استلمت المكتب قبل قليل .. وغادر الامين السابق .. كانت اول ورقة تفحصتها .. قرار احالة موظفين من وزارة الخارجية تحت تصرف الخدمة العامة .. التعليمات .. كل سفارة خمس موظفين .. والباقي يروح .. القانون يجيز احالة موظف تحت تصرف الخدمة المدنية ( العامة ) .. ووجب النظر في اعادة توجيههم .. قرارات تقليص الجهاز الاداري والتحول الى الانتاج .. كشوف لا حصر لها .. فيض من النساء العاملات .. والغفراء .. واين هي مواقع الانتاج .. مصنع الطماطم .. متوقف .. والمطاحن لديهم ما يكفي .. وبعد مخاض طويل وعسير .. وكشوفات .. وقرار حظر التعين .. نحي من اللحيه .. حط في الشارب .. وقرار الوجيج اليومي .. السلام عليكم .. احنا قدمنا اوراقنا للجنة التسوية على قانون 15 للمرتبات .. وملفاتنا في طرابلس لهن 9 شهور .. وما جاء رد .. احنا سواقين .. ومن حقنا الدرجة الثانية كفنيين مهنيين .. واليوم عام وننتظروا في التسوية وما جاء رد .. امشي لطرابلس .. الوزارة في العمارة .. عمارة سكنية .. الدور الثاني .. مكتب الوزير محمد المبروك .. اهلا بعرب الجنوب .. وعند لجنة التسويات .. اكوام ملفات .. من جميع البلديات .. وتحدث مع رئيس اللجنة .. وكان مشغولا جدا .. ووعدني على عجل بالنظر في ملفات الجنوب .. وطال الانتظار .


    مخصصات خطة التحول 50 الف دينار .. منهن مرتبات عدد 13 مدرب اجنبي .. بمركز التدريب المهني .. مصريين .. ولبناني .. ومنهن عهدة تسييرية بين الحين والاخر لمدير مركز التدريب .. مكانيكا سيارات .. كهرباء منزلية .. لحام .. نجارة .. كان مقر المركز يتقاسمه معنا القوات المسلحة .. اقاموا حائط عازل ضم نصف المقر .. واستولوا على تشغيل ورشة النجارة .. وصارت الالات التي جلبت للتدريب تصنع دواليب المطابخ .. والارائك .. والمدرب المصري ديدنه .. كلما رأني .. " نقول لهم اتركوا لينا الة وحده ندرب العيال عليها .. يقولك .. عندنا طلبية الايام دي .. وزحمة شغل " .
   تقف على عمك المبروك العز في قسم المكانيكا .. زي ما تشوف بعينك .. سيادة الامين .. نموذج مجسم واحد لمحرك السيارة من الداخل .. يا ريت فيه مجسمات .. وهياكل .. تساعدنا في التدريب .. ونبو عده .. مفاتيح كلاليب .باهي .. انشالله ما يكون الا خير .