الخبر الأهم فى أخبار اليوم  هو أن “الحازمون” فى محيط قصر الإتحادية لحماية الرئيس من مواطنيه.

كل الظواهر اللى فى البلد الواحد أهو بيقول إن عنده تفسير ليها إلا “الحازمون” أتباع ابن الأمريكانية مش مفهمومين أبدا.

دا الراجل ده طلع كداب واتفضح عالميا مش محليا بس إزاى لسة فى غنم مصدقين “راسبوتين” ده وكمان عندهم أستعداد للضرب والبلطجة فى سبيل النعجة الأم “الشيخ يعنى”

من فترة كان برضة الخبر الأكثر أهمية هو ذهاب “الحازمون” إلى سوريا لإسقاط بشار الأسد. طيب ما هما ممكن يرجعوا لينا مسلحين ويجربوا فينا اللى اتعلموه هناك.

النهاردة عن الاتحادية ممكن تكون التجربة الأولى لو صدق فعلا الخبر الذى نقلته جريدة الجمهورية عن “خالد حربى” منسق حركة “حازمون”.

تقريبا أتباع “ابن الأمريكانية” هم أشد فصائل الإسلام السياسى تطرفا وعنفا والدليل ما فعله اعضاء حركة “أحرار” اللى هى برضة تابعة للشيخ ابن الأمريكانية فى محيط دار القضاء العالى عندما أطلقوا الخرطوش والشماريخ على القضاة بالداخل والنشطاء المتضامنين معهم خارج المحكمة.

ومر الموضع بدون حساب كأن الرئيس ونائبه العام مش من هنا، مع أن هناك فيديو تبثه شبكة “يقين” ويعتبر دليل إدانة ضد “أحرار”.

لكن تقول إية الرئيس بتاعنا والنائب العام كمان.

….

نشر فى موقع المسخرة.