Nehad

“بص قصادك ..
مش عسكر دى ..؟ مش أولاد ناس ..؟
مش دول ليهم أبات وأمّات ..؟
مش ليهم ايام عمر وكان المفروض تتعاش..؟
مش تعبت فيهم أهاليهم
والا جاية لاجل تموت ..
وتموت ليه ..؟
ماتعيش شبابها ليه..؟
وماتروحش السيما وما تحبشّ ليه؟
حكم الانسان ع الانسان
آه م الكاكى يا ولدى
الكاكى قانون.”
― عبد الرحمن الأبنودي, وجوه على الشط

“صهيوني .. بزحف وراك .. يسبقني ليك غضبي
وحاقتلك : إحترام .. لوضعنا الأدبي
ارفع قناعي .. تلاقي وجهك العربي
وأهلك الصامتين .. في صمتهم نايمين
عجبك على صمتهم .. لا يقل عن عجبي


أخدوا على وجودي بينهم .. واستتب الأمر
خمّارهم اللي عشانه .. حبّوا شُرب الخمر
ولمّا سكروا .. انتشى زيد من شتيمة عمرو
لقيت خريطة وطنكم في العرا بترعش
وغرست انا ع الخريطة بإيدي .. شاهد قبر”
― عبد الرحمن الأبنودي, الموت علي الأسفلت

“يا ... ه ع الدنيا لما يفلت منها
حدّ من الحلوين
إتعودنا من الدنيا تسيب فيها الوحشين
والجيّد يرحل ما بين رمشة عين
لكنّ ابو سلمى استنى الحرب اللى ودعها
فى اربعتاشر واتنين واربعين
وتمانية واربعين .. وفى ستة وخمسين
وفى سبعة وستين”
― عبد الرحمن الأبنودي, وجوه على الشط

“الكلام مش مستجيب
والصمت عار
والمسافة بعيدة بين الفعل و القول البليد
لكن نحااول
لا قصيدة هاتجرى ع الاسفلت
ولاترمى حجر
ولافوق اكتافها راح تحمل شهيد
ولا هاتبعد خطر
ولا هاتقرب بعيد
الكلام اخر المطاف هو الكلام
و الدم .. دم
القصيدة توصف الدم الزكى ماتشيلش نقطة
توصف الام اللى ماتت بنتها قدام عنيها
بس وصف!
وصف جيد .. وصف خايب ..
وصف صادق .. وصف كاذب
فى النهاية كله وصف !
كل شعر الوصف
مايساويش فى سوق الحق صرخة
الكلام عن كل ده شئ م التطاول
انما .. لازم نحاول”
― عبد الرحمن الأبنودي, الموت علي الأسفلت