Heba Khalifa

“أنا أحسن واحد يقنعك تحكي…

ومابيحكيش…

وأحسن واحد يقنعك تبكي…

...وما بيبكيش…

أنا أحسن واحد يقنعك تفرح….

وأحسن واحد يقنعك تجرح…

أنا أحسن واحد ميت….

يقدر يقنعك….تعيش…”
― مصطفى إبراهيم, المانيفستو

“ما بيبكيناش ف غيابكم إلا الشوق
وما تفهموش من ضحكتى إنى ارتحت
لو حدّ فينا ارتاح يبقى اللى بيغمض ساعة الفراق
أما أنا ساعة الفراق .. فتّحت”
― مصطفى إبراهيم, المانيفستو

“وأسمع حكايات صاحبي الأنتيم
ونكلم بعض واسرح
ف ادوس علي حرف الميم دوستين ورا بعض
وبسيبه ساعات لما أزهق من كتر الحكايات
وأكتبله حاجات ملهاش معني زي الشفرة
وابعت للناس ف وشوش صفرا
وازعل منها ف أكتب طيب
وأزعل أكتر ف اكتب ماشي
وبراحتك اصلا أنا ماشي
واما أضحك ادوس علي حرف ال هه
وعلي قد الضحكه أفضل دايس
ازعل ملاقيش للحزن زرار
وبرغم بأنى معبّي وشوش
فعلا ملهوش.... إزاي حختار؟
فيه وش واحشنى وعمره ما جه
....مصطفى بيقولك
ب
ر
ب
......فيرد يقولي
ت
ى
ت

ف اطلع واقفل نور الاوضه....
واسند بدراعى على الشباك
وابص لفوق
واتمنى ساعتها اكون وياك
واسرح وافوق
واما ازهق م الوقفة لواحدى
اكمن مفيش حد معدي
ف بطّلّع شباك الدنيا
......واكتبله انا باك”
― مصطفى إبراهيم

“يارب
ياللي سايبلي الحبل ع الغارب
أنا غرقان بدون قارب
ومعرفتش أعوم وحدي
وكل ما امدلك يدي
وتنشلني
وأعوم شبرين
إديا يفلفصوا الاتنين
وأقولك سيبلي انا الباقي
تسيبلي الحبل ع الغارب
تخش المية حلقي .. اشرق
فاصرخلك .. وأقول بغرق
وأقولك عمري ما حسيبك
فتنشلني
أعوم شبرين
إديا يفلفصوا الاتنين
وأسيب إيدك
وأعيد الكرّه ميت مره
وماتخذلنيش ولا مره
تقوللي حضنهم بره
لا عمره يساع دراع سيدك
ونا لسه
بسيب إيدك !”
― مصطفى إبراهيم, ويسترن يونيون فرع الهرم