آيَــة سُـــلَيمَــان

“سلام عليكم أهل الدار
أنا آسف لو كان فيها سقالة
بس أنا عايز أحكي وأقول
من غير ما أسمع رد
عايز أفضفض وأرمي حمول
أصل أنا خلقي بأه ع الأد
الدنيا خلت عمري يزيد عمرين
تملي تحسسني إن أنا عالة
من صغري ممنوع م القوالة
محسوبة عليا الخطوة
ملحقتش أشبع وأتنطط
ولا زي عيال الدنيا أتعلم وأغلط
ملحقتش أبوح لنوران إنها أجمل بنت
وإن البوسة اللي إدتهاني زمان
لسة معلمة علي خدي
ملحقتش أبوح لأمي إنها أطيب ست
وإنها لما بتزعل الدنيا بتقلب زعابيب
كان نفسي فـ مرة أوضب أودتي
وأقعد أقلب فـ الكراكيب
يمكن تشبك إيدي فـ صورة قديمة
أتنح فيها شوية كتار وأنا متبسم
ملحقتش أكلم محمود قبل معاد القطر
كان نفسي أٌقوله إنه هيوحشني
وإني هأجر عجل أكنه معايا تمام
ملحتقش أحضن جدي قبل وفاته
وأقوله إديني نصيحة أخيرة
عارفين
نفسي أٌقعد مع نفسي شوية
آخد وأدي معاها بدون تكليف
أنا آسف، عارف إنكو مش ناقصين
أنا تقلت عليكو .. تصبحوا علي خير”
― كريم هشام