مفيشاليا Quotes

“بكمالة الأشياء ولاد المره
ماسموش وطن .. اسمها معصرة
ماسموش مواطن
اسمه لبشة قصب
ماسموش ظلم
اسمه اغتصب
ماسموش شهيد
اسمه فقيد
بالعافية .. مش بالذوق
ماسموش فدا أرض الوطن
اسمه الخازوق
**
فوق
لما الكلام يبقى جاي من فوق
الكتب المقدسة خلصت
و المدنسة بالعبيط
لو يسألوك عن معنى كلمة زيّاطين .. زيط
و تجنب الشلاليط
سمعت إيه من القصة لما كانت ع المنصة ؟
سمعت تيييت
قرأتها ؟
لأ .. اتعميت
مليت استمارة بقيت في حزب البيت
و حزب الميديا
والويكيبيديا
و المعلومات الحاف
فـ خاف
ممكن كفن يتشاف ورق بفرة
لو صغّروه بالزووم
يتشاف لبن
لو كبروه شوية ..
**
عزرائيل مؤمن بالله و بـ لا للعنصرية
السوشي ميت
نفس موتة الطعمية
القبر ينفع يبقى نص رغيف
و عذابه قطمة
البرد يقتل
بس عز الصيف
و سلاحه صدمة
الاحترام والهيبة أهم شرط في بيّاعين الكيف
و أهم شرط في مشتريه
و مروجيه
المعروفين بالحكمة
و أهم شرط في بياعين اللحوم من غير هدوم
في العتمة
**
الظلم
دايما لابس اليونيفورم
كرافات وبدلة مرحرحة من ورا
بكمالة الأشياء ولاد المره
ماسموش ميزان العدل
اسمها مسخرة
ماسموش عتاب الندل
اسمها ثورة
ممنوع اجتنابها
ماسموش هتاف سلمي
اسمها حرب
مفسوخة أبوابها
ندهت لأولادها !
رَدّوا
ندهت لأولادها !
ماردّوش
السر فيها وللا السر في الندهة ؟
السر دايما جاي من الخرطوش
**
الملك زنبلك ..
و حاشيته لعبة ..
تشهد بإنه
لا إله إلا الملك ..
و إن القانون عبده و رسوله ..
و إن السلاح كعبة ..
و إن اللي ثار مؤمن ..
و إن الميدان حفرة ..
و إن الحصار ملهم ..
و إن الخلاص طفرة ..
و إن الشعوب مهما تتوب .. كافرة ..

السفرجية حَطوا الثورجية
ع السفرة ..
الحاشية بتقطَّع ..
و عدالة الملك بتوزَّع ..
الشعب مات م الجوع .. فمايشبَّعش ..
و إن حتى شبّع
الحاشية مابتشبعش ..

الكل قام ..
طوابير على الحمام ..
حد يخرج ..
بعده يدخل حد ..
الريحة تظهر ..
السيفون يتشد ..

أحلام
و كانت واصلة فوق الحد ..
حَزْق الملوك
قدَّر لها تتهد ..
**
الدم كلّم نفسه في الميادين ..
- أنا دم مين ؟؟
لكن محدش رد ..
يا ميتين الدم مش بيعض ..
الدم سببه في الأساس عضة ..
كل اللي خارج م الميدان بيدق ..
ميت لحد الوقتي م الخضة ..

- أنا دم مين ؟؟

اسكت يا دم .. و خلي عندك دم ..

رد الشهيد ع الدم أحرجني ..
أُخرج ..
فقاله الدم خرّجني ..
الدم خارج م الميدان يجري ..

- أنا دم مين ؟؟
لَف الوطن أخده شمال في يمين ..

- أنا دم مين ..
لكن محدش رد ..

شُفت ؟
الوطن هنّج و عايز سوفت ..
و الشعب متفرمط ..
في اللحظة دي
الدم قرر إنه يتجلط ..
**
و بلّط مكانه الحق .. و اتربّط
زغرد المحقوق
و ليه زغرد ؟
و زغرد أوي !
هل يستوي
الدم اللي طلّع الأرواح
مع الدم اللي نزّلها ..
هل تستوي
قماشة الضحية و قماشة الصباحية ؟

هل تستوي
القضية اللي جوّة الشعب
و القضية اللي جوّة الظرف ؟
هل يستوي
التطرّف و القعاد ع الطرف ؟

