عصافير الجنة Quotes

“طول ما انت مش جاهز تموت
عمرك ما هتحس إنك عايش
طول ما بتحرق ايامك
وتقول بكرة
وبكرة يفوت
وبعده يفوت
هل يا تري ؟
تري
وتعرف إن بكرة مش بييجي
وإن يمكن لما ييجي تموت ؟”
― عبد الحميد عبد اللطيف, عصافير الجنة

“الباب اللي يقفل ف وشك قصد
إياك تخبط تاني عليه
والباب اللي يفتح بصوت الخطاوي
إياك متدخلش فيه”
― عبد الحميد عبد اللطيف, عصافير الجنة

“فاكر لما
وسط العيلة ووسط اللمة
فتحت كراسة الإملاءة
وبص يا بابا بص يا جدو
أنا جبت عشرة علي عشرة
وخدت النجمة
فاكر لما
كنت بتحب الكارتون
ولا تسأل يا دنيا إيه فيكي
فاكر النينجا وكابتن ماجد
ومجلة ميكي
فاكر لما
الليل كان ييجي
وتتنطط علي السرير
وتنام يا سلام من غير تفكير
ولا حتي أسئلة كتير
ملهاش أي إجابة
فاكر لما
مكنش في هم
ويبان الناس عندها دم
ولما كان ممكن لساعات
مبسوط بتراقب ف سحابة
!فاكر”
― عبد الحميد عبد اللطيف, عصافير الجنة

“أنا عايز أطير طيارتي
لحد ما يخلص بكر الخيط
أنا عايز أبدل بعجلتي
وأهرب بيها بعيد عن البيت
أنا عايز أرجع قلبي سليم
والدنيا متسواش ولا مليم
أنا عايز أوقف ساعتي
وأغير ألوان الحيط”
― عبد الحميد عبد اللطيف, عصافير الجنة

“مينفعش تتعب دلوقتي
ولا تنفخ ولا تتغاظ
او حتي لحظة تمل
إيه يعني مش كله تمام
السكة لسه طويلة
واللي باظ باظ
والحلم محدوف قدام
مفيهاش بقي علي مهل”
― عبد الحميد عبد اللطيف, عصافير الجنة

“بقالي زمان
مصلتش ومركعتش
ومشكتش لربنا
من الهم علي كتافي
بقالي زمان مفكرتش
وبالتالي مدمعتش
واعدي اليوم
بكتر النوم
ولف نفسي ف لحافي
بقالي زمان
مضحكتش علي نكتة حتي لو حلوة
ومكتبتش بقلمي أشعار عقلي اللي بتجيني
مع إنها حلوة
ولا اشفش البنت الحلوة
واحسها حلوة
بقالي زمان
عايز ارجعني زمان
ومقدرتش”
― عبد الحميد عبد اللطيف, عصافير الجنة

“مبحبش لحظات الوداع
والدنيا خلتني
أودع كل حاجة حبيتها
كل حلم ف يوم حلمته
بصحي منه مش مجمع
وأفضل أسأل
وكتير بشيل ف نفسي وازعل
حتي يوم ما قلت آهية
وحبيتها وقلت هي
وهتبقي ليا
دي الدنيا ضحكت
أتريها ضحكت
بس عليا
فين الحقيقة ؟
طب حد يدلني ع الطريقة ؟
أو حد يقلي ليه بدمع ؟
قالوا زمان
اللي تضيع منه حاجة
مبيعرفش يرجعها
وأنا
مبحبش لحظات الوداع
وبقيت محبش أي حاجة
عشان مضظرش أودعها”
― عبد الحميد عبد اللطيف, عصافير الجنة

“الفكرة متكعبلة ف دماغك
الفكرة بتكعبلك
وتَحاول ترجع للصراط المستقيم
الفكرة بَتتوهَك
جايبالك أرق
وعايزة تَغيرك
الفكرة لازم تُحطالها لجام
بدل ما تدمرك”
― عبد الحميد عبد اللطيف, عصافير الجنة

