Radwa

“مش ماشيه معايا حكاية الجوهرة والدرة المكنونة دي.
إنتي يا فاطنة أغلى من الجوهرة واجدع م الدرة.
وحتى انا مش عارف منة كلمة درة.
إنتي يا فاطنه أغلى ما ماسك في ايديا.
تحويشتي وعرقي ..
واكتر من كل كنوز الدنيا.
والمسألة في القول مع فاطنه مش محتاجة كلام.
يعنى أنا لو قلتلك جوهره حتقولي معزته زادت؟
إنتي عارفه حراجي وعارفه مقدارك.
أنا ربنا جابني الدنيا من غير ورث
واداني منابي فيكي
وما طالب منه غير بس يبارك فيكى
ويديني الجهد ف دراعيني أقدف بيكى.
أغلى عندى من الولد لو ان الولد
نضر عيني ..
لكن لسه احنا قادرين نعمل ولد.
لكن انتي لا قدر رب الناس.
ما قدرشي أعكز ف طريق
إلا بيكي.
ان مالت بيا الدنيا اتكى عليكي.
تسندني إيديكي ..
وإذا كنت باقول إني في أسوان عال ..
فأنا عال
لأن العمر منفد ع الجبلاية.
والجبلاية
فيها فاطنه اللي واخدها
بسنة رب الدنيا ورسوله.
فمنين جوهره ولا ميه
حينوروا زي عنيكي المليانين طيبه وحنيه
ف لياليا ..؟”
― عبد الرحمن الأبنودي, جوابات حراجي القط

“هتلف تاني ..
والعيد يوافق يوم تلات
وعشان عمرك ما اتعلمت ابدا م اللي فات
هتعدي ع الحفرة اللي ف طريق المدرسة
وتنسي وتقع ..
هتلف تاني
وتجرحك نفس الحاجات
وتشتكي من نفس الوجع
!”
― علي سلامة

“تحتك فى ناس عايزة الأمل .. مش عاوزه ؟ سيبهولهم”
― مصطفى إبراهيم, المانيفستو

“و بتأثر
و بتحسر
على كل اللى كان ممكن
أكونه
بس ما بقيتهوش”
― مصطفى إبراهيم, المانيفستو