أقعد على الطرف ..
تلقى التطرّف في القعاد جوة ..
في اللي ليه قوة ..
و اللي ليه سيطرة ..
بكمالة الأشياء ولاد المره ..
ماسموش وطن
اسمها معصرة ..
فيها اللي قدام في العصير
فيها اللي متقشر ورا ..
..
#مفيشاليا
#حسام_ابراهيم”
― Hossam Ibrahim, مفيشاليا

“ماسألتش نفسك،
ليه توم
طول الكارتون
ماقتلش چيري !؟

طب چيري كان ليه
علطول مسجون
و في آخر لحظة
هرب وجري !؟

يمكن كان عارف
إن الناس كده مبسوطة
فاضطر يعيد في الحدوتة
ويغيَّر حبة تفاصيل ..

والناس مساطيل ..
هتصدق فيلم الكارتون ..

والموت
يتحول من مأساة
لمشهد كوميدي

والثورة
هتبقى -اسبيستون- ..
..

#مفيشاليا ..
#حسام_ابراهيم”
― Hossam Ibrahim, مفيشاليا

“فاكر في الماضي ..
كنت أما بتمشي على بلاط ..
كنت تفادي ..
الخط الفاصل بين الاتنين ..
كان شيء بالنسبالك عادي ..
كنت أحرف واحد في اللعبة ..
ليه لما كبرت بقت صعبة ؟؟
و بقيت تخسر من أول دوسة ..

في حاجات بتكون مش ملموسة
لكن تتحس أما تغيب ..
فتلاقي العيب ..
رجليك مثلا كبروا شوية ..
بس البلاطات زي ما هيه ..
فتلاقي معدش فيه شيء باقي ..
الدعوة بتخرج تلقائي :-

يا رب ..
ارزقني حاجات ليا ..
تفضل علطول باقية عليا ..
و تكون على كل المقاسات ..
ارزقني يا رب حاجات بتدوم ..
لو حتى هترزقني بنوم ..
ارزقني بنوم الأموات ..
..
#مفيشاليا
#حسام_ابراهيم”
― Hossam Ibrahim, مفيشاليا

“- سابق- هيسبق ..
مهما هتكون الظروف ..
-لاحق- تمامه معروف ..
علشانه وافق إنه يلعب ..
دور مساعد للبطل ..

بطّل هَطَل ..
كل اللي خطُّوا برجلهم
أرض الميدان ..
يشبهوا -لاحق- تمام ..
شاهدين عيان ..
على دمهم ..
عارفين
نهاية فيلمهم ..

- سابق- هيسبق..
بعد ما يموت كل -لاحق-
في سبيل القضية ..
وهيسجن الباقي للتضحية
في سبيل الظلم ..

- سابق-
مكنش يدوب ممثل عادي ..
- سابق-
كتب معظم
سيناريو الفيلم ..
..
#مفيشاليا
#حسام_ابراهيم”
― Hossam Ibrahim, مفيشاليا

“- مشكلة الباب..؟

في العتبة اللي قصاد الباب ..
بتخليه لو حتى اتساب ..
يفضل محبوس جوَّه الأوضة ..

زقيت الباب بإيديك كام مرة ..
عمرك خرجته في يوم برَّه ؟؟
مع إنك زقيته بعزمك ..
مقدرش يسيبك، ويخاصمك ..
واتربس ، واستناك تهدى ..
حتى امَّا هديت،
وفتحت الباب على طول،
ومشيت ..
ومقلتش له حتى سلام !
فرجعت لقيته.. كما كان ..
متهزش خطوة لقدام ..
عمرك زقيته، وقال لك لأ!؟
- لأ.
علشان بقى مدمن للزق ..
وعشان بقي مدمن للجرح ..

- مشكلة القلب..؟

في العتبة اللي قصاد القلب ..
برضك هتكون نفس الشرح ..
..
#مفيشاليا
#حسام_ابراهيم”
― Hossam Ibrahim, مفيشاليا

“الصحاب
كانوا خمسة.. ستة
عملوا بيك.. أشيك جاكتة
يلبسوك في البرد بس ..
كنت دافي ..
والدفا كان فيك قوي ..
كان قوي، بقى نُص نُص ..
فيه اللي عانك في الدولاب ..
واللي سابك لمّا جاب ..
واللي قلعك لمّا خَس ..
..
#مفيشاليا
#حسام_ابراهيم”
― Hossam Ibrahim, مفيشاليا

“مابتجيش في باله..
إلا قبل امتحانه ..
وقبل الخروجة ..
وقبل الجواز ..
وقبل الشوارع ما تقلب لخرمس ..
وقبل امَّا يكبر ويطلع مهندس ..
وقبل امَّا فاز ..
بالفلوس والمناقصة ..
وقبل البداية ، وقبل الختام ..

