محمد الحويف

“بسم اللي عَاشُوا يحسَبوها
بسم اللي خَافوا م الحَياة
بسم اللي إختاروا يتوهوا
علشان خافوا من النجاة !
بسم اللي كان قَرارهم
إنهم مش هيقرروا
بسم اللي كان إختيارهم
إنهم هيضيعوا
كُل فُرصة لحاجة حلوة
لجل إنهم خَايفين
بسم اللي كان نِفسهم
بس ماقالوش عايزين
هتعيشوا الحياة كام مرة
لجل ما تفضلوا ساكتين
كل اللي عاشوا خايفين . .
ما عاشوش
كل اللي كانوا مُترددين . .
ما كانوش
كل اللي عاشوا بيحلموا
حتي لو ماحققوش
يكفيهم شَرف الحِلم
يكفيهم إنهم ماكانوش
ضيوف شَرف فـ الفيلم !”
― محمد الحويف, مشاهد

“أنا نظرة مَكسُوفة ففضلت
جُوا العِين وماطلعتش
أنا كِلمة مَكتُومة وماتت
جُوا الكاتب ما اتكتبتش
أنا ذِكري محفورة وعَاشِت
لكُل إيد فـ يُوم سابت
وكُل فِكرة فـ يُوم كانت
جُوانا بس خَلاص مابقيتش
أنا صُورة مرسُومَة لواحِد
مَات وحياته ما اتعاشتش
أنا يُوم ومقرر مايجيش
أنا أكتر واحد ما أعرفنيش
أنا أصعب سؤال في الكون
"مع إن إجابته "مفيش
أنا أحلام نفسها تكُون
بس مش مَكتُوب تَعِيش .”
― محمد الحويف, مشاهد

“كُل يوم بسأل مرايتي
إللي جُوه يبقي مين ..
متقوليش إن اللي جوه
يبقى أنا
متقوليش أنا عُمري يبقي
كام سنه ..
و إن لون الشعر لـ ابيض
فوق دماغي يبقى شيب ..
و إن إحساس الطفوله
جُوه مِني يبقي عيب ..
دنا عُمري بس يادوب يومين ..
يوم راح في أوهام الأمل
و التاني تايه في السنين
إللي جُوّه يبقى مين ؟
اللي جُوه شخص عاش
العُمر خايف ..
أعمى كان دايماً بيعمل
نفسُه شايف ..
فجأة ستر العُمر أصبح
ستر كاشف ..
حتى كرمشة الشفايف
سايبة سطر من السنين ..
إللي جُوه يبقى هُوه
بس هُوَ مكانش عارِف
هُوَ أصلاً يبقى مين ؟ ..

#يبقى_مين
#نبيل_عبد_الحميد”
― Nabil Abd El Hamed, قانون الدنيا الساخر

“قواعد الوحدة الستة

1
الوحدة حُضن المُشتاقين للُقا
الوحدة وطَن كُل متغرب
الوحدة دفا وقت البُكا
الناس بتبعد - والوحدة بتقرب .
2
فَرق ما بين
إضطرارك للوحدة . .
وحاجتك ليها
الأولانية هتعذبك
والتانية صدقني . .
هتستمتع بيها .
3
الوحدة دايرة . . وإنت مَركزها
فطبيعي مهما تلف . .
هتفضل جواها
الدُنيا قاسية وإنت هدفها
ولجل ما تخف . .
فالوحدة دواها .
4
لما الناس تَبيعك . .
إشتري الوحدة
لما الناس تسيبك . .
إتحامي فيها
الوحدة بنت جَدعة
يوم ما تحتاجها . .
أكيد هتلاقيها .
5
مين قال إن الوحدة
يعني مفيش حد « معاك »
هتحس الوحدة لما . .
يبقي مفيش حد « جواك »
6
ساعات الوحدة بتكون أحسن
من ناس مكسبهم خُسارة
وناس خُسارتهم مَكسب
الوحدة هتفضل حقيقة حتي
لو كُل الناس طلعت مقلب .”
― محمد الحويف, مشاهد