .”
― Khaled Selem, وعد اليمام