Fathia Mahmoud

“وقف الشريط في وضع ثابت
دلوقت نقدر نفحص المنظر
مفيش ولا تفصيلة غابت
وكل شيء بيقول وبيعبر
من غير كلام ولا صوت
أول ما ضغط الموت
بخفة وبجبروت في يوم أغبر
علي زر في الملكوت
وقف الشريط في وضع ثابت
دلوقت نقدر نفحص الصورة
انظر تلاقي الراية منشورة
مِتْمَزّعة لكن ما زالت فوق
بتصارع الريح اللي مسعورة
وانظر تلاقي جمال
رافعها باستبسال
ونزيف عرق سيال علي القورة
وف عنفوان النضال
وقف الشريط في وضع ثابت
انظر اليه شوف قبضته السمرة
وعيونه ثورة مكحلة بثورة
وصدره عرض الأرض حاضن مصر
والشام وليبيا وتونس الخضرة
والقصبة وفلسطين
والأردن المسكين
والبحر والبساتين والصحرا
وف عز طحن السنين
وقف الشريط في وضع ثابت
انظر وشوف ع المهل بالراحة
الشمس وسط القبة قداحة
وناس بعيد في الظل مرتاحة
ومصر واقفة صبية فلاحة
علي كتفها بلاص
فيه ألف تقب رصاص
والميه منه خلاص
شلالها في الرمل غاص
صبية حلوة كأنها تفاحة
لكنها م الحزن دابت
وسط السواد ندابة نواحة
ولما هل بطلها في الساحة
بالحب والاخلاص
وقف الشريط في وضع ثابت
خلي المكنجي يرجع المشهد
عايز أشوف نفسي زمان وانا شب
داخل في رهط الثورة متنمرد
ومش عاجبني لا ملك ولا أب
عايز أشوف من تاني واتذكر
ليه ضربة من ضرباتي صابت؟
وضربة من ضرباتي خابت
وضربة وقفت بالشريط في وضع ثابت؟
قال المكنجي: رجوع مفيش
عيش طول مافيك أنفاس تعيش
وبص شوف ..
ركن الشباب صفوف صفوف
ركن الشباب في السينما بيصفر
مفيش وقوف
ركن الشباب فيه ألف مليون شب
ومش عاجبهم لا ملك ولا أب ..
انظر إليهم
وأنت تتذكر”
― صلاح جاهين

“( فى الليل )
ـــــــــــــــ
الليل ملاح ، تايه سواح ، لا بيوصل شط ولا بيرتاح
الليل مشحون أسرار وشجون وألم ونغم ودموع وآهات وكاسات ونايات وعبر وحكم
ومشيت فى الليل خجلان مكسوف ، اكمن الليل عريان مكشوف
أسرار الناس وجراح الناس .. على صدر الليل .. عناقيد وصفوف
ودموع الليل والضلمه جبال ، راسمين على وش السما غربال ..
الماظ مبدور فى كاسات بنور يرسم بالنور ع الارض خيال
هاتقولى بتشكى آمال من ايه ؟ ولا من أوجاع ولا شوق لمتاع ده العمر ان ضاع مش هابكى عليه أبداً يا طبيب .
يا طبيب أنا جرحى ملوعنى وساقينى الحنضل من كاسى . والنار فى ضلوعى بتلسعنى
وانا لسه صغار والعيا آسى .. ولا عمر الليل مرة سمعنى
عليت الآه على أنفاسى .. أبداً يا طبيب
وينام الليل .. والكون حواليه .. ساكن نعسان .. وكأن الموت .. رمى تقله عليه
سكــت العيــان
ونزور فى الليل دنيا الخمار ، ونلاقى الكاس ع الناس دوار ،
ويموت الليل على باب الحان .. هايخش إزاى والدنيا نهار
وقلوب ونفوس كده ع المكشوف .. عريانة تمام
وتعال نشوف ...
شوف ده الى هناك قدامة كاسين !! مع إنه لوحده ماهوش إتنين
أهو ده الى بنظرة عين شبكوه وسابوله الكاس ملينان وفاتوة وحكايته تقيله وهمه تقيل
و غزاله بتتغزل فى حصان .. وتقوله أحبك انت وبس
ويفز هناك سيدنا المنظور ، ويطب الكاس فى إيدية مكسور
ويقول غشاشة هاتلعب بيك .. ويرد التانى عليه بفضول
طب وانت مزعل نفسك ليه حشرى وهاقولك ايه
مانويلى يقول . موس عاندق خق
والسامر يضحك لما يطق .. ويحط الحشرى عنيه فى الارض
وف جوف الليل يغرق مسكين لا يغير حاااال ولا يشغل بال
الحظ حمار من غير حمار فقد التمييز .. زى المجانين هجروا البساتين سكنوا الدهاليز
والحظ بطبعة عنيد ودماغه حديد لو يحكم حتى على الغزلان يتقلبوا معيز
وهناك طرابيزة عليها نمر بنظام من واحد يمكن لما لألف
والدنيا بزى ما هى تمام على هيئة كرة تدور وتلف
وشنب مفتول يصرخ ويقول
اللقمة بتنده أكلها والرزق نصيب ، والناس ملهيا ف أحوالها زى المجاذيب
الصبح معاك والضهر عليك ، والحظ لو إدى ما بينقيش . من قوتك يلا ماتحرمنيش
قرب قرب . جرب جرب ، ودى لعبة حظ ما فيش تبكيش
والشيخ سلامون قاعد على أعصابة ومحتاس
يلعب ع السته الخمسة تصيب .. ينقل ع الخمسة ، الخمسة تخيب
وخلاص الحظ اداله قفاه والحظ ان ولىّ بيبقى عجيب
كلها ساعتين والشيخ سلامون قايل محتاس .. يا خراب البيت ، يا فلوس الناس
طب المسكين من طوله ، يظهر مات
والناس ملهيه فى أحوالها بيدوسوا عليه
وبتاع الكرة مشغلها هايبطل لييه
واللقمة بتنده آكلها
طب وده كل إيــه ؟!
الشارع نايم تحت جناح الليل همدان
وعيون النور نعسانة بتدنة ع العمدان
وسقانى الشهد .. ودقت الويل .. وعرفت الناس م الراس للديل
وأمنت بأن الك عبيد
ونهيتها وانا سارح وخيالى يصور
وانا شارد ولقيت الكون بادى ينور
وغمزنى الفجر وصحانى على صوت بيقول ..
الله أكبر”
― أحمد فؤاد نجم

“أسائل:
من للصغار الذين يطيرون -كالنحل- فوق التلال؟
ومن للعذارى اللواتي جعلن القلوب:
قوارير تحفظ رائحة البرتقال؟
ومن سيروض مهر الخيال؟
ومن سيضمد -في آخر الصيد- جرح الغزال؟
ومن للرجال..
أذا قيل "ما نسب القوم"؟
فانسكبت في خدود الرمال دموع السؤال؟”
― أمل دنقل