ماذا لو أن العالم بدون نساء؟
بيبدأ الفيلم بواحدة بتولد والمولود بيكون أنثى فزوجها فبيوأد البنت -حرفياً- بإنه بيعرضها للشمس ويغرقها في برميل لبن وهو بيطلب إن السنة الجاية يكون المولود ذكر -على إعتبار إنها ضرس بيرميه للشمس يا شمس يا شموسة خدي سنة الجاموسة وهاتي سنة العروسة 😑 -
المشهد التاني بعد التتر غالباً بيكون بعد فترة من إستمرار الممارسات دي والنتيجة إن الناس ملمومة في مرقص بيتفرجوا ع رقاصة وبينقطوها وهي في الحقيقة ذكر أصلاً لابس لبس الرقاصة وبيرقص ليس إلا
المشهد التالت أب وخمس أبناء ذكور في بيتهم بعد ما أمهم ماتت ومش عارفين يديروا شئون البيت ومش لاقيين أي أنثى في البلد حد فيهم يتجوزها
بتمشي الأحداث وحد في البلد بيعلن انه هيتجوز وبيعزم الناس ع فرحه وكلهم بيستغربوا لقى العروسة فين؟ وأثناء طقوس الزواج حد بيشد هدومها يعريها فبيكتشفوا انها ذكر أصلاً مش أنثى
وأخيــــــــــــــــراً كاهن البلد بيلاقي بنت عايشة مع أبوها في أطراف البلد في منطقة مهجورة محدش يعرف عنها حاجة، فبيقول للراجل اللي عنده خمس ولاد ده، وبيقرروا انهم يجوزوها للخمسة مرة واحدة لإنهم مش هيلاقوا بنات تاني
بعد الجواز وولاده قاعدين بيقسموا عليهم أيام الإسبوع فجأة الأب بيثور عليهم إنهم معندهمش دم، يعني هو اللي مجوزهم ودافع دم قلبه في الجوازة ومفكروش يعملوا حسابه في يوم!
وعليه قرر إن هو اللي هياخد أول يوم أصلاً
ولما بيجي الدور ع الأخ الصغير بيكون مختلف عنهم الوحيد اللي مبيعملش معاها حاجة وبيحاول يطمنها ويحن عليها، بيعلمها القراية والكتابة وبيلعبوا مع بعض وبيطبخ معاها ويعمل بدالها أي حاجة هي مش قادرة تعملها، وفعلياً أقصى حاجة بيعملها إنه بياخدها في حضنه
النتيجة ان أخواته غاروا منها -على الرغم من إنهم بياخدوا منها كل اللي عايزينه- ونتيجة غيرتهم قت*لوه
والفيلم بيكمل في سلسلة من التع*ذيب والإهانة والإستغلال المستمر ليها
الفيلم على الرغم من روعته الفنية إلا إنه مقزز جداً الحقيقة وصعب أوي -هو ايه المتوقع عموماً من فيلم كل اللي فيه ذكور يعني؟!-
*قبل ما حد يتحفني في التعليقات بالنسبة للناس اللي بيحبوا يتمنظروا بجملة "الحمد الله على نعمة الإسلام" هو الحمد لله طبعاً وكل حاجة بس أحب أصدمكم وأقولكم إن أحد الأصدقاء "المسلمين" من أصل قروي في صعيد مصر المحروسة كان بيقولي إن إحدى قريباته كانت كل ما تخلف بنت تبرك عليها -حرفياً- تفطسها وتدف*نها في حوش البيت عشان بنت!
فالمشكلة مش مشكلة أديان أصلاً مفيش دين لا سماوي ولا وضعي بيشجع أو بيأيد الممارسات دي بأي شكل من الأشكال، وبرضه تدين الشخص الظاهري بأي دين مش هيمنعه يرتكب أي من الموبقات اللي هو عايز يرتكبها ما دام هو عايز ومقرر ده
#Matrubhoomi_A_Nation_Without_Women #أفلام_هندية #أفلام
#سارة_الليثي