أهرام الجمعة Quotes

“الأجندة اللي فيها مذكراتي ..
واللي شايله بين سطورها ..
كل يوم عشته ف حياتي،
المقدَّر واللي حاصل ..
واللي سافر واللي واصـل ..
واللي جابني واللي خدني ..
واللي سجلني وكتبني،
واللي سبته ع المفارق
واللي كان فارق وسابني ..
ابني بيني وبينه فاصلن
واللي حبيته وخدعني،
واللي بعته واللي باعني
واللي جاي علشان يفاصل.
والفواصل ف الحكاوي ..
آآهةـ طالعة بتنهيدات ..
كل تنهيدة بـ حكاية .. كل حواديتي نهايات!
.
انهاردة شفت بالصدفة الأجندة!
فوق رفوف الذكريات .
واللي باقي فيها مني ..
إسم كان مكتوب عليها..
تحت منّه "مذكرات"
وافتكرت ساعتها إني ..
عًمري يوم ما كتبت فيها ..
أي حاجة م اللي فات!!”
― Nabil Abd El Hamed, أهرام الجمعة

“يا أهلي وقرايبي .. وصُحبة زمان
يا ساكنين شارعنا وعِشرة مكان ..
يا كلِّ اللي شكلي .. وعايشين مشاكلي
زمايل مدارس، زمايل ميدان ..
بخاف ع اللي بينّا .. وأخاف ع اللي منَّا
وأخاف م المخبي
وشر اللي يبعد
وبتمنى نفضل .. بنشبه لبعض!”
― Nabil Abd El Hamed, أهرام الجمعة

“يا شوارع زحمة الصبحية .. ويارزق يحب الخفيّة ..
أنا شامم ريحة طعمية .. ما تجيبو قًرصين
.
هنفضل تملّي بنشبه لبعض ..
تشابه أسامي وتشابه ظروف
بنبعد ونرجع نصفِّي اللي بيننا ..
ونُشبك بواقي النقط والحروف ..
بتركن عليّا وتسند كتافك ..
وأنا ف عز ليلي .. بعينك بشوف
تعكِّز عليّا .. وأعكِّز عليك
وتضحك ف وشي ..
برغم اللي فيك ..
نفضفض لروحنا .. نلصَّم جروحنا ..
وتستقوى بيّا .. وبستقوى بيك”
― Nabil Abd El Hamed, أهرام الجمعة