الخروج عن النص Quotes

“كن نفسك .. متكونش زي ما أي حد عاوز .. ماتسجنش نفسك في أراء الآخرين .. ومتفصلش نفسك على مقاس أي حد، اللي عاوزك 37 واللي عاوزك 39 واللي عاوزك 42.. ما تسمحش لأي حد يشوف نفسه فيك ، ويحاول يحقق من خلالك أحلامه الشخصية.. ما توافقش إن أي حد يشوفك امتداد ليه، أو مشروعه الاستثماري الخاص.. ما تسمحش حد يقبلك بشروط، أو يحبك بشروط، أو يحترمك بشروط.. إنت نفسك ، نفسك وبس .. إنت في رحلة .. فيها صعود وهبوط .. فيها حركة وثبات.. فيها خطوات لقدام، وساعات خطوات لورا.. فيها وقوع، فيها لخبطة.. فيها حيرة وفيها شك ، فيها نور وفيها ضلمة.. فيها كل حاجة .. كل حاجة .. واللي مايشوفش دا ويقبله ويقبلك بيه ,, تقوله شكرا.. وتكمل رحلتك من غيره..”
― محمد طه, الخروج عن النص

“فيه ناس بتبقى عاملة زى مصاصين الدماء.. يعنى يبقوا عاوزين يمصوا دمك.. يبقوا عاوزين ياخدوا منك كل اللى يقدروا ياخدوه.. تبقى انت صاحب العطاء الدائم الذى لا ينقطع.. تدى.. تدى.. تدى، تنزف.. تنزف.. تنزف.. تحب.. وتقبل.. وتسامح.. وتسمع.. وتفهم.. وتقدر.. وتعذر.. وتستحمل.. وتقطع من نفسك كل يوم حتة تقدمها قربان ليهم.. وتدفع كل يوم تمن غالى فى سبيل رضاهم.. وهم مش بيشبعوا.. ولا هيشبعوا.. أبداً..”
― محمد طه, الخروج عن النص

“إحساسك بالذنب هايوقفك ويسجنك ويشل حركتك ويخليك تكرر نفس الغلطة تاني ألف مرة.. إنما إحساسك بالمسئولية هايخليك تتعلم، وتعتذر، وتسامح، وتتغير.. وتتحرك.. وتتحرر ..”
― محمد طه, الخروج عن النص

“غلطت؟ سامح نفسك.. واتعلم من غلطك.. وابدأ من جديد.. هو إحنا بنتعلم من غير ما نغلط؟
ضعفت؟ اقبل ضعفك.. ماهو انت بشر.. والضعف جزء من بشريتك
فشلت؟ وماله.. هو النجاح ليه طعم من غير الفشل؟ اقبل فشلك.. وحاول تاني”
― د. محمد طه, الخروج عن النص

“فيه بعض الناس بتستلذ بتعذيب نفسها.. وجلد ذاتها.. ناس بتعمل دماغ من الألم.. وبتستعذب الوجع.. دول بكل بساطة.. بينتقموا من نفسهم.. أو بينتقموا من غيرهم فى نفسهم..”
― محمد طه, الخروج عن النص

“إيه بقى اللى يخلى (النفس الحقيقية) اللى اتدفنت تطمن وتتونس وتقرر تعود للحياة من جديد؟ إيه اللى يخلينى أبقى إنسان حقيقي كامل عايش بنفسى الحقيقية كلها بدون تشويه أو اختزال أو انتقاص..إيه اللى يساعد فطرتى إنها تزدهر وتورد وتنور من جديد..
أقولك أنا..
علاقة..
نعم..علاقة..
علاقة إنسانية حقيقية..توصلك فيها رسايل عكس كل الرسايل المشوهة اللى وصلت قبل كده أثناء التربية أو التعلم أو أى تجربة سابقة مؤذية..
هو مش اللى بوظ علاقة؟ يبقى اللى هايصلح برضه علاقة..
علاقة يوصلك فيها حب غير مشروط..حب ثابت دائم عميق لا يتغير بتغير حالاتك أو أحوالك..حب (موقف) مش حب (حالة)..حب (مقام) مش حب (حال)..
علاقة يوصلك فيها إنك مقبول كلك على بعضك زى مانت..بضعفك أحياناً وعجزك ساعات وفشلك بعض الوقت..حتى مع عدم الموافقة على بعض أفعالك أو تصرفاتك..
علاقة يوصلك فيها إن اللى قدامك بيهتم بيك لحسابك إنت مش لحسابه هو..علشانك مش علشانه هو..وإنه شايفك إنت مش شايف نفسه أو شايف أى حد تانى فيك..
علاقة تحس فيها إنك موجود..ومتقدر..ووجودك فارق..وإنك تستاهل..
علاقة ماتكونش مضطر فيها تدفع أى تمن..علشان ترضى أى حد..
علاقة فيها مساحات للحرية والحركة..مش للتضييق والاختناق والتشويه والاختزال..
علاقة تكون فيها نفسك..نفسك وبس..
العلاقة دى ممكن تكون علاقة صداقة..ممكن تكون علاقة حب/زواج..ممكن تكون علاقة علاجية (مهنية) فى إطار علاج نفسى..
وفى الحقيقية أى علاقة (حقيقية) توصل الرسايل دى هى علاقة علاجية حتى لو ماكانتش فى حجرة العلاج النفسى..
موجودة العلاقة دى فى حياتك؟ مش موجودة؟ طيب دور عليها واتمسك بيها..بسرعة..ولآخر العمر..لأنها هى الطريق..وهى الحل..وهى الجواب..”
― محمد طه, الخروج عن النص

“من حقك تحدد مين.. هايكون فين.. امتى..
مهم حدودك تبقى واضحة.. وأرضك تبقى أمنة.. ومهم إنك تدافع عنها وتحميها.. ضد أى أذى من أى نوع..
تحديد المسافة بينك وبين أى حد حق أصيل ليك.. زى ما هو حق أصيل لكل الناس..
بيتك النفسى ملكك.. مش ملك أى حد تانى..”
― محمد طه, الخروج عن النص

“فيه ناس هوايتها الاقتحام.. اقتحام الاخرين.. يقرب منك.. ويقرب أكتر.. ويلاقيك فاتح حدودك.. فيدخل.. ويتجول.. ويحس إن المكان مكانه، فيقعد.. ويبدأ فى استهلاك مشاعرك، فيخليك تحزن مكانه، وتتألم بداله، وتشيل همومه بالنيابة عنه.. وبعدين يبدأ فى انهاك أفكارك، فتحتار فى مشاكله.. وتتردد فى قراراته.. وتعانى فى كل خطوة هو بيخطيها.. وبعد شوية كمان يبدأ فى توجيه تصرفاتك لحسابه.. ورسم سلوكك لصالحه.. وانسى بقى.. انسى نفسك يعنى..”
― محمد طه, الخروج عن النص

“الوأد مش بس للبنات الصغار أيام الجاهلية، الوأد ظاهرة إنسانية بتتكرر كل يوم، كل نفس حقيقية ممكن تتعرض للوأد عن طريق التربية القاسية، كل تلقائية/حيوية/طفولة/إمكانات حقيقية ممكن تتعرض للوأد عن طريق رفضها في الصغر، كل جزء من نفسك ممكن يتعرض للوأد في البيت أو في الشارع أو في المدرسة أو في المجتمع..”
― د. محمد طه, الخروج عن النص