انا امشير
انا الزاهد
عن التكليم
مفيش كلام راح يساعد
لا بتلاوة..ولا بتعليم
مفيش غير أنّة التأليم
ف قلب نفسه ينساكى
انا هركع
عشان اصلّى و اهواكي
و بتقطع
عشان فى غيرى جواكى
و كل اما ربي يهديني
حنيني ليكى يغوينيبعد التشهد و التسليم
مفيش عاصي ..بالسهولة دى هيتوب
انا ايوب
صابر انا على فرقة
هتصبح كل يوم بتزيد
كاتم ألم من الحرقة
على قَدَر وشيك و اكيد
ف حاجات هتروح مترجعشي
و انا مجدع مبخدعشي
ف هتحسر انا عليكى
لكن من بعيد لبعيد
و هفضل حتى لو كنتي ف بيت غيرى
عليكي بغير
انا أمشير
اهو..بفرح
و ف عز الفرحة بتضايق
و حبي ليكى بقى لايق
و مش لايق
اهو..قدامك انا بضحك
لكن جوايا مش طايق
انا بضحك فنفس الوقت اللى بزعل فيه
و بتقلّب على قلبي
فنفس الوقت..بكون مخاويه
انا مش جزء من حبك
فنفس الوقت..عايش بيه
و برغم ان اهوائي مبتغيرش فى المكتوب
هفضل اعافر
انا الكافر
ب أى حلم مش بيكى
ب أى دعوة مش ليكى
ب أى حلم ميحققش امانيكى
ب قلب اللى خدك مني
مع اني بقلبي بحميكى
عمري ما شوفته يوم راكع
ولا قال كلام زى كلامي
لو كان غلبني فى الواقع
غلبته كتير..ف احلامي
مع اني وقت الزعل مفيش غيرى يواسيكى
لكن غايب
انا الشايب
من كل لحظة بتعدى
ف تقويمى تساوى سنين
من قلب قرب يصدى
و مش عارف هيرضيه مين
من شوفة لهفة ف عيونك
لحد بتعشقى ضيه
ليكون العشق اللى ماليكى
مهوش زيى و مش زيه
و ساعتها هنتهي وحدى
و براحة
بس المهم ..انك تعيشى مرتاحة
انا عاشق..منيش جاحد
و بهذا اخترت
اعيش راكع
و اعيش زاهد
No comments have been added yet.