“لزمتها إيه العيون
لو السواد سايد
لزمتها إيه الحروف
لو الكلام مجنون
يارب لوحدك اللي عارف
نورلي عشان أشوف”
― عبد الحميد عبد اللطيف, عصافير الجنة

“طول عمري بشوف
عفاريت ف الضلمة وخوف
لحد ما لقيت الكبريت
وفهمت إن ف الضلمة محدش بيشوف”
― عبد الحميد عبد اللطيف, عصافير الجنة

“عايش ومش ضامن
أكون موجود بكرة
فبعيش
بس مبيهمنيش
لو في
بقول الحمد لله
وبقلها كمان لو مفيش
جوايا إيماني مونسني
وحلم بيعاكسني
ومن وسط البنات الكتير
مستني بنت واحدة
فاكر إني
شفتها ف حلمي
كل ما الاقيها
مش بلاقيها
بس لسه مستنيها تحسسني
إن أنا عايش
بس أنا عايش
ومش ضامن اكون موجود بكرة
وأنا
لا عمري ف يوم كرهت حد
ولا بستني حاجة من حد
ورغم قسوة كل حاجة وكل حد
ساعات ف لحظة تيجي حاجة
ويبعتلي ربنا حد
فقول ياااا
ده أنا عايش
بس أنا عايش
ومش ضامن اكون موجود بكرة
فلو عديت هنا بكرة وملقتنيش
متلومنيش
ومتقليش إن مقلتش
أنا قلت
أنا عايش ومش ضامن اكون موجود بكرة”
― عبد الحميد عبد اللطيف, عصافير الجنة

“قولي واحكي كل حاجة بالتفاصيل
زودي ف الكلام اوعاه يقل
وحشاني سبيني اشوفك
بالتفصيل الممل”
― عبد الحميد عبد اللطيف, عصافير الجنة

“إتوضا
واغسل القلب اللي صدي
مع إنه مش حتة حديدة
شوف اي حاجة جديدة
حاجة لسه فيها الروح
مستني إيه ما تروح
روح وسيب الهجص
كسر حديد القفص
اللي بنيته جوا منك
شوف بقي كام سنك
بص ف المرايا لشكلك
واسأل الصورة عن عقلك
اسمع حروف الإجابة
راقب بصبر السحابة
قيد قيود الأمس
المع ف نور الشمس
وامشيها ملي بملي
وصلي”
― عبد الحميد عبد اللطيف, عصافير الجنة

“يا عبيط
لو إتشعَبط مرمطة
خليك بسيط
الدنيا فترة مؤقتة
وعقرب الوقت سام
لو اتلدغت
هتندم ع الشعبطة”
― عبد الحميد عبد اللطيف, عصافير الجنة

“خد نفس يغسل السموم
فتت الخوف
خد بعينك صورة للنجوم
غمض وشوف
الباب المنور وسط ضلمة حياتك
وراه اللي جاي وراك اللي فاتك
يا تكمل تَدوُر مع دوران ساعاتك
يا تَفتح تِفتح تقوم”
― عبد الحميد عبد اللطيف, عصافير الجنة

“الصورة مزغللة
والصوت متوغوش
والحلم اللي كانت صورته واضحة
اتشوش
وحصالة الدنيا يا شاطر
اللي قعدت فيها تحوش
مفكر يوم ما تكسرها
تلاقي المتحوش
طلعتلك لسانها
دوقتك عفنها
وطلعت مبتعرفش غير تكوش”
― عبد الحميد عبد اللطيف, عصافير الجنة

“سيب بلونة الدنيا المنفوخة
ده اللي من جواها ده هوا
قبل ما تفرقع وتخُضك
سيبها تطير بعيد ف الهوا
وركز شوف
فيخاف الخوف
وشم بقي شوية هوا”
― عبد الحميد عبد اللطيف, عصافير الجنة

“فاضل ع السكة كام خطوة
وبتكعبل
ولما حاولت إني اصبر
لقتني ف صبري بستعجل
أنا حاسس إني لو وقعت تاني
لا هقدر لا اقوم ولا استحمل
ده فاضل ع السكة كام خطوة
وبتكعبل
يارب إسندني”
― عبد الحميد عبد اللطيف, عصافير الجنة

