نهال أباظة > نهال's Quotes

“عارف ؟
حلوة قوي ضحكتك
لكنها بتكشفك
وتقول إنك موجوع”
― علي سلامة

“معرفش ليه ...
تنحت للدنيا كده .. !
وفجأة لقيتني مسكون بالملل ...
لاعندي رغبة ف البكا ..
ولا في الكلام ...
ولا عايز أنام ...
ولا حتي بسأل إيه ده ليه ..
وآخرتها إيه ..
وإيه العمل .......
وأخاف أقول لأي حد ….
أحسن يقوم يقلبها جد …
حد صاحبي ينزعج ...
يمد إيده جوه قلبه من باب الكرم ..
عشان يشاركني الألم ...
أو يستلفلي من لئيم حبة أمل ..
حالة كده ....
معرفش إيه ...
ملهاش معاد ..
ساعات تزورني ف الربيع ..
ف الحر ...
وف عز الشتا ...
وتجيب حاجات ...
لا فيها روح ولا ميته...
حالة كده ....
لا معاها تنفع كلمتين ولا غنوتين ...
ولا لقطة من ألبوم صور ..
آلاقي قلبي ف الهوا ويا الكور ...
أخاف أقول لأي حد ....
أحسن يقوم يقلبها جد ..
حالة كده ..
معرفش إيه ..
لكني بطلع منها بعد السكات ..
فاهم شويه ف اللي فات ..
حاسس أوي بحضن الصحاب ...
محظوظ أنا ...
ساعات أشاور ...
ينفتحللي ألف باب…
لكني باغلط ف الحساب ..
ومعرفش ليه
تنحت للدنيا كده ...”
― علي سلامة

“ناقص حته
وكل ما أوزن
ألاقي لسه
ناقصلي حته
أحط حته
تقل حته
وأجيب قميص
تضيع چاكته
وأعيش لي ساعة
يفوتني سته
وكل ما أوزن
ألاقي ناقص
أقول بناقص
لو هي حته
أتاري لسه
ولسه تاخد
سنين وحته
وحاجات تسيبني
وحاجات تاخدني
لحاجات تخبط
في كل حته
وأقول ها نفرح
ف يوم
ها نفرح
ويوم مانفرح
علي الله يفضل
في القلب حته”
― علي سلامة, ناقص حتة

“زهقت من قولة
دي بنت بألف راجل
أنا عايزة أحس
إني معاك مخلوق ضعيف
وإني فعلا بنتمي لجنسي اللطيف
تحميني من حزني
ومن إحساس مخيف

طول النهار مكشرة
وواخداها جد
ولمّة شعري على ورا
ومش شايفة حد
والدنيا حر موت
وأنا مليانة برد
وكل ده عشان يا دوب
أعدي الرصيف

ما عادش في الشارع شجر
بيرمي ضل
وكل يوم حاجات تضيع
وحاجات تقل
وأنا خلاص
ماعرفش ليه بقيت أملّ
واعذرني لو كان الكلام
مُر وسخيف”
― علي سلامة

“ساعات بقلق بالليل
يعني بالليل شوية كده
قبل الفجر
حسب الظروف كده
بعد العصر

خايف يوم أصحي..
وأفتح الشباك..
مالاقيش مصر


ألاقيها لمت هدومها ومشيت
لمت هدومها
علي نيلها
علي هرمها
وطفشت
وحلفت ميت يمين ماهي قاعدلنا
ماهي زهقت..
تعبت..
إتخنقت
أصلنا زودناها..
أكننا استعمرناها..
ورثناها


مصر البنوتةالحلوة
اللي زي القمر
بقت عجوزة وشايبة
وبان عليها الكبر


خايف يوم أصحي..
وأفتح الشباك..
مالاقيش مصر”
― علي سلامة

“نفسي قوي فـ قصة غرام
لحظة هدوء تحميني من حزني ومن مرالكلام
ماعدش ينفع أبقي ريشة في الهوا
ولا عادش ينفع تبقي عيشة والسلام”
― علي سلامة