مابتجيش في باله..
إلا بعد أمّا يعطس ..
ومش أي عطسة !
دي لازم تكون جاية وسط الكلام ..

فمثلا بقول القصيدة ، وتمام..
عطست ..
وقطعت اللي جاي من كلامي ..
فبصيت لفوق
ناديت لك: يا ربّ

يا ربّ إن ماموتش بفعل الزكام ..
هموت وانْتَ لسه
مابتجيش في بالي..
..
#مفيشاليا ..
#حسام_ابراهيم”
― Hossam Ibrahim, مفيشاليا

“بشوفِك شوية
في مسكة إيديا
لورقة في دومينو
ولعبة أخيرة ..
في آخر ذخيرة
في مسدس قتيل ..
في كل الجميل
في الحاجات القديمة ..
في لمبة سلمية
و مفيش كهربا ..

بشوفِك..
رِبا
بتدِّيني بصة
فـ بضعف.. ف ابُصّ
ببصة .. ونص ..

بشوفِك في صرخة
كوتش في طريق
بيصرخ عشان
يفرمل ، فيهبط ..
وسواق متَبِّت
إيديه ع الفرامل
برغم إنه واثق
هيخبَط ، هيخبَط ..

في واحد
و واقف قصاد المقابر
برغم إنه صابر
فحاول يخبَّط ..

في مسمار، في حيطة
وداخل لجوَّه
لتحت المحارة ..
في حب الحرارة
في أسقع ليالي
وأتقل غطا ..

في حب الشتا
في عز الصيام
ورمضان في سبعة ..

في كل اللي سابوا
وسابوا المتابعة ..
وكل اللي لسه
بيهتف لرابعة ..
وكل اللي غاوي
النزول في الميدان ..

في باقي الدهان
اللي فوق الحيطان
في بيت أم أبويا
اللي دايمًا جديد ..

في كل الخناق
اللي محصلش فعلا
ما بيني وأخويا
لأني وحيد ..

في صوت الرئيس
في آخر الخطاب
في أول ما يبدأ
كلام ع المعونة ..

بشوفِك
كلاسيكو
وكسبه الريال
لكن البطولة
في جيب برشلونة ..

في مبنى الحكومة
أمَّا طَب الوزير ..
في شكل المخدة
اللي زاحمه السرير ..
في سكر
ولازق في قعر العصير ..

بشوفِك في زوري
في صورة لِوَز ..
بشوفِك في بطني
على شكل زايدة ..

بشوفِك..
في كل اللي مش منه فايدة ..

في حلم اخترقني
في عز النعاس ..
وهكّر مشاعري
ف خدني ، و رجع بي
لأساس الأساس ..

بشوفِك في ترباس
على باب قصيدة
ومش لاقيه قفلة
لأنه اتفسخ ..
فطفحت كلامها
في صورة نُسَخ ..
في صورة عبط ..
بشوفِك ....
وأكمل مكان النقط ..

بشوفِك في قلمي
أمَّا قرّب ينِخ ..
فـ ريّح دماغه
وشافِك .. إلخ ..
..

#مفيشاليا
#حسام_ابراهيم”
― Hossam Ibrahim, مفيشاليا

“عوني ( استراحة 2 )
..

تشرب إيه ؟؟
- ولّع على شاي ..
مع إني قايلَّك مش جاي ..
- طب راجع ليه ؟
- مرجعش إزاي !
***

- يا عبيط !
ده الواقع ..
مافيناش بني آدم مش خاضع ..
للصدفة وقوانين التخبيط ..
دوَّر حواليك
أو حواليَّا ..
أحداث مش ليها أهمية ..
تقدر تتحكم في حركتك ..
أكتر من عضلة رجليك ..

كنت يدوب قايم وهتمشي
قررت في ثانية تخليك ..

وعفارة بتدخل في عينيك
وبشكل ما.. مش مقصود
تتأخر ع القطر مفيش
وتروح تلاقيه مش موجود ..

رايح تشتري قرش حشيش
والديلر مش ويَّاه فكة ..
عربية بتعْطل ع السكة
بتعَطّل عربيات تانية
عَطَلة كام ثانية ..
ميتعدوش ..
فتقابل واحد كان صاحبك
من أيام ثانوي
مشوفتوش ..

