Edecation Quotes

“ដែកនិងស្នោ ៖ មានមនុស្សច្រើនណាស់ដែលតែងតាំងខ្លួនជាដែក (ជាមនុស្សពិសេសអស្ចារ្យលើសអ្នកដទៃ) ទន្ទឹមនឹងការពិត មនុស្សគ្រាន់តែជាសត្វដ៏តូចបំផុតក្នុងចក្រវាល។ សម្រាប់ខ្ញុំ ខ្ញុំសូមកោតសរសើរបុគ្គលដែលចេះតាំងខ្លួនជាស្នោ ព្រោះទោះជាមានទឹកជំនន់ឡើងដល់កម្រិតណាក៏ស្នោតែងអណ្តែតលើទឹកជានិច្ច ផ្ទុយពីដែក ឲ្យតែពេលណាមានភ្លៀងផ្គរ ទឹកឡើងតែបន្តិចគេក៏សំងំនៅនឹងបាតទឹក ងើបលែងរួចទៅហើយ។”
― Kim Channa

“ការទទួលខុសត្រូវ ៖ មានសុភាសិតបុរាណមួយពោលថា "មនុស្សខ្វះអ្វីខ្វះចុះ កុំឲ្យតែខ្វះការទទួលខុសត្រូវ" ។ ដោយភាគច្រើនបុគ្គលគេចវេះពីការទទួលខុសត្រូវ ច្រើនតែជាបុគ្គលអសមត្ថភាព អវិជ្ជា ឬបុគ្គលមុខក្រាសដែលគ្មានការខ្មាសអៀន។ ខ្ញុំពេញចិត្តនឹងពំនោលរបស់ អាប្រាហាម លិងខូលន៍ ដែលបានពោលថា "ការគេចវេះ មិនទទួលខុសត្រូវក្នុងថ្ងៃនេះមិនអាចជួយឲ្យអ្នកគេចផុតពីការទទួលខុសត្រូវនៅថ្ងៃស្អែកបានទេ" រាប់ថាជាគតិដ៏ត្រឹមត្រូវបំផុត។”
― Kim Channa

“ការដាក់ខ្លួន ៖ មានអ្នកប្រាជ្ញគួរឲ្យគោរពជាច្រើនតែងទទួលស្គាល់ថា"ចំណេះវិជ្ជដែលយើងចេះ គឺបានដោយការរៀនសូត្រពីអ្នកដទៃទាំងអស់" និងមានអ្នកប្រាជ្ញគួរឲ្យគោរពម្នាក់ទៀត គឺសូក្រាត ពេលមានគេសួរថា តើគាត់ចេះអ្វីខ្លះ? គាត់ឆ្លើយថា "ខ្ញុំមិនចេះដឹងអ្វីទេ" ទន្ទឹមនឹងសូក្រាតមានមនុស្សទទួលស្គាល់ទូទាំងពិភពលោក។ ពេលនឹកដល់រឿងនេះខ្ញុំនឹកអាណោចអធ័មដល់អ្នកប្រាជ្ញ សម័យថ្មីមួយចំនួនដែលចូលចិត្តនិយាយថា"នេះជាទស្សនៈរបស់អញ" "គំនិតនេះជារបស់អញ" ធ្វើឲ្យប្រទេសយើងសម្បូរអ្នកប្រាជ្ញកៀរនឹងជើង សម្បូរអ្នកពូកែៗកៀរនឹងជើង តែអកុសល ប្រទេសបែរជាស្ថិតនៅលំដាប់ស្ទើរតែចុងពោចគេទៅហើយនៅតែមិនទាន់ភ្ញាក់ខ្លួនទៀត។ សង្ឃឹមថាយុវជនជំនាន់ក្រោយនឹងមិនគិតបែបនេះទៀតទេ គឺរៀនឲ្យច្រើន ធ្វើឲ្យបានល្ឌបំផុត លទ្ធផលពិតវានឹងប្រកាសចេញមកពីចក្រវាល ពុំមែនចេញពីមាត់ម្ចាស់ខ្លួនទេ។”
― Kim Channa