طول عمري بخاف من الطيور والحيوانات وكل الكائنات الحية غير البشرية عموماً وبخاف أقرب لهم أو يقربوا مني
بخاف إني لو قربت منهم أعمل تصرف ما أنا شيفاه عادي بس يمثل خطر بالنسبة لهم ويأذيهم وبالتالي يبقى ليهم رد فعل غير محسوب من ناحيتي يأذيني أنا ومفيش لغة تفاهم ما بينا عشان أفهمهم ويفهموني
فمن الآخر ماشية بمبدأ يا نحلة لا تقرصيني ولا عايزة منك عسل
مؤخراً كنت بتفكر في الموضوع ده واكتشفت إني مبعملش كدة مع الحيوانات بس، الحقيقة إني بعمل كدة في كل حياتي وعلاقاتي فعلاً
أنا بخاف أدخل في علاقات جديدة وأتعرف ع ناس جديدة واندمج في مجتمعات جديدة لمجرد إني معرفهمش ومعرفش إيه اللي بيقبلوه وإيه لا وهل ده هيتوافق معايا ولا لا؟ وهل هقدر أفهم ويفهموني ولا لا؟ وعشان لا يإذوني ولا أذيهم باخد جنب وأفضل قاعدة بعيد، وبحتاج فترة طويلة أووووي ع ما أتعود ع الناس وأحس إني تمام مع أسلوبهم وطريقتهم وأقدر اتعاطى معاهم؛ فابتدي اتعامل عادي بطبيعتي وأخرج من قوقعتي، بس الطبيعي يعني إن مش كل الناس هتفضل مستنياني لحد ما أطمن وأخرج من قوقعتي يعني فبالتالي بخسر ناس وعلاقات كتير في السكة 🙄
وع الجانب الآخر برضه عندي استعداد أضيع عمري في علاقات مش موجودة غير في خيالي أصلاً لمجرد إني اتعودت ع الأطراف التانية وحتى لو وجودي معاهم بيأذيني فأنا اتعودت ع الليفل ده في الأذى وتمام الأذى اللي نعرفه أحسن من الأذى اللي منعرفوش اللي ممكن يجي من الناس الجديدة اللي منعرفهاش 😐
أنا جبانة أووووي 😒


#إعترافات
#صفحات_من_حياتي
#سارة_الليثي