“ناس ترمى الحَب للحمام وناس تدبحه
وناس تروح مع الأيام ننساها وتنسانا
وناس تكمل معانا.. زى النسيم.. يطبطب علينا
فى عز ما احنا بنجرحه !”
― علي سلامة

“وفضلت استنى استنى
لحد ما عدى آخر قطر وفات
حزنت قعدت أعيط أعيط
تعبت م العياط
قلت أتمشى أتسلّى
أتفرج ع الشوارع والناس و العربيات
زهقت
قلت أرتاح
سندت على روحى
إتلخبطت جوايا كل الحاجات
مديت إيدى ف جيوبى
لقيت شويه ورق قديم
وصور وكروت تليفونات
قلت أكلّم مراتى
افتكرت إتها خدت الدوا
ونامت من تلات ساعات
قلت أكلّم اخويا
افتكرت إنه طلع معاش مبكر
وكاره تاريخه.. ومركّز فى التأمينات
أكلّم أختى
ها تعيد وتقول نفس الحكايات
أكلّم خالى
افتكرت انه غتت غتاته
ومعايا أنا بالذات
أكلّم خالتى
قلت يا واد
دى كانت خالتى وخالتك... واتفرقت الخالات
أكلّم صاحبى صلاح
افتكرت انه سافر العراق
وفى احتمال يكون مات
قلت أنا أصطاد موزه
واعمل دماغ
بس معرفش حد بتاع مخدرات
قلت امشى فى مظاهرة
لقيت العساكر راجعين.. مشطّبين على كل المظاهرات
قلت اتصل بالساده المسؤلين
هايتهمونى بإزعاج السلطات
قلت يا رب
أنا إيه
وليه
ونسيت إيه
وقطر إيه ده اللى فات
الله يرحمك بقى يابا
والفاتحة على كل الأموت

الدستور 18 أبريل 2007”
― علي سلامة

“كنت فين يا علي ...
أمك بتدور عليك ...
كنت باحفظ ف الحروف ...
غصب عني و ع الظروف ...
خدوا دوري فى الصفوف ...
وإنتي لسه بتسألي ..
كنت فين يا علي ...
كنت باحلم بالوظيفة ...
والحرير تحت القطيفة ..
الحياة طلعة مخيفة ....
كدبة بنت آرندلي ....
كنت فين يا علي ...
كنت بسأل إيه اللي صار ...
بره جنة .. وجوه نار ...
و عرفت إيه معني إستعمار ...
من غير مدفع ولا عسكري ...
كنت فين يا علي ....
كنت ماشي بدون بطاقة ....
لا عندي شوق ولا عندي طاقة ..
بسألك وبدون إساءة ..
إمتي تاني تنوري ....
كنت فين يا علي ........”
― علي سلامة

“الجو نار ...
والرطوبة ..
طوبة ...
ملزوقة ف قفايا ..
سايق …
و محدش معايا ...
غيري أنا ...
والذكريات ..
وحبة حاجات ..
إزازة الميه ..
ونظرة عينيا ...
اللي شايفها ...
في المرايا ...
بتبص لي ..
من وقت للتاني بغباء ..
كأنها عارفة الحكاية ..
أو واخدة بالها ...
م الطريق ....
مر السفر ....
من غير صديق ...
أول شمال ...
إرجع ولف ...
الغنوة سكتت ...
و الشريط ....
عمال يسف ..
وإزاي تخف ...
يا ألم من غير جراحة ..
آدي استراحة ...
دماغي محتاجة الصراحة ...
وقلبي محتاج الحنان ...
إركن هنا ....
اشرب ياعم قهوتك ..
ويالا عشان ...
نلحق مكان ..
قبل الغروب ..
وإوعي الردار يسحب ..
ف لحظة غنوتك ...
معدش فاضل ....
في الطريق ....
ولا إستراحة .......”
― علي سلامة

“هتلف تاني ..
والعيد يوافق يوم تلات
وعشان عمرك ما اتعلمت ابدا م اللي فات
هتعدي ع الحفرة اللي ف طريق المدرسة
وتنسي وتقع ..
هتلف تاني
وتجرحك نفس الحاجات
وتشتكي من نفس الوجع
!”
― علي سلامة