“كان نفسي اعمل كل حاجة حبيتها
مع اللي حبيتها
صورة اترسمت ف الخيال
وفضل الخيال بيتها
إيدينا المتشبكة وإحنا ماشيين ع البحر
وقلوبنا بتحلم تكسر الموج القوي
واتنفس من عينيها فأنسي المر
حتي لو كان المر
مر آوي
كان نفسي”
― عبد الحميد عبد اللطيف, عصافير الجنة

“ليه يا دنيا
عايزة تلبسيني
الوش زي الناس
ليه يا دنيا
عشان أعيش
لازم أغش الناس
ما تخليكي ف حالك
وتسبيني
ليه عايزة بس
تغيريني
بتقولي عشان متغشش
وهو عشان متغشش
أغش الناس
وهو عشان متغشش
تقومي تغشيني
يا دنيا رافضك تغيريني
رافضك أموت وأنا عايش
رافضك تعيشيني
بتهدديني
لو ملعبتش بأسلوبك هتوريني
هددي ووريني
أنا وشي عاجبني
ولو حتي مش عاجب الناس
انتِ هي الوهم
والناس موهومة
وشيطانك يا دنيا خبيث
مخلي الناس مهمومة
أصل انتِ اصلا ولا حاجة
بجد ولا حاجة
ولو فكروا ثانية
هيلاقوا همهم
مهما كان
ولا حاجة
بس شيطانك
لاعب ف العقول
يا دنية الحاجة
وعشان انتِ مسمومة
بتسممي عقول الناس
هبستطلك الموضوع
اوعي تكوني فكرتي
إن وشوش الناس خدعاني
اوعي تكوني فكرتي بنخدع
ولو بينت كده
ما انتِ عارفاني
بعاند
وعِندي بارد
وعَندي اللي فاكر بيخدعني
بينخدع
يعني برضه بإختصار
انخدع
وأنا عارف إني بنخدع
أحسن ما انخدع
وفاكر إني بخدع
وأقلك حاجة
ميهمنيش الصنف ده من الناس”
― عبد الحميد عبد اللطيف, عصافير الجنة

“وحشتيني قد البحر
وحشتيني قد الحوت
فرق السما والأرض
فرق الحياة والموت
لما تكوني هنا
ولما تكوني بعيد
وتوحشيني”
― عبد الحميد عبد اللطيف, عصافير الجنة

“سفنجة
سبورة قلبك
امسح الشخبطة بإيديك
مية زمزم
اغسل عقلك
شوف ال ليك
واللي عليك
مواقف صعبة
بانت ناسك
إختار البت ال مقاسك
شوفه مين عُزتُه ومين عَازَك
والحلم بتاعك إقفله عليك”
― عبد الحميد عبد اللطيف, عصافير الجنة

“بكتبلك أغنية
مش هتقريها
جبتلك هدية
كان نفسي تفتحيها
شخبط ف كرستي
لقتني برسمك
مع إني اصلا مش رسام
كلمتك
وانتِ مش هنا
وحكتلك
وانتِ مش هنا
طب انتِ
ليه مش هنا؟
وازاي مش هنا؟
ولما انتِ فعلا مش هنا
قليلي ليه؟
أنا لسه مبطلتش كلام”
― عبد الحميد عبد اللطيف, عصافير الجنة

“كلميني عن شيطانك
عن مخاوفك
كلميني عن عيوبك
عن ماضيكي
وعن أي حاجة مش حابها فيكي
كلميني عن وساوسك
عن قلقك قبل نومك
كلميني عن كابوس
بينغص عليكي يومك
وعن أي حاجة مدفونة جوا فيكي
كلميني عن مشاكلك
ف الطفولة
عن حلم سرق أيامك
وصل لنهاية مقفولة
كلميني
ماتخافيش
ف كل شيء خايفة اعرفه
وأعرفي إننا
طول ما نفضل (إحنا) حل
كلميني وأوعدك
- لو قلتي إيه -
حبي عمره ما يوم يقل”
― عبد الحميد عبد اللطيف, عصافير الجنة