رقاصة Quotes

“الناس قرود !
الناس – إذا اتحريت معايا الدقة – تلقاهم قرود ..
نُسّاك ف محراب السَّفَه ..
يا لُوحة مرسومة على سقف التاريخ ،
مايعة ،
وفوق رُوس القرود طايرة
خفيفة مهفهَفَة ..
إيش تاخُد الريح م التاريخ
غير اللي واخداه م البارود؟"
..............
من تجربة (رقصة جاي فوكس) - ديوان: رقاصة”
― محمد سالم عبادة, رقاصة

“مرة كان فيه شيخ قبيلة اسمُه (أميبا) ..
كان لوحدُه ..
أمه مهدُه ومنشؤُه ، وولادُه لَحدُه ..
كان شبه أول طموحات العدم ،
كان البداية ..
والخلية الإرهابية العندليبة !
يوم ما غنَّى ،
الأرض شربت غنوتُه ،
أما السما الكاشحة الحبيبة .. :
مطَّرِت سِمّ ،
وسحابها فَحّ ،
بَخّ النار فِ خدُّه .."
..................
من تجربة (رقصة داروِن) - ديوان: رقاصة”
― محمد سالم عبادة, رقاصة

“قرَّبِت خطوِة فرَس (جبريل) ..
الحَمَامي الساحر الأشهَب

خضَّرِت أرض الولد ترتيل ..
والأصيل باتع ، جسد مُدهَب

يا يتيم الناس ، يا هذا النجل ..
يا غلام الخوف ، يا إسرائيل

مدبح الرَّب اشتهاك من أجل :
إنّ عينك سارحة ف الغَيهَب"
...............
من تجربة (رقصة موسى السامري) - ديوان: رقاصة”
― محمد سالم عبادة, رقاصة

“هوِت مصر ،
سجدِت مصر ،
باتت مسَطَّلَة ..
وعَبّادة الشمس ابتدِت تختم الصَّلاة

أيادي (آتون) من فوقها شاورِت وطبطبِت ..
لكن مصر مش دايمًا
بتبقى المُفضَّلَة !
...................
من تجربة (رقصة حورمجب) - ديوان: رقاصة”
― محمد سالم عبادة, رقاصة

“الإنسان لُه رجلين
ومالوش ريش ،
كائن عاتي ...
والكلب صَمُوت ،
بيمُوت ف الموت ،
دا الكلب الذاتي !
الإنسان مفتون باللي باقولُه ،
دا جنسي ونُوعي ..
والكلب بينبَح غضبان ،
دا الكلب الموضوعي !
الإنسان شَكّ ف نفسُه بْدَبُّوس إبرة وحَلَّقْ ..
وانا رابض ع الأرض يقينًا ،
أنا كلبٌ مُطلَقْ !"
...............
من تجربة (رقصة ديوچين) - ديوان : رقاصة”
― محمد سالم عبادة, رقاصة

“أنا الملزوم ..
أدافع عن تراب أمجاد (بني مخزوم) ..
أنا ركن العرب والكعبة يا كاهِن ..
أنا مكة اللي صوت ترتيلك الواهِن :
بينسِفها ،
يصفصفها ،
ويفضل بعد موتها يزوم ..
يا حرف قُرِيش ،
يا متوسَّط ما بين المشأمة والفال ..
يا مُدَّثِر بحكم الله عليّا ،
يا سورة الأنفال ..
ياريتك ما ظهرت ،
ماكانش عقل قريش يبات مأزوم ..
.................
من (رقصة الوليد بن المغيرة) - ديوان(رقاصة)”
― محمد سالم عبادة, رقاصة