أغنية اشتغلت في القهوة
خليته يغيرلك نار ..

بياع الورد اللّي اختار
إنُّه يوقفكم بالعافية ..
والبنت اللّي جابت لك كافية ..
وقالت لك ما تقوم نتمشى ..
سبِّيت للحب، ولسنينه ..

نمت ومعرفتش تتعشى ..
علشانك مش غاوي الفينو ..

خبطة رجليك في الكومودينو ..
وقعادك ساعة على الأرض ..
تأخيرك ساعتين في الرد ..
علشان بتصلح سلك النت ..

حتى انْت..
كان ممكن متجيش الدنيا
وتروح لاخواتك ف التواليت ..

أتمنى تكون دلوقت فهمت
الفرق ما بين إنسان عايز ..
وما بين الجايز.
في الواقع ..
الشاي بقى ساقع ..
ده انَا حتى حاطط لك فيه قِرفة ..
ما ترد يا عم ..
معرفش انَّك عندك دم ..
حسيت بالقهرة وبالقَرْفة؟
وعرفت انك ابن الصدفة ..
وانّك متحرك مش ساكن ..
وانِّنا أزمان ويا أماكن ..
وفراق ولقا..؟

- أنا ماشي بقى..
واقسم لك إنّ انَا مش جاي.

- صدقني هترجع..
وهتيجي تحب على إيديّا
أنا قايم أولع على شاي ..

- طب زوِّد ميَّه ..
..
#مفيشاليا
#حسام_ابراهيم”
― Hossam Ibrahim, مفيشاليا

“و غباءك بيبان فى الآتى :
لما انت تعلّي فى شئ واطى ..
بتعلّي
لحد ما يعلَى عليك ..
مع إنك
لو بصيت فى ايديك ..
كل اما تشاور على حاجة ..
هتلاقى صباعك ع الحاجة ..
و تلاتة عليك...
..
#مفيشاليا
#حسام_ابراهيم”
― Hossam Ibrahim, مفيشاليا

“#سناكس
..
إيه اللي نابنا
زمان من الكاراتيه ؟؟
غير وجع في البطن والمعدة ..
أمي قاعدة .. شافتني ..
وقفت ليه؟
ليه ساعتها لقيتها بتصوّت !

كَلت أنا الكاراتيه
و مأكلنيش ..

أمي قالت .. إن ده مؤقت ..
وإن دود البطن ده مِلقّط ..
في البداية، يعُضّنا بشويش ..
بس بعد شوية ماتلومنيش ..
ع الحقن والشَربة والبراشيم ..

كنت طفل ..
وطفل .. عكس غشيم ..
كَلْ دماغي الكيس وكسِّبني ..
طب عجبني الطعم ؟
ماعجبنيش..
أو عجبني بس أنا بكذب ..
كان عاجبني إن فيه مكسب ..
آه كسبته ..
وهوه ماكسبنيش ..

كلنا أطماع ،، لنا مطمع ..
عبّي فينا يا دنيا يا مصنع ..
يا ضرايب، رَخّي ماتشديش ..
لمّا تيجي تنفذي التفتيش ..
المكاسب فيه ،
يا إمَّا مفيش ..
المكاسب فينا .. مش لينا ..
إن كسبنا .. ابقي قابلينا ..
وإن خسرنا .. عَدّي ماتبصيش ..

شوفي لينا كيس يكون غير ده
إيه اللي نابنا زمان من الكاراتيه
غير وجع في البطن والمعدة !
أمي قاعدة .. شافتني..
وقفت ليه ؟
أمي أكلت قبلي كيس من ده ..
..
#مفيشاليا
#حسام_ابراهيم”
― Hossam Ibrahim, مفيشاليا

“ماريو أمَّا مات..
كان له تلت محاولات
وانَا كنت عيل
عقلي على قد السنين
كنت فاهم إن كل الميتين
راجعين لنا.
أول ما ادُوس-استارت-
جربت..
لكن مرجعوش
قلت جايز الكون مهنِّج
قلت استني.. مجوش
أتاري..
كلنا في كوكب أتاري.
والدراع مع حد تاني
وإننا.. وكل اللي ماتوا
واللي جايين، واللي فاتوا
في النهاية موتتنا واحدة
وإن ماريو لو معانا..
كان هتبقى محاولة واحدة..

#مفيشاليا
#حسام_ابراهيم”
― Hossam Ibrahim, مفيشاليا