لما الكلام - الصمت
يبقى خروج عن المألوف
في علاقتنا البرئية
لما الفجاجة والرعونة
يبقوا وشين للحقيقة
لما التوارد في الخواطر
يبقى درب من الجنـون
يبقى انا طول عمري خايب
لما فكرتك حبيبتي
يومها فكرتك هربتي
لما سيبتي
بقية كلامك والدموع
والقلوع
اللى كأن ما صدقت
حدفتني وسط البحر وحدي
لا انا قد موج البحر
ولا قد الرجوع

طب فاكرة حرفين
ميم .. وميم
قلبين وسهم بيترسم
على شجرة الحب القديم
مش مستحيل مفروض علينا
ولا مجد ميت م الألم
عارفة الألم
احساس بوخز هيبتدي
لما ضميرك يتصدم
باللى اتظلم
علشان يجيب حق
اللى من قبله اتظلم
وبرغم من انه اتظلم
ميت وايده متبتة
في ايد العلم