Status Updates From Pehchan/ پہچان

"...دراصل میں نے تو یہ جانا تھا ایک دم....ایک عجیب خاموش، پُر سکون دوپہر میں....اچانک مجھ پر انکشاف ہوا کہ زندگی کہیں بھی نریشن نہیں..."

"نریشن؟"

"ہاں! کہیں بھی نریشن نہیں....ہاں لفظ ہیں۔ اور عمل اور وقت ہے۔ جو کچھ بھی ہوتا ہے وہ وقت کا ایک ٹکڑا ہے اور کچھ ناقص لفظ اور ادھورا عمل تو یہ نریشن تو دراصل ہم خود بناتے ہیں۔ عمل کو لفظوں میں لکھنے کے مجرم ہم خود ہیں۔ اس لئے کہ وہ تسلسل جو ہم پیدا کرتے ہیں۔[۔۔۔]

"کیا واقعی میں اتنا مضحکہ خیز ہوں تسنیم؟"
"کیا؟" اس نے جنگلیوں کی طرح منہ پھاڑ کے کہا۔
"اپنے آپ کو اتنا محفوظ مت سمجھو، دراصل کوئی بھی محفوظ نہیں ہے۔ سب اندھیرے کے گول چکنے گنبد سے ننگے پاؤں پھسل رہے ہیں۔ اس نے عینک اتر کر میزپر رکھ دی۔ اُنچی سی ناک اور جلتی ہوئی آنکھوں پر گھنی سیاہ بھنویں آپس میں جڑی ہوئی تھیں۔

اس وقت بھی کہیں سوکھی گھاس میں چیونٹیاں اپنا راستہ ڈھونڈ رہی تھیں اور پرندوں کے سینے میں دل ایک ہی انداز سے دھڑک رہے تھے اور وجود کا احساس چمکتی دُھوپ بن کر کائنات پر پھیلا تھا۔ وجود کا احساسِ محض جس کے بعد اندھیرا تھا اور سکوت۔

یہ ایک طویل جامد لمحہ کی داستان ہے۔

"اور اب میں راتوں کو چوری چھپے اپنی تصنیف پر کام کرتا ہوں۔ جیسے کوئی چیز میرے اندر سے نکل کر باہر آتی ہے۔ اور باہر آ کر ختم ہوتی ہے۔ تو کیا میں چیزوں کو ختم کر رہا ہوں۔۔۔۔۔ اپنی جلد، اپنے لہو، اپنی ہڈیوں سے نوچ نوچ کر پھینک رہا ہوں؟ تو پھر چیزوں کو محفوظ کرنے ، علم کو پانے زندہ رکھنے کا اور کیا راستہ ہوگا۔ ؟ "

- ہزار پایہ از خالدہ حسین